Preasráitis
Seolann na hAirí Sláinte feachtas 'Meáchan Sláintiúil' Éire Shláintiúil
Foilsithe
An t-eolas is déanaí
Foilsithe
An t-eolas is déanaí
Tá feachtas nua Meáchan Sláintiúil seolta ag an Aire Sláinte, Stephen Donnelly TD, agus ag an Aire Sláinte Poiblí, Folláine agus an Straitéis Náisiúnta Frithdhrugaí, Frank Feighan TD, arna fhorbairt faoin gCreat Éire Shláintiúil.
Léiríonn taighde go bhfuil tionchar ag fachtóirí éagsúla, mar shampla an comhshaol, rochtain ar bhia sláintiúil inacmhainne, gníomhaíocht coirp, comhdhéanamh géiniteach, agus stíl mhaireachtála ar mhéadú meáchain. Tacóidh an feachtas seo le daoine méadú meáchain ina 20í agus 30í a sheachaint trí dhíriú ar cheithre cholún – codladh, strus, gníomhaíocht coirp agus cothú.
Dúirt an tAire Donnelly:
“Tá ról ag gach duine againn sa Rialtas maidir le dul i ngleic le rómheáchan agus murtall, a mbíonn tionchar ag beartas agus gníomh náisiúnta ar a mbunchúiseanna thar raon leathan réimsí. Ní fúinn féin go leor de na tosca a mbíonn tionchar acu orainn, amhail inrochtaineacht agus inacmhainneacht bia shláintiúil, strusairí socheacnamaíocha agus an timpeallacht thógtha.
“Tá an feachtas seo mar chuid de shraith tionscnamh de chuid Éire Shláintiúil chun dul i ngleic le rómheáchan agus murtall i measc daoine fásta, agus ardaíonn an ghné áirithe seo feasacht ar an riosca ardaithe a bhaineann le rómheáchan agus murtall a fhorbairt de réir mar a bhogann daoine ag bogadh tríd an luath-aosacht."
Dúirt an tAire Feighan:
“Is é aidhm an fheachtais seo faisnéis a roinnt faoi iompraíochtaí a d'fhéadfadh dul i bhfeidhm ar mheáchan agus tacú le daoine a bheith níos sláintiúla agus mothú níos sláintiúla ag an am céanna.
“Tá i bhfad níos mó i gceist le méadú meáchain a chosc ná níos lú a ithe agus níos mó aclaíochta a dhéanamh. Is féidir le méadú meáchain tarlú ar go leor cúiseanna agus is féidir le timpeallachtaí tacúla daoine a chumhachtú chun roghanna níos sláintiúla a dhéanamh ar na roghanna is inrochtana. Tabharfaidh an feachtas seo cumhacht do dhaoine aonair tabhairt faoi nósanna a chabhróidh leo méadú meáchain a chosc."
Dúirt an Príomhoifigeach Leighis Eatramhach, an tOllamh Breda Smyth:
“Léiríonn an eolaíocht go mbíonn tionchar ag raon leathan fachtóirí ar mhéadú meáchain, cuid acu nach bhfuil smacht againn orthu, cosúil le géineolaíocht agus fachtóirí comhshaoil. Fiú amháin leis na nósanna itheacháin céanna nó an méid céanna gníomhaíochta coirp, is féidir le cruthanna agus meáchain éagsúla a bheith ag daoine. Tá na ceithre cholún atá aitheanta san fheachtas seo tábhachtach sa mhéid is go ndíreoidh siad ar raon níos leithne fachtóirí lena n-áirítear codladh agus strus a chabhróidh leo siúd ina 20í agus 30í méadú meáchain a chosc."
Dúirt Ceannaire Cliniciúil um Murtall FSS, an tOllamh Donal O’Shea:
“Is lá tábhachtach é an lá inniu agus muid ag seoladh an fheachtais seo, arb é, ar go leor bealaí, an chéad uair ar domhan é – toisc go bhfuil an bhéim chomh soiléir sin ar mhéadú meáchain a chosc.
“Ba mhaith linn a chur in iúl do dhaoine i lár a bhfichidí na rioscaí agus na deiseanna a chruthaíonn na deich mbliana ina dhiaidh sin maidir leis an meáchan is sláintiúla is féidir a chothabháil. Is nósanna lárnacha iad ithe go sláintiúil, fanacht gníomhach, strus a bhainistiú agus codladh go maith ar féidir leo cabhrú linn méadú meáchain a chosc agus muid ag dul tríd an gcéim seo den saol – agus is infheistíocht ollmhór ionat féin a bheadh ansin."
Dúirt an Dr. Gary Kearney, POF eatramhach, safefood:
“Am ríthábhachtach is ea ár 20í agus 30í nuair a bhíonn nósanna sláintiúla á mbunú againn don chuid eile dár saol. Ag safefood tá a fhios againn go bhfuil daoine óga ag lorg cabhrach chun gearradh trí na teachtaireachtaí contrártha a fhaigheann siad faoin mbia a itheann siad. Tá ár gcomhairle, arna forbairt ag saineolaithe cothúcháin i gcomhréir lenár dtreoirlínte náisiúnta maidir le bia sláintiúil, simplí agus éasca a leanúint. Is féidir leat tuilleadh eolais a fháil trí chuardach a dhéanamh ar ‘safefoodTV' ar YouTube nó trí dhul chuig www.safefood.net/healthy-eating.
Roinnfidh an feachtas Meáchan Sláintiúil saineolas praiticiúil faoi iompraíochtaí a d'fhéadfadh dul i bhfeidhm ar mheáchan, d'fhonn tacú le daoine fásta a bheith níos sláintiúla agus mothú níos sláintiúla. I measc na n-iompraíochtaí sin tá cothú maith agus ithe go maith, strus a bhainistiú, codladh go maith agus páirt a ghlacadh i ngníomhaíocht coirp go rialta.
Tá an feachtas dírithe ar dhaoine idir 25 agus 34 bliana d'aois, agus déanfar é a óstáil ar na meáin shóisialta lena n-áirítear ar Instagram, Facebook agus TikTok.
D'fhorbair Éire Shláintiúil é i gcomhpháirtíocht le safefood agus le foireann Cothú na Sláinte FSS.
Le haghaidh tuilleadh eolais, téigh chuig www.gov.ie/HealthyWeight
Tá an feachtas Meáchan Sláintiúil ar cheann de shraith beart náisiúnta chun cabhrú le rómheáchan a chosc i measc daoine 25-34 bliain d’aois. Is í aidhm an fheachtais ná eolas a roinnt faoi iompraíochtaí a d’fhéadfadh tionchar a imirt ar mheáchan chun tacú le daoine fásta a bheith níos sláintiúla agus mothú níos sláintiúla. Díríonn an feachtas ar na ceithre cholún seo a leanas: ithe go maith, a bheith gníomhach, strus a bhainistiú agus codladh.
Tá an feachtas Meáchan Sláintiúil mar chuid de Bheartas agus Plean Gníomhaíochta Náisiúnta na hÉireann um Murtall (2016 -2025), arna fhoilsiú ag Éire Shláintiúil in 2016. Tá sé mar aidhm ag an bPlean treochtaí murtaill a aisiompú, aimhréidheanna sláinte a chosc agus an t-ualach foriomlán do dhaoine aonair, do theaghlaigh, don chóras sláinte agus don tsochaí agus don gheilleagar i gcoitinne a laghdú.