“Is dúshlán domhanda é daoine óga a spreagadh le tabhairt faoin talmhaíocht. Táim ag súil go bhfoilseoidh an Coimisiún Eorpach a thograí le haghaidh Comhbheartas Talmhaíochta tar éis 2027 i lár 2025. I bhfianaise an chúlra sin, is tréimhse chuí í seo lena mheas an soláthraíonn an creat atá i bhfeidhm faoi láthair tacaíocht d'fheirmeoirí óga atá ag smaoineamh ar dhul isteach san earnáil agus a spreagann athnuachan ó ghlúin go glúin ar bhonn éifeachtach.

“Tá raon tacaíochtaí níos mó ná riamh curtha i bhfeidhm againn cheana féin d'fheirmeoirí óga, lena n-áirítear tacaíocht do chomhpháirtíochtaí feirme, an Tacaíocht Ioncaim Fhorlíontach d’Fheirmeoirí Óga, rátaí níos airde deontas d'infheistíocht chaipitil ar fheirm, rochtain mhéadaithe ar airgeadas agus faoisimh shuntasacha ó agra-chánachas.

“Is tionscnaimh dhearfacha iad sin, ach tá sé thar am díospóireacht ionraic agus atá go hiomlán oibiachtúil a dhéanamh air seo, lena n-áirítear na tacaíochtaí atá i bhfeidhm, lena mheas an mbíonn an éifeacht inmhianaithe ag na bearta sin, conas is fearr a d'fhéadfaí tacaíochtaí a chumrú chun athnuachan ó ghlúin go glúin a spreagadh, mar shampla trí aistrithe talún agus pleanáil chomharbais.

“Is réimse casta é comharbas feirme agus tá go leor tosca ann a théann i bhfeidhm ar chinntí feirmeoirí. Ní mór dúinn machnamh ceart a dhéanamh air sin agus a mheas an bhfuil aon bhacainn neamhbheartaithe ar iontráil do dhaoine óga faoin gcóras atá i bhfeidhm faoi láthair.

"Agus é seo san áireamh, tá sé i gceist agam grúpa a bhunú a bhfuil an saineolas agus an taithí ábhartha acu chun scrúdú oibiachtúil láidir fianaise-bhunaithe a dhéanamh ar na tosca go léir atá i gceist lena chinntiú go bhfuil bonn a ndearnadh taighde fiúntach ina leith againn leis an úsáid is fearr is féidir a bhaint as na huirlisí beartais atá ar fáil chun daoine óga, arb iad na daoine ar a mairfidh an fheirmeoireacht, a spreagadh le gabháil isteach san earnáil.”

“Táimse tiomanta fós d'earnáil feirme spleodrach inbhuanaithe a fhorbairt in Éirinn. Tá daoine óga agus iontrálaithe nua ríthábhachtach san iarracht sin. Tá sé ar intinn agam athnuachan ó ghlúin go glúin a cheapadh ina ghné lárnach dár n-ullmhúcháin do CBT nua. Ní mór dúinn a chinntiú go dtógfaimid an deis anois le hullmhú i gceart, leis an anailís agus an éirim ar fad is gá chun a chinntiú go mbeidh an creat beartais chomh héifeachtach agus is féidir leis a bheith.”