Preasráitis
Buaileann an tAire Sláinte le Comhpháirtithe an AE chun feabhas a chur ar infhaighteacht sonraí agus meabhairshláinte a fheabhsú
Foilsithe
An t-eolas is déanaí
Foilsithe
An t-eolas is déanaí
Tá an tAire Sláinte, Stephen Donnelly ag déanamh ionadaíochta ar son na hÉireann inniu (28 Iúil 2023) ag cruinniú neamhfhoirmiúil d’Airí Sláinte an AE i Las Palmas, Gran Canaria. Tionólfar an chéad chruinniú den Chomhairle Fostaíochta, Beartais Shóisialta, Sláinte agus Gnóthaí Tomhaltóirí (EPSCO) faoi Uachtaránacht na Spáinne ar Chomhairle an Aontais Eorpaigh (Iúil go Nollaig 2023). Malartóidh na hAirí Sláinte tuairimí maidir le teicneolaíochtaí digiteacha agus sonraí sláinte mar ghnéithe bunúsacha don Aontas Eorpach Sláinte agus pléifidh siad conas is féidir le Ballstáit rannchuidiú le meabhairshláinte a chomhtháthú i ngach beartas agus feabhas a chur ar chúram sláinte meabhrach do shaoránaigh.
Maidir leis an gcéad mhír den chlár oibre, dúirt an tAire Donnelly:
“Tá an chumhacht agus an cumas ag an turas digiteach sláinte ár seirbhísí sláinte a athrú ó bhonn. Agus an poitéinseal sin á comhlíonadh ní mór dúinn a bheith aireach i gcónaí go bhfuil meas iomlán ar thuairimí, imní agus cearta an othair maidir lena fhaisnéis phearsanta sláinte.”
Dúirt sé freisin,
“tá feabhsú na bhfoinsí sonraí sláinte atá ar fáil ríthábhachtach chun tacú le taighde agus nuálaíocht fheabhsaithe. Sin an fáth a bhfuil reachtaíocht faisnéise sláinte nua á cur chun cinn agam go gníomhach chun an príomhréimse seo a chur chun cinn i gcomhréir le prionsabail agus cuspóirí an spáis Eorpaigh um Shonraí Sláinte.”
Tá Meabhairshláinte ar an gclár oibre do chruinniú EPSCO an lae inniu freisin. Tá imní curtha in iúl ag an tAire Donnelly cheana féin go bhfuil algartaim na meán sóisialta ag déanamh damáiste mór do mheabhairshláinte daoine óga. Roimh an gcruinniú, thug sé faoi deara:
"Is gá go léireodh tacaíochtaí sláinte do dhaoine óga, lena n-áirítear meabhairshláinte, an tsochaí nua-aimseartha ina maireann daoine óga, ach ní mór don tsochaí ar fad a bheith feasach freisin ar an mbealach ina n-úsáideann siad teicneolaíocht agus a dtéann siad i ngleic leis na meáin shóisialta, agus mar lucht ceaptha beartas ní mór dúinn a chinntiú go bhfuil rialacháin gnólachtaí teicneolaíochta oiriúnach don fheidhm.”
Beidh roinnt cruinnithe déthaobhacha ag an tAire Donnelly freisin. Tar éis an chruinnithe beidh lón oibre do na hAirí ar neamhspleáchas straitéiseach oscailte an AE maidir le leigheasanna agus feistí leighis.