Ó An Roinn Sláinte; An Roinn Fiontar, Trádála agus Fostaíochta
Foilsithe
An t-eolas is déanaí
Sheol an tAire Stáit le freagracht as Meabhairshláinte agus Daoine Aosta, Mary Butler TD, agus an tAire Stáit le freagracht as Gnó, Fostaíocht agus Miondíol, Damien English TD, Tuarascáil Ghrúpa Chomhairligh Straitéisigh an Fhórsa Saothair maidir le Cúramóirí Baile agus Cúntóirí Cúram Sláinte i dTithe Altranais.
Bhunaigh an tAire Butler an Grúpa Comhairleach Straitéiseach trasrannach maidir leis an bhFórsa Saothair i Márta 2022 chun scrúdú a dhéanamh ar dhúshláin straitéiseacha an fhórsa saothair i róil chúramóra túslíne a chuirtear ar fáil go poiblí agus go príobháideach i dtacaíocht bhaile agus i gcúram cónaithe fadtéarmach do dhaoine aosta. Soláthraíonn tuarascáil an Ghrúpa forbhreathnú cuimsitheach ar na dúshláin chasta agus idir-ghaolmhara a bhfuil tionchar acu ar earcú agus ar choinneáil oibrithe cúraim. Déanann sí 16 mholadh leathan chun aghaidh a thabhairt orthu seo go práinneach, a chuimsíonn réimsí earcaíochta, pá agus coinníollacha, bacainní ar fhostaíocht, agus oiliúint agus forbairt ghairmiúil, chomh maith le hathchóiriú earnála. Seo a leanas na moltaí:
Ag fáiltiú dóibh roimh an tuarascáil thacaigh an tAire Butler agus an tAire English go láidir le moltaí uile an Ghrúpa, agus iad ag tabhairt tús áite dá gcur i bhfeidhm iomlán.
Agus ceann de na daonraí is mó atá ag dul in aois go tapa san AE, tá dúshlán méadaithe ag Éirinn aghaidh a thabhairt ar ghanntanas oibrithe cúraim, ar daoine aosta iad céatadán suntasach díobh féin.
Dúirt an tAire Butler:
“Ba cheart go bhfaigheadh gach oibrí cúraim atá ag obair i dtacaíocht bhaile agus i gcúram cónaithe fadtéarmach do dhaoine aosta pá agus coinníollacha cothroma agus go mbeadh an deis acu dul chun cinn a dhéanamh ina ngairmeacha beatha. Ní mór dúinn a thaispeáint d'oibrithe tacaíochta baile agus do chúntóirí cúram sláinte go bhfuil meas againn ar an obair thábhachtach a dhéanann siad agus go bhfuil sé ina rogha gairme inmharthana. Aontaím le héileamh an Ghrúpa Chomhairligh go n-íocfadh gach soláthraí san earnáil phríobháideach agus soláthraí deonach an Pá Náisiúnta Maireachtála ar a laghad (€ 12.90 faoi láthair), agus go bhfaigheadh oibrithe tacaíochta baile íocaíocht as an am ar fad a chaitear ag taisteal idir tithe daoine agus as costais taistil réasúnacha eile.
“Ní mór dúinn aghaidh a thabhairt go práinneach ar ghanntanas na n-oibrithe cúraim in Éirinn. I gcomhar le hathchóirithe earnála níos leithne atá i bhfeidhm, beidh tionchar fíor agus buan ag cur i bhfeidhm mholtaí an Ghrúpa maidir le haghaidh a thabhairt ar na dúshláin sin a bhaineann leis an bhfórsa saothair.”
D'fháiltigh an tAire English roimh na moltaí chun aghaidh a thabhairt ar na bacainní ar earcú oibrithe cúraim, mar a léiríodh sa tuarascáil. Ina measc seo tá gealltanais maidir le:
Dúirt an tAire English:
“Is ceist shuntasach í an ganntanas reatha d'oibrithe cúraim nach mór aghaidh a thabhairt uirthi mar ábhar práinne. Dá bhrí sin, ní mór dúinn dul i ngleic go comhuaineach leis na dúshláin atá ag cur bac ar earcaíocht ar leibhéal náisiúnta agus earcaíocht idirnáisiúnta a éascú sa ghearrthéarma. Tá súil agam go gcuirfidh cur i bhfeidhm mholtaí an Ghrúpa Chomhairligh feabhas mór ar phá agus ar choinníollacha oibrithe cúraim in Éirinn agus go mbeidh sé níos tarraingtí agus níos inbhuanaithe mar ghairm.
“Dá réir sin, táim ag fógairt go gcuirfear 1,000 Cead Fostaíochta Ginearálta ar fáil d'oibrithe cúram baile ó Eanáir 2023. Faoi mar a mhol an Grúpa Comhairleach, ceadófar na ceadanna seo do phoist lánaimseartha le híostuarastal €27,000 in aghaidh na bliana agus íosfhad seasta leanúnach de cheithre huaire an chloig in aghaidh an lae oibre. Cinnteoidh sé seo fostaíocht ar ardchaighdeán d'oibrithe cúraim a thagann go hÉirinn agus ag an am céanna ár ngéarchéim náisiúnta earcaíochta a mhaolú."
Tá tús curtha le cur i bhfeidhm mholtaí an Ghrúpa Chomhairligh agus déanfaidh an Grúpa Forfheidhmithe, a bhunaigh an Roinn Sláinte, dlúthmhonatóireacht orthu.
Is féidir Tuarascáil an Ghrúpa Chomhairligh Straitéisigh um Fhórsa Saothair maidir le Cúramóirí Baile agus Cúntóirí Cúraim Sláinte i dTithe Altranais a íoslódáil anseo.
Bhí an Grúpa Comhairleach Straitéiseach um Fhórsa Saothair faoi chathaoirleacht na Roinne Sláinte agus bhí ionadaithe ó sheacht roinn rialtais (Leanaí, Comhionannais, Míchumais, Lánpháirtíochta agus Óige; Fiontar, Trádála agus Fostaíochta; Sláinte; Ardoideachais agus Breisoideachais, Taighde, Nuálaíochta agus Eolaíochta; Dlí agus Cirt; Caiteachais Phoiblí agus Athchóirithe; agus Coimirce Sóisialaí), Feidhmeannacht na Seirbhíse Sláinte (FSS), an tÚdarás um Fhaisnéis agus Cáilíocht Sláinte (HIQA) agus SOLAS.