“Tá leibhéil damáiste gan fasach ann do shaothróirí áirithe san earnáil gairneoireachta de dheasca Stoirm Éowyn. Buille millteanach is ea cailliúint an bhonneagair ríthábhachtaigh fáis ar nós na bpolathollán agus na dtithe gloine go luath sa séasúr fáis agus is tástáil cheart ar athléimneacht é. Agus é sin san áireamh, ghair mo chomhghleacaí, an tAire Healy-Rae cruinniú d’Fhóram an Tionscail Gairneoireachta go sonrach chun cloisteáil faoi thionchar Stoirm Éowyn ar an earnáil go díreach. Bhí an tAire Healy-Rae ina chomhchathaoirleach ar an gcruinniú le Orla McManus, Príomhoifigeach Feidhmiúcháin na hEagraíochta Táirgeoirí CMP Dé Máirt 11 Feabhra.”

“Deis iontach a bhí san Fhóram dom cloisteáil go díreach ó shaothróirí agus ó ionadaithe na hearnála maidir leis na dúshláin agus na deiseanna atá ann don tionscal gairneoireachta. Bhí an cruinniú an-chuiditheach, le plé agus rannpháirtíocht mhaith thar raon réimsí, lena n-áirítear Stoirm Éowyn, a bhí ar bharr an chláir oibre do go leor daoine timpeall an bhoird. Chuala mé go díreach ó shaothróirí faoin tionchar suntasach a bhí ag Stoirm Éowyn ar a ngnó. Agus bonneagar ríthábhachtach caillte acu, is amhlaidh a chaill saothróirí na hinnill a spreagann a ngnó. Thug mé gealltanas go ndéanfainn gach rud is féidir liom chun oibriú leo ar an raon leathan saincheisteanna a ardaíodh.”

“Tar éis méid agus suntas an damáiste a rinneadh agus an gá atá le freagairt mheasartha a chur san áireamh, tá lúcháir orm, in éineacht leis an Aire Healy-Rae, athoscailt spriocdhírithe na Scéime um Chúnamh Infheistíochta chun an Earnáil Gairneoireachta Tráchtála a Fhorbairt 2025 a fhógairt chun déileáil le saothróirí atá ag moladh infheistíochtaí mar fhreagra ar an damáiste a rinne an Stoirm agus leo sin amháin.”

“Agus Scéim 2025 á hathoscailt, is féidir le saothróirí a raibh iarratais curtha isteach acu cheana féin roimh an spriocdháta i mí na Nollag a n-iarratas a leasú chun tús áite a thabhairt d’infheistíochtaí i bhfianaise an damáiste a rinne Stoirm Éowyn. Ina theannta sin, freagraíonn an athoscailt spriocdhírithe seo don éileamh ar chabhair do shaothróirí atá thíos le Stoirm Éowyn a bheidh in ann iarratas a dhéanamh anois ar chúnamh deontais chun infheistíocht a dhéanamh i bhfoirgnimh agus i dtrealamh gairneoireachta chun cabhrú lena ngnó teacht slán ón damáiste a rinne an stoirm.”

“Bhunaigh mé féin agus an tAire Heydon an Tascfhórsa um Fhoraoisí leagtha ag an nGaoth láithreach tar éis Stoirm Éowyn, a tháinig le chéile faoi dhó le 2 sheachtain anuas. Tá an Tascfhórsa i gceannas ar fhreagairt chomhordaithe a chuimsíonn páirtithe leasmhara ar fud na hearnála chun a chinntiú go ndéantar foraoisí a ndearnadh damáiste stoirme dóibh a bhainistiú go sábháilte agus go cuí. Críochnófar an measúnú íomhánna satailíte tosaigh a rinne mo Roinn agus Coillte go luath agus tabharfaidh léargas cruinn ar scála an damáiste agus beidh mar bhonn ag ár gcéad chéimeanna eile.”

---

Nótaí d’Eagarthóirí