Deimhníonn an tAire Heydon sonraí faoin scéim nua mairteola dár luach €28m d'fheirmeoirí diúil
- Foilsithe: 22 Aibreán 2025
- An t-eolas is déanaí: 23 Aibreán 2025
Osclófar Scéim Leasa Mairteola 2025 d'iarratais go luath i mí Lúnasa
D'fhógair an tAire Talmhaíochta, Bia agus Mara, Martin Heydon TD, inniu go n-osclófar scéim tacaíochta nua don earnáil mairteola diúil go luath i mí Lúnasa. Tá buiséad de €28m ag Scéim Leasa Mairteola 2025 (BWS) agus díreofar ar bhearta praiticiúla chun sláinte agus feirmeoireacht ainmhithe a fheabhsú ar fheirmeacha diúil.
Ag tagairt don fhógra luath, leag an tAire Heydon béim ar an tábhacht a chuireann sé le táirgeadh mairteola diúil a chur chun cinn agus tacaíocht a thabhairt dó.
“Bhí an-éileamh ar Scéim Leasa Mairteola 2024 i measc an spriocdhaonra agus an leithdháileadh buiséid caite go hiomlán agus os cionn 23,000 feirmeoir íoctha as a bheith páirteach inti. Coinníonn scéim fheabhsaithe na bliana seo na bearta céanna ón mbliain seo caite, ach mhéadaigh mé an buiséad iomlán 40% agus d’ardaigh mé an teorainn ar laonna incháilithe ó 40 go 45 lao. Tá roinnt bearta roghnacha breise tugtha isteach agam freisin. Mar thoradh air sin, ardóidh an íocaíocht uasta a fhéadfaidh feirmeoir a fháil ó €2,000 go €3,375 as trí bheart scéime a chur i gcrích i gceart. Is méadú 69% sin ar an uasmhéid iomlán iníoctha.”
Ag dearbhú go n-osclófar an scéim go luath i mí Lúnasa, mar a rinneadh sna blianta roimhe seo, dúirt an tAire go bhfuil na bearta a theastaíonn á bhfógairt aige roimh ré chun cinnteacht agus intuarthacht a thabhairt.
“Mar ab amhlaidh le scéimeanna náisiúnta roimhe seo, is ionann laonna incháilithe agus iad siúd a rugadh do bha diúil incháilithe sa tréimhse ón 1 Iúil 2024 go dtí an 30 Meitheamh 2025. Is éard a bheidh i scéim na bliana seo ná trí bheart a bheidh dírithe ar éifeachtúlacht ar an bhfeirm a fheabhsú: is é sin, beart éigeantach beathaithe mine, beart vacsaínithe roghnach do laonna scoite agus tríú beart roghnach is féidir a bheith ina thástáil uibheacha fhaecach nó ina thástáil sadhlais.”
Mar fhocal scoir, dúirt an tAire Heydon an méid seo a leanas:
“Nuair a chuirtear le chéile le SCEP í, beidh rannpháirtithe in BWS 2025 incháilithe le €225 a fháil in aghaidh na bó/an phéire laonna don chéad 22 péire.”
Nótaí d’Eagarthóirí
C: Cad é nach mór do rannpháirtithe a dhéanamh chun íocaíocht scéime a fháil?
Tá trí bheart sa scéim:
- Beart 1 - Is beart éigeantach é beathú mine sula mbaintear den diúl iad agus ina dhiaidh sin.
- Beart 2 - Is beart roghnach é vacsaíniú nach mór do rannpháirtithe (nó a gcomhairleoirí FAS ag gníomhú thar a gceann) a roghnú ag céim an iarratais.
- Beart 3 - Is bearta roghnacha iad tástáil uibheacha fhaecach nó tástáil sadhlais nach mór a roghnú ag céim an iarratais.
C: Cad é an íocaíocht uasta atá ar fáil do rannpháirtithe a thugann an trí bheart i gcrích mar is ceart?
| Íocaíocht in aghaidh an lao incháilithe | An líon uasta laonna atá incháilithe le haghaidh íocaíochta in aghaidh an rannpháirtí | Íocaíocht uasta in aghaidh an rannpháirtí | |
| Beart 1 – Beathú Mine (Éigeantach) | €35 | 45 | €1,575 |
| Beart 2 – Vacsaíniú (Roghnach) | €15 | 45 | €675 |
| Beart 3 – Tástáil Uibheacha Fhaecach nó Sadhlais (Roghnach) | €25 | 45 | €1,125 |
| Scéim Iomlán | €75 | 45 | €3,375 |
Nóta: Má tharlaíonn sé go mbíonn ró-éileamh ar an scéim, féadfar laghdú ar uaslíon na n-ainmhithe atá incháilithe le haghaidh íocaíochta a chur i bhfeidhm ar bheart amháin nó níos mó.
C: Cén áit ar féidir liom teacht ar níos mó eolais?
Beidh sonraí iomlána agus téarmaí agus coinníollacha na scéime ar fáil ar shuíomh gréasáin na Roinne roimh oscailt na scéime.