Ráiteas ón Aire Patrick O’Donovan maidir le Tuarascáil Bhliantúil agus Ráitis Airgeadais 2023 na Comhairle Ealaíon agus an Tuarascáil ar an Imscrúdú ar Thionscadal um Chlaochlú Gnó na Comhairle Ealaíon

Ráiteas ón Aire Patrick O’Donovan maidir le Tuarascáil Bhliantúil agus Ráitis Airgeadais 2023 na Comhairle Ealaíon agus an Tuarascáil ar an Imscrúdú ar Thionscadal um Chlaochlú Gnó na Comhairle Ealaíon

Cuireadh Tuarascáil Bhliantúil 2023 agus Ráitis Airgeadais na Comhairle Ealaíon faoi bhráid mo Roinne an samhradh seo caite agus díríodh ar m’aird nuair a chuaigh mé i mbun oifige coicís ó shin. Sa tuarascáil bhliantúil tá sonraí ar thionscadal forbartha córais TF nár éirigh leis ag an gComhairle Ealaíon. I measc na gcuntas tá tuarascáil an Ard-Reachtaire Cuntas agus Ciste, a thugann faoi deara caillteanas foriomlán luacha i leith an tionscadail sin measta de €5.3 milliún, suas go dtí Meitheamh 2024. Is é costas iomlán an tionscadail go dtí seo ná €6.675m.

I bhfianaise na bhforbairtí seo, chuir Ard-Rúnaí mo Roinne tús le himscrúdú ar thionscadal na Comhairle Ealaíon anuraidh. Críochnaíodh an t-imscrúdú seo an tseachtain seo caite agus tá roinnt príomhthorthaí agus 36 moladh ann. Fuarthas amach nach raibh an Chomhairle Ealaíon ullmhaithe do scála an tionscadail agus nár chuir sí acmhainní imleor i bhfeidhm chun é a sheachadadh. Fuarthas amach san imscrúdú freisin go raibh socruithe maoirseachta, monatóireachta agus tuairiscithe na Roinne neamhleor thar shaolré an tionscadail.

Ina theannta sin, d’iarr mo Roinn soiléirithe i mí Lúnasa 2024 faoin gcreat tuairiscithe airgeadais agus cóireálacha cuntasaíochta faoina ndéanann sí grinnscrúdú ar thuarascálacha agus ar chuntais bhliantúla. Fuarthas freagraí ar na ceisteanna seo ón gComhairle Ealaíon go déanach i mí Dheireadh Fómhair 2024.

Chuir mé tuarascáil agus cuntais na Comhairle Ealaíon faoi bhráid an Rialtais inniu. Bhuail mé le Cathaoirleach agus le Stiúrthóir na Comhairle Ealaíon an tseachtain seo caite chun an imní mhór atá orm maidir le gach gné den tionscadal a chur in iúl. Tá an Chomhairle Ealaíon tiomanta do na moltaí atá sa scrúdú a chur i bhfeidhm. Tá raon gníomhartha curtha i bhfeidhm ag mo Roinnse chun dul i ngleic leis na heasnaimh sa mhaoirseacht a leagadh béim orthu sa scrúdú.

Ní mór aghaidh a thabhairt go tapa ar na teipeanna rialachais a eascraíonn as an tionscadal seo chun maoiniú poiblí a chosaint agus chun cosc a chur ar atarlú na saincheisteanna seo. Tá an Tuarascáil Bhliantúil agus na Ráitis Airgeadais leagtha faoi bhráid Thithe an Oireachtais agus foilsithe ar shuíomh gréasáin na Comhairle Ealaíon anseo. Is féidir cóip den imscrúdú a fháil ar shuíomh gréasáin na Roinne anseo.

Cé go leagtar amach go soiléir sa tuarascáil ar an scrúdú cúlra an tionscadail, díríonn sé freisin ar raon níos leithne ceisteanna níos bunúsaí faoi rialachas agus cultúr laistigh den Chomhairle Ealaíon maidir le cibé an léiríonn an creat rialachais chorparáidigh dea-chleachtas rialachais do Chomhlachtaí Stáit mar atá leagtha amach sa Chód Cleachtais um Rialachas Comhlachtaí Stáit agus an gcomhlíonann sé forálacha na reachtaíochta ábhartha uile, an Cód Caiteachais Phoiblí san áireamh. Teastaíonn dearbhú freisin go bhfuil cultúr na Comhairle Ealaíon, ag gach leibhéal, oscailte agus trédhearcach agus go dtéann sí i dteagmháil le gach páirtí leasmhar, inmheánach agus seachtrach, ar bhealach a oireann dá sainchúram reachtúil chun na healaíona a fhorbairt.

Tá méadú 75% tagtha ar mhaoiniú na Comhairle Ealaíon le blianta beaga anuas go €140m in 2025. Is infheistíocht an-suntasach é seo ón Rialtas thar ceann an cháiníocóra chun tacú le healaíontóirí agus forbairt na n-ealaíon in Éirinn. Tá sé ríthábhachtach go mbeidh muinín ag na geallsealbhóirí go léir go bhfuil na hacmhainní sin á n-úsáid go cuí, go léiríonn oibríochtaí na Comhairle Ealaíon dea-chleachtas agus go bhfuil dramhaíl á seachaint. Ba mhaith liom féachaint ar na ceisteanna seo mar ábhar práinne agus dá réir sin tá treoir tugtha agam do mo Roinn tús a chur le hathbhreithniú seachtrach ar rialachas agus cultúr ag an gComhairle Ealaíon. Clúdóidh an t-athbhreithniú ní amháin tionscadail chaipitil ach gach gníomhaíocht agus caiteachas faoi shainchúram na Comhairle Ealaíon agus cuirfear tús leis go luath.

CRÍOCH