Bígí linn ag Ceiliúradh na Gaeilge agus Cultúr na Gaeilge ag láithreacha Oifig na nOibreacha Poiblí le linn Sheachtain na Gaeilge
- Foilsithe: 24 Feabhra 2025
- An t-eolas is déanaí: 12 Aibreán 2025
Tá Seachtain na Gaeilge ag druidim linn agus tá lúcháir ar Oifig na nOibreacha Poiblí (OPW) sraith imeachtaí agus turais ‘as Gaeilge’ a fhógairt ag láithreacha éagsúla ar fud na tíre. Tá sé mar aidhm ag an tionscnamh seo an Ghaeilge agus an cultúr Gaelach a chur chun cinn agus a cheiliúradh, chomh maith le heispéireas den scoth a chur ar fáil do chuairteoirí.
Beidh iliomad roghanna ag cuairteoirí. Beidh Turais ‘as Gaeilge’ ar siúl ag láithreacha éagsúla de chuid Oifig na nOibreacha Poiblí, ina measc, Áras an Uachtaráin, Casino Marino, Ionad Cuairteoirí Theach an Chustaim, Caisleán Bhaile Átha Cliath, Caisleán Chill Chainnigh, Músaem Phríosún Chill Mhaighneann, Garraithe Náisiúnta na Lus, Músaem na bPiarsach, Caisleán Ráth Fearnáin agus Ospidéal Ríoga Chill Mhaighneann.
Beidh deis ag cuairteoirí páirt a ghlacadh i dturais ag láithreacha Oifig na nOibreacha Poiblí saor in aisce, trí mheán na Gaeilge. Beidh na turais faoi threoir baill foirne atá fíoreolach agus tabharfaidh siad léargais shuimiúla agus inseoidh siad scéalta i nGaeilge. Beidh eispéireas den scoth ag gach duine a fhreastalaíonn ar na turais seo, idir thurais ar fhoirgnimh stairiúla agus turais ar láithreacha iontacha eile.
Dúirt John Conlon, Cathaoirleach Oifig na nOibreacha Poiblí:
Is le linn Sheachtain na Gaeilge is mó a dhéantar an Ghaeilge agus an cultúr a cheiliúradh agus is é an bealach is fearr chun onóir a thabhairt dár dteanga dhúchais ná cuairt a thabhairt ar láithreacha oidhreachta Oifig na nOibreacha Poiblí le linn an cheiliúrtha seo. Tá an-lúcháir ar Oifig na nOibreacha Poiblí páirt a ghlacadh i Seachtain na Gaeilge chun a chinntiú go mbainfidh daoine aonair, grúpaí agus teaghlaigh taitneamh as cuid dár saibhreas oidhreachta trí Ghaeilge.
Bígí linn do cheiliúradh Sheachtain na Gaeilge agus déan tú féin a thumadh in áilleacht agus saibhreas na Gaeilge. Tapaigh an deis iontach seo tuiscint fhíor, dháiríre agus fhiúntach a fháil ar oidhreacht na hÉireann. Chun breis eolais a fháil chomh maith le liosta iomlán imeachtaí, féach ar na naisc thíos nó tabhair cuairt ar www.heritageireland.ie Beidh Seachtain na Gaeilge ar siúl ón 1 go dtí 17 Márta 2025, chun breis eolais a fháil, féach ar an nasc – www.snag.ie.