Fógraíonn an tAire O’Donovan Grúpa Oibre do Chomóradh Dhrom Collachair
-
Ó: An Roinn Turasóireachta, Cultúir, Ealaíon, Gaeltachta, Spóirt agus Meán
- Foilsithe: 19 Márta 2025
- An t-eolas is déanaí: 12 Aibreán 2025
D’fhógair an tAire Ealaíon, Meán, Cumarsáide, Cultúir agus Spóirt, Patrick O’Donovan TD, inniu meitheal oibre a bhunú chun comóradh céad bliain dóiteán phictiúrlann Dhrom Collachair 1926 a phleanáil. Ar an Luan seo caite, an 10 Márta, bhuail an tAire O’Donovan le hionadaithe pobail áitiúla ó Dhrom Collachair, Co. Luimnigh a bhfuil grúpa deonach bunaithe acu chun comóradh a dhéanamh 100 bliain ó dhóiteán phictiúrlainne Dhrom Collachair, inar cailleadh 48 duine go tragóideach. Ag leanúint ar aghaidh ón gcruinniú, tá sé fógartha ag an Aire go mbunódh a Roinn grúpa oibre le rannpháirtíocht áitiúil chun clár imeachtaí comórtha agus bearta a fhorbairt agus a chur i bhfeidhm chun comóradh cuí a dhéanamh ar chomóradh céad bliain ar an imeacht tragóideach seo. Lárnach don chlár beidh imeacht comórtha foirmiúil a reáchtálfar i nDrom Collachair i Meán Fómhair 2026.
Dúirt an tAire O’Donovan:
“Ní dhearna pobal Dhrom Collachair dearmad ar na heachtraí tragóideacha 100 bliain ó shin inar cailleadh an oiread sin dá ngaolta, cairde agus comharsana. Ba mhaith liom moladh a thabhairt do Gerry Keyes agus don ghrúpa deonach áitiúil atá ag obair chomh dian sin le pleanáil a dhéanamh do chomóradh na bliana seo chugainn. Oibreoidh mo Roinn go dlúth le muintir Dhrom Collachair chun a chinntiú go mbeidh clár bríoch, cuí agus measúil againn chun an ócáid seo a chomóradh. Caithfidh an clár seo tionchar na tine i 1926 a aithint agus a bheith fréamhaithe go daingean sa phobal áitiúil a d’iompair tionchar an chaillteanais uafásach.”
Dúirt Gerry Keyes, cathaoirleach an ghrúpa Dromcollogher 26:
“Tá an grúpa Dromcollogher 26 thar a bheith sásta go bhfuil an tAire O’Donovan tar éis dul i ngleic le Tubaiste Pictiúrlann Dhrom Collachair mar thosaíocht, chomh luath i ndiaidh a cheapacháin sa Roinn. Tá an grúpa ag tnúth le bheith ag obair leis an roinn sa ghrúpa oibre nua. Beidh comóradh foirmiúil suntasach i nDrom Collachair i Meán Fómhair 2026 mar sprioc chomhroinnte agus tá sé mar chuid lárnach den chaoi ar mian le Dromcollogher 26 ómós a thabhairt do chuimhne na 48 duine a fuair bás i dtubaiste phictiúrlann Dhrom Collachair.”
Bunóidh an tAire an meitheal oibre sna seachtainí atá romhainn agus fógrófar tuilleadh sonraí faoin gclár comórtha níos déanaí i mbliana.
CRÍOCH