Saoráil Faisnéise

Tugann an tAcht um Shaoráil Faisnéise (SF), 2014, trí cheart dhlíthiúla dóibh siúd atá ag lorg rochtain ar fhaisnéis atá i seilbh comhlachtaí poiblí atá cumhdaithe ag an Acht:

• an ceart rochtain a fháil ar thaifid oifigiúla a cruthaíodh tar éis an 21 Aibreán 1998 atá i seilbh ranna rialtais nó comhlachtaí poiblí eile atá faoi réir an Achta
• an ceart go gceartófaí nó go nuashonrófaí sonraí pearsanta ar thaifid oifigiúla sa chás go bhfuil an fhaisnéis sin neamhiomlán, mícheart nó míthreorach
• an ceart go dtabharfaí dóibh cúiseanna leis na cinntí a dhéanann comhlachtaí poiblí a dhéanann difear don iarrthóir

Tá na taifid seo a leanas clúdaithe faoin Acht um Shaoráil Faisnéise:

• gach taifead a bhaineann le faisnéis phearsanta iarrthóirí, is cuma cén uair a cruthaíodh iad
• gach taifead eile a cruthaíodh ó thosach feidhme an Achta um Shaoráil Faisnéise (21 Aibreán 1998)
• aon taifid atá riachtanach chun taifid reatha a thuiscint, fiú má cruthaíodh roimh an 21 Aibreán 1998 iad

Féadfar aon taifid atá i seilbh na hOifige seo a thagann faoi na catagóirí sin a iarraidh faoin Acht. Mar sin féin, chun go mbeidh comhlachtaí poiblí in ann a ngnó a dhéanamh i gceart agus chun cearta tríú páirtithe a chosaint, tá taifid áirithe díolmhaithe ó eisiúint faoin Acht.

Cé acu a chuirfear díolúine i bhfeidhm nó nach gcuirfear, braitheann sé sin in go leor cásanna ar cibé acu is fearr a dhéanfaí freastal ar leas an phobail tríd an bhfaisnéis a eisiúint nó a choinneáil.ess

Níl aon táille iarratais ann le haghaidh iarrataí. D’fhéadfaí táillí a ghearradh as an am a chaitear ag aisghabháil taifead agus cuirfear na táillí sin in iúl más infheidhme.

Ní mór iarratas ar fhaisnéis faoin Acht um Shaoráil Faisnéise a dhéanamh i scríbhinn agus ba cheart go léireofaí ann go bhfuil an fhaisnéis á lorg faoin Acht um Shaoráil Faisnéise. Ba cheart go mbeadh an t-iarratas soiléir go leor freisin le go mbeimid in ann na taifid atá á lorg a shainaithint. Mura bhfuil sé soiléir dúinn maidir leis na taifid atá á lorg, déanfaimid teagmháil leat chun soiléiriú a lorg.

Ba cheart iarratais a dhéantar trí úsáid a bhaint as an bhFoirm Iarratais atá i gceangal leis seo a sheoladh chuig:

Aonad Saorála Faisnéise

Seoladh:

Sráid Jonathan Swift, Baile Átha Troim, an Mhí, C15 NX36

Ríomhphost:

foiunit@opw.ie

Le haghaidh fiosrúcháin teileafóin nó cúnaimh maidir le hiarratas a dhéanamh, déan teagmháil le Mary Bagnall ag 046 942 2161.

Cuireann Scéim Foilsitheoireachta SF de chuid OPW faisnéis ar fáil maidir le hiarratais SF a fhaightear.

Mura bhfuil tú sásta le cinneadh na hOifige seo maidir le hiarratas SF, is féidir leat athbhreithniú inmheánach ar an gcinneadh a lorg. Is éard is athbhreithniú inmheánach ann ná athmhachnamh iomlán ar d’iarratas arna dhéanamh ag ball foirne sinsearach san Oifig. Ba cheart iarratais ar athbhreithniú inmheánach a dhéanamh i scríbhinn chuig foiunit@opw.ie.

Tá táille iarratais €30 (€10 do shealbhóirí Cárta Leighis) ann chun athbhreithniú inmheánach a dhéanamh ar iarratais SF. Níl aon táille ann i gcás athbhreithniú inmheánach ar chinneadh a bhaineann le faisnéis phearsanta iarrthóra ná i gcás cinneadh táillí a ghearradh.

Mura bhfuil tú sásta leis an gcinneadh a rinne an t-athbhreithneoir inmheánach, tá sé de cheart agat achomharc a dhéanamh chuig an gCoimisinéir Faisnéise. Seo a leanas a shonraí teagmhála:

Coimisinéir Faisnéise

Seoladh:

6 Ardán Phort an Iarla, Baile Átha Cliath 2, D02 W773

Ríomhphost:

info@oic.ie

Uimhir fóin:

+353-1-639 5689

Gearrtar táille €50 (€15 do shealbhóirí Cárta Leighis) ar iarratas ar athbhreithniú chuig an gCoimisinéir Faisnéise. Níl aon táille iarratais ann i gcás athbhreithniú i ndáil le faisnéis phearsanta ná i gcás cinneadh táillí a ghearradh.