Foilsiú
Céad Chomhdháil Dlí Phoiblí Oifig an Ard-Aighne agus Oifig an Phríomh-Aturnae Stáit
Foilsithe
An t-eolas is déanaí
Thionóil Oifig an Ard-Aighne a céad “Comhdháil Dlí Phoiblí Oifig an Ard-Aighne agus Oifig an Phríomh-Aturnae Stáit”, arna hóstáil ag an Ard-Aighne Rossa Fanning AS, agus ag an bPríomh-Aturnae Stáit, Maria Browne, san Ionad Comhdhála, Baile Átha Cliath Dé hAoine an 11 Deireadh Fómhair 2024. Tugadh níos mó ná 500 páirtí leasmhar agus saineolaí ábhartha le chéile ag an gComhdháil, Ard-Aighne Thuaisceart Éireann, an Bhantiarna Brenda King, comhaltaí mór le rá de Bhreithiúna Uaschúirteanna na hÉireann, na scórtha Abhcóide Stáit, ó Bharra na Sinsear agus ó Bharra na Sóisear araon, agus príomhionadaithe ó Ranna Rialtais cliant ina measc. Bhí cohóirt mhóra ó Oifig an Ard-Aighne, Sráid Mhuirfean (“OAA”) (a áiríonn Oifig na nDréachtóirí Parlaiminte don Rialtas (“ODP”)) agus ó Oifig an Phríomh-Aturnae Stáit (“OPAS”) araon in éineacht leis na grúpaí sin freisin.
An tArd-Aighne a chuir tús leis an gComhdháil agus chuir sé fáilte roimh an lucht freastail agus labhair sé go paiseanta faoin ról tábhachtach atá ag na hoifigigh dhlí sa chóras rialachais a bunaíodh faoi Bhunreacht na hÉireann.
Chuir sé in iúl go láidir gur a bhuíochas dóibh siúd atá ag obair in Oifig an Ard-Aighne agus in Oifig an Phríomh-Aturnae Stáit, in éineacht le hoifigigh i Ranna Rialtais, a bhfuil reachtaíocht an Rialtais dréachtaithe, a bhfuil a dhlíthíocht á bainistiú agus a bhfuil freagra tugtha ar a cheisteanna dlí. Dúirt sé an méid seo a leanas:
“An bhfuil aon bhealach eile níos fearr ann chun aird a tharraingt ar shaineolas agus ar ról lárnach ár n-oifigí i réimse an dlí phoiblí seachas comhdháil ar an ábhar a óstáil?”
Tar éis an fháilte sin, chuir an Breitheamh Onórach Gerard Hogan tús le himeachtaí i gceart, agus chuir sé príomhpháipéar faoi bhráid ina dtugtar aghaidh ar threochtaí áirithe san athchóiriú bunreachtúil, dar teideal “Four score and seven years of the Constitution: A new birth of freedom”. In éineacht leis an mBreitheamh Onórach Hogan le linn an tseisiúin seo bhí na pléitheoirí seo a leanas: an tOllamh Eoin Carolan AS, Ollamh le Dlí agus Stiúrthóir an Ionaid um Staidéar Bunreachtúil sa Choláiste Ollscoile, Baile Átha Cliath, agus an tOllamh Aileen Kavanagh, Ollamh le Rialachas Bunreachtúil agus Dlí i gColáiste na Tríonóide, Baile Átha Cliath, chomh maith le June Reardon, Príomh-Dhréachtóir Parlaiminte an Rialtais, a rinne maoirseacht ar dhréachtú leasuithe bunreachtúla agus a raibh baint aici leo. Rinne Úna McEvoy, Abhcóide Comhairleach sinsearach in Oifig an Ard-Aighne, maoirseacht agus modhnóireacht ar an bplé a lean, a bhí bríomhar go minic, maidir le treo agus inmhianaitheacht cineálacha áirithe athchóirithe ar an mBunreacht.
I dara seisiún an tráthnóna, chuir an Breitheamh Suzanne Kingston ó Chúirt Ghinearálta an Aontais Eorpaigh agus an tOllamh Conor Gearty ó Scoil Eacnamaíochta Londan páipéir i láthair ar an ábhar “EU/ECHR Influencer vs Common Law Traditionalist – Team-mates or Rivals?” Páirteach freisin san idirphlé sin ar na buanna agus na modhanna trína n-idirghníomhaíonn dlí an AE agus an CECD le córas dlí choitinn na hÉireann, bhí David Kelly, Abhcóide Comhairleach sinsearach in Oifig an Ard-Aighne, agus bhí Ciara Murphy, Príomh-Aturnae Stáit Cúnta in Oifig an Phríomh-Aturnae Stáit ina cathaoirleach air.
Chuir an Príomh-Aturnae Stáit Maria Browne clabhsúr leis an gComhdháil, agus ghabh sí buíochas leis na rannpháirtithe as a gcuid tuairimí agus smaointe a roinnt, agus leag sí béim ar luach criticiúil agus ar fhóntas obair Oifig an Phríomh-Aturnae Stáit agus Oifig an Ard-Aighne i réimse an dlí phoiblí.
Bhí fáiltiú líonraithe ann i ndiaidh na Comhdhála.
Ba í an Chomhdháil an chéad uair ag Oifig an Ard-Aighne, lena n-áirítear Oifig an Phríomh-Aturnae Stáit, imeacht den mhéid agus den uaillmhian sin a reáchtáil. Táthar ag súil, áfach, gur ócáid bhliantúil a bheidh san imeacht i bhféilire dlí na hÉireann, agus go mbeidh sí ina príomhfhóram do dhíospóireacht agus dioscúrsa dlí phoiblí in am trátha.
AGO and CSSO Conference 2024
Papers
Íosluchtaigh nasc le haghaidh
Íoslódáil
féachaint ar an gcomhad
Amharc
Íomha: Panel at conference
Íomha: Attorney General Rossa Fanning SC
Íomha: Chief State Solicitor Maria Browne
Íomha: June Reardon, Chief Parliamentary Counsel to the Government
Íomha: Mr Justice Gerard Hogan
Íomha: Professor Eoin Carolan SC
Íomha: Professor Conor Gearty
Íomha: Professor Aileen Kavanagh
Íomha: Judge Suzanne Kingston