“Díreofar an €4 milliún, an maoiniú is mó riamh, atá á chur ar fáil ag an rialtas do mhná sa spórt i mbliana, ar rannpháirtíocht mhéadaithe ó mhná agus cailíní a chur chun cinn ag gach leibhéal den spórt. Tá an rialtas agus Spórt Éireann tiomanta fós do réidh a fháil leis an mbearna rannpháirtíochta sa spórt idir na hinscní. Léiríodh i dTuarascáil 2023 de chuid Mhonatóir Spórt Éireann go bhfuil an bearna faoi 3% den gcéad uair riamh. Leis an maoiniú a fógraíodh inniu, tacófar le heagraíochtaí spóirt agus iad ag cur cláir i bhfeidhm chun rannpháirtíocht na mban a mhéadú ina spóirt agus cabhrófar linn agus muid ag iarraidh ár n-aidhm i leith rannpháirtíocht chomhionann a bhaint amach faoi 2027.”

“Tá fíorathruithe fiúntacha ag tarlú de bharr an maoiniú is mó riamh a chuir an rialtas ar fáil chun tacú le rannpháirtíocht na mban agus na gcailíní sa spórt. Feicimid anois go bhfuil an bearna rannpháirtíochta sa spórt idir na hinscní ag a leibhéal is ísle riamh agus léirítear leis an maoiniú is mó riamh a leithdháil an rialtas don gClár um Mná sa Spórt go bhfuilimid tiomanta do réidh a fháil leis an mbearna rannpháirtíochta seo. Gheobhaidh 45 foras spóirt ar fud na tire maoiniú de €2 milliún faoin gClár um Mná sa Spórt agus cuirfear €1 milliún eile i leataobh don bpeil, na cluichí Gaelacha agus rugbaí. Leis an maoiniú suntasach seo cuirfear feabhas ar chláir um Mná sa Spórt reatha agus tacófar le tionscnaimh spreagúla nua a chruthú thar réimsí cosúil le rannpháirtíocht ghníomhach, cóitseáil, réiteoireacht agus ceannaireacht.”

“Is nuacht iontach í fáilte a chur roimh an infheistíocht is mó riamh faoin gClár um Mná sa Spórt in 2024. Tá sé mar aidhm againn níos mó ban a bheith páirteach sa spórt agus cinnte a dhéanamh go bhfuil an deis chéanna acu a bheith rathúil sa spórt. Cabhróidh an tacaíocht mhaoinithe mhéadaithe seo leis an méid atá bainte amach againn go dtí seo leis an gclár MSS.”

“Is gné lárnach d’obair Spórt Éireann é Mná sa Spórt a chur chun cinn. Ó bhí 2005 ann, tá infheistiocht déanta ag an gClár um Mná sa Spórt de chuid Spórt Éireann i raon leathan tionscnamh arna dtabhairt i gcrích ag CNRanna, Comhpháirtíochtaí Áitiúla Spóirt, agus forais mhaoinithe chun comhionannas inscne sa spórt a chur chun cinn. Tá treoirphlean á chur ar fáil faoin mBeartas um Mná sa Spórt de chuid Spórt Éireann maidir leis an obair atá de dhíth i leith ban sa spórt. Tá ceithre phríomhréimse sprice an Bheartais (Cóitseáil & Réiteoireacht; Rannpháirtíocht Ghníomhach; Ceannaireacht & Rialachas; agus Infheictheacht) fós ina bpríomhábhair agus tá maoiniú leithdháilte ar na CNRanna chun cláir nó tionscnaimh a fhorbairt lena dtacófar leis na réimsí sprice seo.”