Oifig na nDréachtóirí Parlaiminte don Rialtas

Déanann Oifig na nDréachtóirí Parlaiminte don Rialtas (“an ODP”) seirbhís ghairmiúil dréachtaithe reachtaíochta a sholáthar don Rialtas. Misean an ODP is ea Billí a dhréachtú thar ceann an Rialtais, mar aon le hionstraimí reachtúla a dhréachtú thar ceann an Rialtais agus Airí Rialtais, de réir ardchaighdeáin i gcónaí. Is san Oireachtas a dhéantar Billí a achtú agus is féidir tuilleadh faisnéise maidir leis an bpróiseas reachtach a fháil ag Tithe an Oireachtais – An chaoi a ndéantar dlíthe.

Déanann saindlíodóirí san ODP (ar a dtugtar Dréachtóirí Parlaiminte) reachtaíocht phríomha (Billí Rialtais) agus roinnt reachtaíochta tánaistí (ionstraimí reachtúla, lena n-áirítear rialacháin agus orduithe Rialtais) a bhfuil castacht agus práinn éagsúil ag baint leo a dhréachtú chun éifeacht a thabhairt do bheartas an Rialtais agus do reachtaíocht an AE i ndlí na hÉireann.

Chomh maith leis sin, tá freagracht ar an ODP freisin as leasuithe an Rialtais ar Bhillí (lena n-airítear Billí Comhaltaí Príobháideacha) a dhréachtú ag Céim an Choiste agus Céim na Tuarascála de dhul chun cinn Bille trí Thithe an Oireachtais.

Trí obair an ODP, cuirtear ar chumas an Rialtais a Chlár Reachtaíochta a chur i bhfeidhm. Oibríonn an ODP i ndlúthchomhar le Coiste Reachtaíochta an Rialtais i ndáil le Bille dá dtugann an Rialtas tosaíocht.

Is é an Príomh-Dhréachtóir Parlaiminte atá i gceannas ar an ODP agus tá sí roinnte ina ceithre ghrúpa dréachtaithe. Tá freagracht ar gach aon ghrúpa as seirbhísí dréachtaithe a chur ar fáil do líon sonrach Ranna de chuid an Rialtais agus ar a ndéanann Dréachtóir Parlaiminte bainistiú agus a dhéanann an obair laistigh den Ghrúpa a leithdháileadh mar aon le faireachán a dhéanamh ar an obair sin.

Cuirtear oiliúint ardleibhéil ar Dhréachtóirí Parlaiminte sa disciplín maidir le reachtaíocht a dhréachtú le go gcuirfí an córas dlí níos leithne san áireamh agus le go mbeadh sé soiléir agus éifeachtach, de bhreis ar éifeacht reachtach a thabhairt do bheartas an Rialtais agus í a bheith iontaofa ó thaobh an Bhunreachta de.

Ceapadh an chéad Dréachtóir Parlaiminte, Arthur Matheson, sular bunaíodh Saorstát Éireann sa bhliain 1922 agus d’oibrigh sé le hOifigeach Dlí Rialtas Sealadach na hÉireann. Nuair a d’éirigh Oifigeach Dlí Rialtas Sealadach na hÉireann ina Ard-Aighne, fágadh Oifig an Dréachtóra Pharlaimintigh faoina chúram. I mí Meán Fómhair na bliana 2000, athraíodh ainm na hoifige ó Oifig an Dréachtóra Pharlaimintigh go Oifig na nDréachtóirí Parlaiminte don Rialtas.

Tá Príomh-Aoire an Rialtais ina chathaoirleach ar Choiste Reachtaíochta an Rialtais (CRR) agus i measc na gcomhaltaí atá ann tá an tArd-Aighne, an Príomh-Dhréachtóir Parlaiminte, Bainisteoirí Cláir na bpríomhpháirtithe sa Rialtas, Ceannaire Sheanad Éireann agus ionadaithe ó Roinn an Taoisigh agus ó ODP.

Oibríonn an ODP go dlúth leis an CRR lena chinntiú go gcuirtear Clár Reachtaíochta an Rialtais i bhfeidhm. Is í feidhm an CRR cabhrú leis an Rialtas tosaíochtaí reachtacha a réiteach don seisiún parlaiminte reatha agus maoirseacht a dhéanamh ar chur i gcrích Chlár Reachtaíochta an Rialtais.

Sula dtosaíonn gach seisiún Dála foilsíonn an Rialtas a thosaíochtaí reachtacha don seisiún sin. Tá baint ag an CRR le foilsiú na dtosaíochtaí reachtacha a ullmhú. Braitheann an clár oibre a bhíonn ag an ODP don seisiún Dála atá i gceist ar na tosaíochtaí reachtacha atá leagtha amach san fhoilseachán.

Is éard atá i gceist le ról na nDréachtóirí Parlaiminte ná:

• treoracha a fháil ó Ranna Rialtais maidir le reachtaíocht a dhréachtú agus anailís a dhéanamh ar na treoracha sin;
• na treoracha sin a phlé agus a shoiléiriú leis na hoifigigh Roinne lena mbaineann;
• na treoracha sin a phlé le hAbhcóidí Comhairleacha in Oifig an Ard-Aighne, agus leis an Ard-Aighne, agus aon saincheisteanna dlí a thagann chun cinn a aithint agus comhairle dlí a fháil nuair is gá;
• reachtaíocht a dhréachtú chun éifeacht a thabhairt do na treoracha sin;
• dul chun cinn a thuairisciú maidir le hobair dhréachtaithe ar tugadh fúithi.

D’fhéadfadh sé go mbainfeadh obair na nDréachtóirí Parlaiminte le réimse leathan ábhair agus réimsí den dlí, lena n-áirítear:

• reachtaíocht a bhaineann le hábhair shuntasacha dlí, bunreachtúla nó coiriúla;
• reachtaíocht lena mbaineann tábhacht mhór pholaitíochta;
• reachtaíocht rialála agus theicniúil
• reachtaíocht airgeadais;
• reachtaíocht lena dtugtar éifeacht do dhlí idirnáisiúnta agus oibleagáidí AE.