Fógraíonn McConalogue deontais EMFF €1.8m chun tacú le hinfheistíocht de luach €4.5m a thabhairt do 28 fiontar dobharshaothraithe

D’fhógair an tAire Talmhaíochta, Bia agus Mara, Charlie McConalogue TD, inniu go mbronnfar €1,811,461 i ndeontais ar 28 cuideachta dhobharshaothraithe faoin gClár Chiste Eorpach Muirí agus Iascaigh de chuid na Ranna. Leis na dámhachtainí deontais tabharfar tacaíocht infheistíochta de luach iomlán de €4.5 milliún don earnáil dobharshaothraithe. Tá na deontais cómhaoinithe ag Rialtas na hÉireann agus ag an Aontas Eorpach agus tá siad faoi réir téarmaí agus coinníollacha.

Dúirt an tAire McConalogue, “Tá ríméad orm a bheith in ann inniu €1.8 milliún a sholáthar i ndeontais do 28 cuideachta dhobharshaothraithe uaillmhianach chun fás dá ghnóthaí agus dár n-earnáil dobharshaothraithe a chur chun cinn. Leis na deontais seo tabharfar tacaíocht infheistíochta de €4.5 milliún d’fheirmeoireacht oisrí, diúilicíní, agus feamainne agus do shaothrú breac. In ainneoin an dhá mhórdhúshláin de Covid agus Brexit, tá muinín ag an 28 gnó dobharshaothraithe seo maidir le todhchaí a n-earnála agus tá siad ag leathnú a gcuid táirgeachta chun freastal ar éileamh láidir an mhargaidh ar a gcuid táirgí d’ardchaighdeáin."

Dúirt an tAire chomh maith, “Le blianta beaga anuas d’infheistigh mo Roinn chun deireadh a chur leis an riaráiste ceadúnaithe do tháirgeoirí dobharshaothraithe sliogéisc agus creidim go bhfuil sé seo á léiriú sa líon mór iarratas ar dheontas atá á gcur isteach ag táirgeoirí dobharshaothraithe sliogéisc, rud a thaispeánann muinín athnuaite ina gcumas leathnú agus cinnteacht rialála a bheith acu.”

Nóta do na hEagarthóirí:

Le Clár Oibriúcháin EMFF na hÉireann 2014-2020 soláthraítear maoiniú de €240m don earnáil bia mara (iascaigh, dobharshaothrú agus próiseáil bia mara) thar an tréimhse 2014 go 2020. Tá an Clár cómhaoinithe ag Rialtas na hÉireann agus ag an Aontas Eorpach.

Tá dhá scéim tacaíochta EMFF ar fáil don earnáil dobharshaothraithe chun cabhrú le haidhmeanna an Rialtais atá ina Phlean Straitéiseach Náisiúnta um Fhorbairt Dobharshaothraithe Inbhuanaithe , a foilsíodh in 2015, a bhaint amach. Tá sé mar aidhm ag an bPlean táirgeadh a fhás go hinbhuanaithe faoi 45,000 tonna. Tá an Plean á nuashonrú faoi láthair don tréimhse 2021-2030.

Le Scéim Dobharshaothraithe Inbhuanaithe an EMFF tugtar tacaíocht d’infheistíocht chaipitil de chuid fiontair dobharshaothraithe ceadúnaithe chun táirgeadh a fhás ar bhealach inbhuanaithe agus tionchar comhshaoil dobharshaothraithe a laghdú, mar aon le costais a bhaineann le deimhniú orgánach do tháirgeadh dobharshaothraithe a laghdú. Le Scéim um Thairseach Eolais de chuid EMFF déantar nuálaíocht, forbairt theicneolaíoch agus bainistiú galair san earnáil dobharshaothraithe a chur chun cinn agus tacaítear leis.

Faomhadh deontais - Scéim um Dheontas Dobharshaothraithe Inbhuanaithe

CRÍOCH