Foilsithe
An t-eolas is déanaí
D’fhógair an tAire Sláinte, Stephen Donnelly, TD, tráthnóna inniu go ndéanfar luasghéarú suntasach ar Chlár Teanndáileoige na Vacsaíne COVID-19.
Ón Domhnach seo, an 19 Nollaig, beidh iad siúd atá 40-49 bliana d’aois in ann rochtain a fháil ar chlár vacsaínithe teanndáileoige ó Ionaid Vacsaínithe, Dochtúirí Ginearálta agus Cógaslanna. Beidh an luasghéarú ar fáil ag baint úsáide as múnla measctha de choinní agus clinicí siúil isteach.
Dúirt an tAire Donnelly:
“Bhí sé beartaithe againn go dtosódh vacsaíniú teanndáileoige do dhaoine sna daichidí i seachtain an 27 Nollaig. Tá sé seo á thabhairt ar aghaidh anois go dtí an Domhnach seo, an 19 Nollaig.
"Cuirfidh ionaid vacsaínithe tús le siúl isteach don aoisghrúpa seo - tá sonraí lena n-áirítear suíomhanna agus uaireanta oscailte d’ionaid vacsaíne ar fáil ar www.hse.ie. Tá dochtúirí ginearálta agus cógaslanna ag tairiscint teanndáileoga do na haoisghrúpaí seo chomh maith.
“Bhí mé ag obair le FSS chun an acmhainn a mhéadú go suntasach le seachtainí beaga anuas, agus chonaiceamar méaduithe suntasacha i líon na ndaoine atá ag fáil teanndáileoga, agus tugadh níos mó ná 160,000 teanndáileog le trí lá anuas. Is rud iontach é an oiread sin daoine a fheiceáil ag fáil vacsaíniú teanndáileoige roimh an Nollaig.”
Tá sonraí iomlán faoi sheirbhísí siúil isteach ag gach ionad vacsaínithe ar fáil ag hse.ie. Déantar an cuntas @HSELive a nuashonrú go rialta le suíomhanna na n-ionad chomh maith le hamanta ciúála cothrom le dáta i rith an lae.