English

Cuardaigh ar fad gov.ie

Preasráitis

Foilsíonn an tAire Jack Chambers treoirlínte uasdátaithe maidir le filleadh sábháilte an lucht féachana ar imeachtaí spóirt

D'fhoilsigh an tAire Jack Chambers treoirlínte uasdátaithe maidir le hathoscailt pháirceanna imeartha inniu. Dhréachtaigh comhghrúpa oibre de shaineolaithe imeachtaí spóirt agus de chomhairleoirí sábháilteachta na treoirlínte seo.

Forálann na treoirlínte do shraith bearta maolaithe chun filleadh sábháilte an lucht féachana ar imeachtaí spóirt a éascú. I measc na mbeart seo tá réamhchumarsáid le lucht freastail, ionaid ag feidhmiú le toilleadh laghdaithe, scaradh sóisialta, caitheamh masc agus sláinteachas láimhe. Beidh córas dian rianaithe teagmhála i bhfeidhm freisin.

Caithfidh lucht freastail cloí le cód iompair agus beidh Plean Sábháilteachta COVID-19 ag gach ionad.

Bainfidh 16 imeacht phíolótacha spóirt úsáid as na treoirlínte seo. Cuideoidh na himeachtaí píolótacha seo le dul chun cinn a mheas agus a athbhreithniú chun imeachtaí breise a fhorbairt agus an acmhainn a mhéadú i mí Iúil agus Lúnasa. I measc na n-imeachtaí píolótacha tá cluichí CLG, Camógaíochta agus Pheil na mBan, cluichí de chuid Shraith na hÉireann, cluichí rugbaí agus spóirt eile cosúil le galf agus lúthchleasaíocht.

Agus na treoirlínte á bhfoilsiú aige, dúirt an tAire Chambers:

“Tá lúcháir orm inniu a bheith in ann na treoirlínte seo a fhoilsiú, treoirlínte a úsáidfear chun ullmhú do 16 imeacht spóirt a óstáil idir seo agus tús mhí Iúil. Ba mhaith liom comhghairdeas a dhéanamh leis an gcomhghrúpa as a gcuid oibre ag cur cáipéis le chéile a bheidh mar threoir thábhachtach dóibh siúd atá ag reáchtáil imeachtaí sábháilte le linn na paindéime. Tá fócas comhchoiteann an ghrúpa oibre ar shábháilteacht a lucht leanúna agus a bpobal le feiceáil go soiléir san obair ar na treoirlínte.

“Tuigim go maith an fonn mór atá ar lucht leanúna a gcontae dúchais, a gclub áitiúil nó a laochra spóirt a fheiceáil i mbun iomaíochta arís. Tá na treoirlínte seo ar chuir saineolaithe le chéile suntasach toisc go léiríonn siad bealach soiléir chun ligean do líon mór lucht féachana freastal ar chluichí arís. Clúdaíonn siad raon ollmhór réimsí ó thicéadú agus teacht ar na tailte, iompar poiblí agus cumarsáid le lucht leanúna, comharthaíocht staide, rianú teagmhála agus go leor gnéithe tábhachtacha eile. Is féidir na treoirlínte a athbhreithniú go leanúnach tar éis gach imeacht píolótach agus sa deireadh réiteoidh siad an bealach do líon i bhfad níos mó daoine freastal ar imeachtaí spóirt agus muid ag dul ar aghaidh go dtí an samhradh agus an fómhar."

Dúirt Martin Murphy ó Staid Aviva, Cathaoirleach an Chomhghrúpa Oibre:

“Bhí nádúr comhoibritheach an ghrúpa oibre a nglacann an FAI, an CLG, an IRFU agus Sport Éireann páirt ann an-soiléir ó chuireamar tús lenár gcuid oibre i mí Dheireadh Fómhair 2020. Táim buíoch de gach ball den fhoireann, de na hAirí Martin agus Chambers as teagmháil a dhéanamh linn agus as glacadh lenár gcuid moltaí agus d’oifigigh na Roinne as a dtreoir. Tá an grúpa oibre tiomanta do mhonatóireacht a dhéanamh ar na himeachtaí agus ár gcur chuige a chur in oiriúint más gá agus muid ag súil le tinreamh níos airde níos déanaí an samhradh seo. Roinnfimid an taithí a fuarthas sa spórt leis an earnáil siamsaíochta agus an tsochaí níos leithne chun a chinntiú gur féidir le pobail ar fud na hÉireann taitneamh sábháilte a bhaint as na spóirt agus na himeachtaí is fearr linn."

Nótaí

Tá na treoirlínte uasdátaithe maidir le filleadh an lucht féachana ar fáíl ANSEO: Guidelines for Reopening Sports Grounds

Achoimre

  • Tá imeachtaí píolótacha riachtanach mar chruthúnas ar choincheap chun bainistíocht shábháilte a dhéanamh ar imeachtaí agus COVID-19 fós á scaipeadh inár bpobail, agus chun measúnú a dhéanamh ar agus chun muinín a thógáil i dtreoir COVID-19 agus i bprótacail do bhainistíocht imeachtaí forbartha ag na hearnálacha cultúir agus spóirt.
  • Tá obair déanta cheana féin ag an earnáil Cultúir agus Spóirt mar ullmhúchán d’imeachtaí trí threoir earnála a fhorbairt chun maolú COVID a chinntiú. Beidh na treoirlínte seo ríthábhachtach chun na himeachtaí píolótacha a reáchtáil go sábháilte.
  • I mí Dheireadh Fómhair 2020 tháinig comhghrúpa oibre ina raibh baill den FAI, an IRFU agus CLG le chéile faoi chathaoirleacht Martin Murphy ó Staid Aviva. Rinneadh ionadaíocht ar fhorais spóirt eile sa ghrúpa oibre seo trí Sport Ireland. Ghlac saineolaithe sláinte agus sábhailteachta páirt sa ghrúpa seo chomh maith. Bheartaigh an grúpa oibre treoirlínte in 2020 atá athbhreithnithe anois. Dearadh na prótacail seo le go n-úsáidfidh lucht eagraithe imeachtaí iad.
  • Cuireann na bearta a mholtar sna treoirlínte iliomad sraitheanna cosanta ar fáil agus ní bheidh tástáil scagtha don víreas ina riachtanas éigeantach. Beidh rianú teagmhála ceangailte le gach ticéad, a choimeádfar ar feadh 28 lá, chun cur ar ár gcumas cabhrú le FSS má tá cás nasctha leis an ócáid. Tá sé mar aidhm againn é a dhéanamh i gceart agus oideachas agus oiliúint a chur ar bhaill foirne agus ar mhaoir. Tá sé ar intinn againn tosú le himeachtaí a bhfuil tinreamh agus riosca íseal acu.
  • Níos déanaí sa samhradh de réir mar a dhéantar vacsaíniú ar níos mó daoine d’fhéadfadh go mbeadh scóip ann an tinreamh a mhéadú.
  • Beidh an phríomhfhreagracht ar lucht eagraithe imeachtaí agus rachaidh siad i dteagmháil leis na hÚdaráis Áitiúla, le soláthróirí iompair phoiblí, leis na Gardaí Síochána agus daoine eile.
  • Beidh cumarsáid shaincheaptha ag na heagraíochtaí le lucht leanúna i bhfianaise nádúr na n-imeachtaí agus an difríocht idir na himeachtaí trialach agus na himeachtaí a mbíonn lucht féachana i dtaithí orthu.
  • Beidh ar bhaill den lucht leanúna maisc a chaitheamh le linn na n-imeachtaí, beidh siad ina suí agus scartha go sóisialta ó bhaill eile den lucht leanúna. Beidh ticéad ag teastáil ó gach duine sa lucht féachana a dhéanfaidh taifead ar a n-ainm ar eagla go mbeadh rianú teagmhála de dhíth tar éis na hócáide. Tá cosaintí sonraí mar chuid den phróiseas sin.
  • Ní bheidh bia agus deochanna ar fáil do na himeachtaí trialach. Ceapfar cód iompair do lucht leanúna do gach imeacht agus beifear ag súil le dearbhuithe sláinte ó gach duine a bheidh i láthair. Beidh amanna iontrála agaithe le go mbeidh daoine sa lucht leanúna in ann tréchur go sábháilte agus go héifeachtach.
  • D'oibrigh na heagraíochtaí lena gcomhpháirtithe ticéadaithe chun a chinntiú go mbeidh córas rianaithe dhian i bhfeidhm agus tá an córas seo ag feidhmiú cheana féin agus deimhnithe lasmuigh d’Éirinn (sa Ríocht Aontaithe).

Aguisín 1 - Liosta tosaigh imeachtaí spóirt trialach

# Dáta Ionad Imeacht
1 11 Meitheamh, Oíche Dé hAoine RDS Cúige Laighean vs. Na Dragain
2 11 Meitheamh, Oíche Dé hAoine Staid Thamhlachta Ruagairí na Seamróige v Cláirseacha na Finne
3 11 Meitheamh, Oíche Dé hAoine Crois na Tornóra Cathair Chorcaí v Cábán tSíle
4 20 Meitheamh, Dé Domhnaigh Páirc an Chrócaigh Cluichí Ceannais an tSraith Náisiúnta
5 18-20 Meitheamh Le deimhniú Cluiche Ceannais Phíolótaigh Shraith Peile Náisiúnta CLG na bhFear má sceidealaítear é
6 25 Meitheamh, Oíche Dé hAoine Staid Thamhlachta Ruagairí na Seamróige v Droichead Átha
7 16 Meitheamh, Dé Sathairn Staid Morton, Seantrabh Craobh Náisiúnta Lúthchleasaíocht Éireann
8 26 Meitheamh, Dé Sathairn Páirc an Chrócaigh Roinn 1 agus 2 de Chluichí Ceannais Pheil na mBan
9 26 Meitheamh, Dé Sathairn Páirc na Tulchann Shelbourne v Corcaigh
10 1 Iúil, Déardaoin - Dé Domhnaigh Mount Juliet, Cill Chainnigh Craobh Oscailte na hÉireann (Turas na hEorpa) (scaipthe ar fud an chúrsa ach gan suíocháin)
11 2 Meitheamh, Oíche Dé hAoine Staid Thamhlachta Ruagairí na Seamróige v Dún Dealgan
12 3 Iúil, Dé Sathairn Staid Aviva Éire v An tSeapáin
13 3 Iúil, Dé Sathairn Staid Semple – Dúrlas Éile Cluiche Leathcheannais Iománaíochta CLG Mumhan – Corcaigh v Luimneach
14 4 Iúil, Dé Domhnaigh Páirc de hÍde Craobh Peile CLG Chonnacht – Ros Comáin v Gaillimh
15 10 Iúil, Dé Sathairn Staid Aviva Éire v Stáit Aontaithe Mheiriceá
16 Deireadh mhí an Mheithimh An Currach Imeacht Rásaíochta Capall - lá amháin de shraith

Cuid den

Polasaí