Iarrann an tAire McConalogue ar an gCoimisiún Eorpach níos mó a dhéanamh chun tacaíochtaí iomchuí a chinntiú d'fheirmeoirí
- Foilsithe: 23 Meán Fómhair 2024
- An t-eolas is déanaí: 12 Aibreán 2025
Tháinig an Chomhairle Talmhaíochta agus Iascaigh le chéile inniu sa Bhruiséil, áit a raibh plé ar an Dara Bliain de Chur i bhFeidhm na bPleananna Straitéiseacha CBT ar cheann de na príomhábhair.
Ag labhairt dó ag cruinniú na Comhairle, d'iarr an tAire Talmhaíochta, Bia agus Mara, Charlie McConalogue ar an gCoimisiún Eorpach níos mó a dhéanamh d'fheirmeoirí trí aghaidh a thabhairt ar shaincheisteanna leis an tSamhail Seachadta Nua:
“Caithfimid níos mó a dhéanamh ar fad. D'fháiltigh muid roimh na tograí simplithe d'fheirmeoirí agus anois caithfimid díriú ar an gcastacht riaracháin a bhaineann leis an tSamhail Seachadta Nua a chur i bhfeidhm a laghdú.”
Dúirt an tAire:
“Tá tionchar ag an ualach méadaithe ar obair na riarachán agus ar ár gcumas a bheith uaillmhianach maidir lenár gcuspóirí a bhaint amach, agus maidir leis na tacaíochtaí cuí a sholáthar dár bhfeirmeoirí go tráthúil.”
Ag tagairt dó don phlé ar an Idirphlé Straitéiseach ar thodhchaí thalmhaíocht an AE, dúirt an tAire:
“Fáiltím roimh an aitheantas san Idirphlé ar an ngá atá le hacmhainní cuí chun freagairt go héifeachtach do chuspóirí iomadúla an CBT, i gcomhréir lena chuspóirí sna Conarthaí. Cuirtear fáilte freisin roimh an bhfócas san Idirphlé ar sheasamh na bhfeirmeoirí sa bhiashlabhra a neartú.
Is ionchur tábhachtach é forbairt na tuarascála seo sa phróiseas leis an gcéad CBT eile a fhorbairt, agus déanfar machnamh cuimsitheach ar na moltaí ann. Níl ann, áfach, ach ionchur amháin sa phróiseas chun an chéad CBT eile a fhorbairt.
Bhí mé an-soiléir go bhfuil CBT lánmhaoinithe ríthábhachtach dá thacaíocht rathúil d'fheirmeoirí amach anseo.”
DEIREADH
Nótaí d’Eagarthóirí
Is í an tsamhail seachadta nua (NDM) bunchloch an chomhbheartais talmhaíochta (CBT) nua a tháinig i bhfeidhm an 1 Eanáir 2023. Léiríonn sé aistriú i dtreo fócas láidir ar fheidhmíocht agus ar thorthaí, agus athchothromú freagrachtaí idir tíortha AE agus an Coimisiún, agus an córas dearbhaithe láidir ar chaiteachas CBT á choinneáil ar bun ag an am céanna.
Is é bunús na samhla seachadta nua ná Pleananna Straitéiseacha CBT thíortha an AE agus a gcórais rialachais atá ag feidhmiú go maith. Is é aidhm na bPleananna Straitéiseacha CBT ná go ndéanann tíortha AE a gcuid idirghabhálacha a dhearadh agus a spriocdhíriú chun aghaidh a thabhairt ar riachtanais shonracha, agus cuspóirí ar leibhéal AE á mbaint amach ag an am céanna.
Is comhpháirtíocht é comhbheartas talmhaíochta an AE (CBT) idir an tsochaí agus an talmhaíocht a chinntíonn soláthar seasmhach beatha, a chosnaíonn ioncam na bhfeirmeoirí, a chosnaíonn an timpeallacht agus a choinníonn ceantair thuaithe beo bríomhar. Cuireann tíortha an AE an CBT i bhfeidhm ar leibhéal náisiúnta le Plean Straitéiseach CBT saincheaptha don tréimhse 2023-2027.