Foilsiú
Maoirseacht á déanamh ag príomhoide na scoile ar an bpróiseas ailínithe Céim 3
Foilsithe
An t-eolas is déanaí
Is é an tríú céim scoilbhunaithe maidir le soláthar marcanna ná maoirseacht á déanamh ag príomhoide na scoile ar an bpróiseas ailínithe. Ag teacht le prionsabail na cothroime, an chothromais agus na hoibiachtúlachta, tacaíonn an príomhoide leis na múinteoirí i gcéim an ullmhúcháin den phróiseas ailínithe ábhair agus déanann sé/sí athbhreithniú ar an bpróiseas a cuireadh i bhfeidhm maidir le bailiú fianaise lena dhearbhú go gcaitear go cothrom le scoláirí aonair agus go gcuirtear caighdeán aonfhoirmeach i bhfeidhm laistigh den scoil agus i suíomhanna ina bhfuil breis agus rang-ghrúpa amháin istigh ar ábhar. I dtaca leis sin, cinnteoidh an príomhoide go bhfuil caighdeáin chomhchosúla á gcur i bhfeidhm ag múinteoirí éagsúla an ábhair chéanna laistigh den scoil.
Sa chéim sin den phróiseas, déanann an príomhoide na nithe seo a leanas:
- Tugann sé/sí tacaíocht do mhúinteoirí sa chéim ullmhúcháin tosaigh ag leibhéal scoile uile, lena n-áirítear aird na múinteoirí a dhíriú ar na doiciméid treorach agus ar an bhfíseán/ar na físeáin teagaisc a sholáthraítear chun cuidiú leis an bpróiseas
- Soláthraíonn sé/sí na sonraí iomchuí go léir do gach roinn ábhair chun tacú leis an bpróiseas ailínithe
- Déanann sé/sí athbhreithniú ar na tacair sonraí a chuireann na grúpaí ailínithe ábhair faoina b(h)ráid
- Deimhníonn sé/sí cothroime na bpróiseas dó/di féin suas go dtí an pointe sin
- Nuair is cosúil gur tharla aimhrialtacht nó earráid, cuireann sé/sí tacar sonraí ar ais chuig an ngrúpa ailínithe ábhair i gcomhair tuilleadh athbhreithnithe. I gcásanna den chineál sin, níl aon ról ag an bpríomhoide maidir le hathrú a dhéanamh ar mharc measta an scoláire; is é an ról atá aige/aici na marcanna a ceistíodh a chur ar ais chuig an ngrúpa ailínithe ábhair i gcomhair tuilleadh athbhreithnithe.
Féadfaidh príomhoide na tacair sonraí a chur ar ais chuig an ngrúpa ailínithe ábhair i gcomhair tuilleadh athbhreithnithe má mheasann sé/sí le réasún go bhféadfadh feidhm a bheith ag ceann amháin nó níos mó de na forais seo a leanas:
- Bhí fabht nóis imeachta sa phróiseas suas go dtí an pointe sin
- Bhí neamhréireachtaí gan mhíniú sna tacair sonraí a cuireadh isteach tar éis na céime ailínithe ábhair
- Tá fianaise láidir ann nach bhfuil marc measta an scoláire ag teacht le heolas na scoile ar ghnóthachtáil an scoláire ó réimse foinsí (Féach Cuid 6.1. thuas).
- Tá fianaise ann go bhfuil easpa oibiachtúlachta (i.e. claontacht, idirdhealú) sna nósanna imeachta mar a cuireadh i bhfeidhm iad.
I gcásanna ina gcuireann an príomhoide na tacair sonraí ar ais chuig an ngrúpa ailínithe ábhair chun iad a bhreithniú tuilleadh, léiríonn an príomhoide an chúis/na cúiseanna/na forais shonraithe chun na sonraí a chur ar ais. Tá na forais shonraithe teoranta do cheann amháin nó níos mó de na forais thuas. Déanfaidh an grúpa an foras sonraithe/na forais shonraithe a bhreithniú, déanfaidh sé aon choigeartuithe atá riachtanach, más ann dóibh, agus cuirfidh sé a bhreithniú deiridh ar ais chuig an bpríomhoide.
Nuair atá an próiseas um athbhreithniú a dhéanamh ar na sonraí críochaithe agus nuair atá an príomhoide sásta go bhfuil an próiseas ailínithe agus, más infheidhme, an t-athbhreithniú curtha i gcrích de mheon macánta, cuirfidh sé/sí a (h)ainm leis ag dearbhú gur cuireadh an próiseas i gcrích i gcomhréir leis an treoir atá foilsithe.
