Leitheadúlacht mhéadaithe ráigeanna móra de ghalar dubh tuairiscithe ag Saotharlanna Tréidliachta Réigiúnacha

Tá méadú mór tugtha faoi deara ag saotharlanna Tréidliachta Réigiúnacha na Roinne ar a choitianta is atá diagnóisí de ghalar dubh (Clostridium chauvoei) in eallach a atreoraíodh chucu le haghaidh scrúduithe iarbháis, agus roinnt ráigeanna cuibheasacha móra i bhfeirmeacha timpeall na tíre nach bhfuil aon stair acu roimh ré maidir leis an ngalar. Is galar coitianta eallaigh é galar dubh ar fud an domhain, rud a bhíonn ina chúis le géar-dhamáiste do mhatáin. Faigheann an t-ainmhí bás go tobann de ghnáth, nó faigheann siad bás tar éis tinneas nach maireann i bhfad.

Is é is cúis leis an ngalar innilt spór clóistridiam ó ithir, a fhanann faoi shuan i matán go dtí go dtarlaíonn ballbhrú, matáin stróicthe, nó fachtóirí meitibileacha anaithnide áirithe a bhíonn ina gcúis leis na dálaí sna fíocháin áitiúla a ligeann do na spóir péacadh, agus a chothaíonn an galar ansin. Is iondúil go mbíonn na hiarmhairtí marfach. Is minic a fhaightear ainmhithe atá buailte marbh.

Bíodh is nach bhfuil na tosca is cúis leis na ráigeanna móra sin soiléir, tá an cosc thar a bheith simplí, toisc go bhfuil vacsaíní clóistridiam ilfhiúsacha thar a bheith éifeachtach nuair a úsáidtear i gceart iad, le roinnt brandaí agus soláthraithe le roghnú eatarthu.

Tá sé tábhachtach treoracha na monaróirí ar an mbunchúrsa agus ar an gcóras teanndáileoige a leanúint, rud atá simplí le cur i bhfeidhm, ach atá ríthábhachtach chun an éifeachtacht is mó is féidir a áirithiú. Téigh i gcomhairle le do thréidlia chun comhairle shonrach a fháil maidir le diagnóis agus cosc a chur ar ghalar dubh ar d'fheirm.

CRÍOCH