Preasráitis
Fógraíonn an tAire Sláinte seoladh an Chláir Taighde nua 'Fianaise-ar-Beartas'
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Sláinte, Stephen Donnelly, inniu seoladh de ghlao píolótach taighde oscailte faoin gClár Taighde nua 'Fianaise-ar-Beartas' (EfP).
Is glao nua maoinithe é an Clár Taighde EfP atá comhdheartha ag an Roinn Sláinte (DOH) agus ag an mBord Taighde Sláinte (HRB) chun leas a bhaint as taighde acadúil, chun tacú le cinnteoireacht beartais. Sa chéad bhabhta seo, tugtar cuireadh do thaighdeoirí iarratais a chur isteach faoi ocht dtogra taighde atá á gcur chun cinn ag an Roinn Sláinte.
Cuideoidh an clár seo le taighde a chur i gcroílár an phróisis agus aghaidh á tabhairt ar na dúshláin a bhaineann le cúram sláinte, chomh maith leis an tiomantas i "Tionchar 2030: Straitéis Taighde agus Nuálaíochta na hÉireann" a chomhlíonadh, chun an chinntiú go mbeidh an tionchar is mó is féidir ag taighde fianaise-bhunaithe ar cheapadh agus ar chur chun feidhme beartais phoiblí
Is é cuspóir an chláir ná fianaise a ghiniúint chun bonn eolais a chur faoi cheapadh beartais i gcúram sláinte agus sóisialta ar bhealach tráthúil, dian agus trédhearcach. Chun é seo a chur i gcrích, tacóidh an scéim mhaoinithe EfP le taighde d’ardchaighdeán atá iomaíoch go hidirnáisiúnta a thugann aghaidh ar bhearnaí fianaise atá mar thosaíocht do bheartas sláinte agus cúraim shóisialta in Éirinn. Oibreoidh lucht déanta beartas agus taighdeoirí go dlúth le chéile chun aistriúchán eolais agus cur i bhfeidhm praiticiúil a chinntiú.
Beidh ról ríthábhachtach ag an gclár nua seo maidir le taighde a chur chun cinn i réimsí a leagtar béim orthu i "Ráiteas Tosaíochtaí: Taighde Sláinte agus Cúraim Shóisialta 2023-2025" na Roinne. Is doiciméad beo é an Ráiteas ar thosaíochtaí Taighde agus rinneadh é a uasdátú in 2024 chun béim a leagan ar spéis na Roinne i dtaighde a mhéadóidh táirgiúlacht agus luach ar airgead a bhaineann le cúram sláinte a sholáthar.
Dúirt an tAire Sláinte, Stephen Donnelly:
"Tá dul chun cinn iontach á dhéanamh againn ag baint úsáide as taighde agus sonraí chun tacú le cinnteoireacht i soláthar cúraim sláinte agus sóisialta. Tá an clár nua 'Fianaise-ar-Beartas' dírithe go díreach ar an nasc idir na dúshláin bheartais atá romhainn a neartú, agus ar an iarracht taighde atá ag teastáil chun tacú le cinntí an Rialtais. Tabharfaidh sé taighdeoirí agus lucht déanta beartas le chéile chun réitigh nuálacha a fhorbairt a neartóidh agus a fheabhsóidh soláthar cúraim sláinte in Éirinn. Tá na hábhair go léir san áireamh dírithe ar shaincheisteanna beartais bheo. Is í an fheidhm leo ná fianaise a ghiniúint a neartóidh ár sláinte phoiblí agus a chuirfidh bonn eolais faoi chur chun cinn agus éifeachtacht réamhghníomhach na sláinte inár soláthar cúraim sláinte agus sóisialta. Tá suim ar leith agam a fheiceáil cén ról a bheidh ag an bpobal taighde maidir le feabhsuithe táirgiúlachta a aithint, chun éifeachtúlacht agus luach ar airgead san earnáil sláinte a mhéadú."
Dúirt Príomhfheidhmeannach an HRB, Dr Mairéad O’Driscoll:
"Tá áthas ar an HRB as a bheith ag obair chomh dlúth sin leis an Roinn Sláinte ach go háirithe, chun an clár nua seo a dhearadh agus a chur i bhfeidhm a bhfuil sé mar aidhm aige a chinntiú go bhfuil ceapadh beartas i gcúram sláinte agus sóisialta bunaithe go láidir ar an bhfianaise taighde is fearr atá ar fáil agus go bhfuil sé d'acmhainn aige an sainmhíniú ar bheartais nua, nuálaíochtaí i mbeartais atá ann cheana, cur i bhfeidhm beartais agus/nó meastóireacht beartais a mhúnlú. Táimid ag tnúth le leas a bhaint as saineolas agus cumas an phobail taighde agus comhoibriú nua a chothú idir eolaithe agus lucht déanta beartas. Ag baint úsáide as ár saineolas i ndearadh, athbhreithniú agus bainistiú deontas taighde, is féidir linn a chinntiú go gcuirfear an fhianaise a ghintear ó thionscadail taighde rathúla isteach sa phróiseas ceaptha beartas ar bhealach córasach, freagrúil agus trédhearcach.
"Tá an chéad ghlao seo á reáchtáil againn ar bhonn píolótach agus foghlama agus tá sé i gceist againn aiseolas a lorg, chomh maith le gníomhú air ó gach duine a bhfuil baint acu leis, ionas go mbeidh an clár seo ina daingneán buan agus athfhillteach i bhféilire deontais an phobail taighde sláinte".
Dúnfar an babhta seo den Chlár EfP ar an 15 Márta 2024. Tá sonraí iarratais agus nótaí treorach ar fáil ar shuíomh gréasáin an HRB anseo :
Sa bhabhta seo, iarrtar ar thaighdeoirí iarratais a chur isteach faoi ocht gcinn de thograí taighde atá curtha chun cinn ag an Roinn Sláinte.
Ina measc tá:
1. Staidéar ar mhodhanna measctha chun scrúdú a dhéanamh ar na fáthanna ar chaiteachas as póca (OOP) i suíomhanna cúraim sláinte pobail agus ar an tionchar ar thorthaí sláinte in Éirinn.
2. Tionscadal chun imscrúdú a dhéanamh ar (1) Cad iad na cúiseanna leis an méadú ar Ionfhabhtuithe Gnéas-Tarchurtha (STIanna) in Éirinn le cúig bliana anuas? (2) Cad a spreagann úsáid/neamhúsáid coiscíní agus leas a bhaint as tástáil STI i bpríomhghrúpaí in Éirinn?
3. Tionscadal chun (1) Mapáil a dhéanamh ar na roghanna agus na cóireálacha diagnóiseacha reatha in Éirinn le haghaidh riochtaí sláinte a bhaineann leis an timthriall míosta (2) Athbhreithniú ar éifeachtacht na n-idirghabhálacha chun rochtain agus caighdeán diagnóise, cóireála agus cúraim (i suíomhanna cúraim phríomhúil agus thánaisteacha) a fheabhsú maidir le míchompord agus riochtaí sláinte a bhaineann le timthriall míosta.(3) Anailís ar bhearna chun aird a tharraingt ar an áit nár sainaithníodh aon chonairí cóireála agus cúraim reatha, agus i gcás ina bhféadfadh dul chun cinn nuálach a bheith déanta amach anseo sa todhchaí.
4. Tionscadal ag díriú ar-(1) An tionchar atá ag cógais aisíoctha ar úsáid na seirbhísí cúraim sláinte in Éirinn ó thaobh an chórais sláinte agus cúraim shóisialta de? (2) Cad iad na laghduithe ar úsáid na seirbhíse cúraim sláinte a chuirtear ar fáil trí chógais a sholáthar d'othair nua nó níos déine?
5. Cur chuige fianaise-bhunaithe maidir le prótacal Liosta Feithimh de Theiripe Náisiúnta Cúraim Phríomhúil a fhorbairt.
6. An tAthbhreithniú ar an gcóras sláinte Sláinte ag Athrú (HiT) d'Éirinn, mar chuid den tsraith HiT den Fhaireachlann Eorpach um Chórais Sláinte agus Beartais.
7. Meastóireacht ar thorthaí chun: (1) an tionchar de na róil Ardchleachtais do Ghairmithe Sláinte & Cúraim Shóisialaigh (HSCP) a thomhas, lena n-áirítear rochtain ar chúram agus turas an othair ag an gcomhéadan seo idir cúram príomhúil agus tánaisteach. (2) Fianaise a ghiniúint ar na bacainní agus ar na cumasóirí chun tuilleadh athchóirithe a chur chun feidhme agus a scálú.
8. Straitéisí chun feabhas a chur ar sholáthar Luach ar Airgead i gcúram sláinte na hÉireann sna suíomhanna príomhúla, pobail agus géarmhíochaine, ag díriú ar tháirgiúlacht, éifeachtúlacht agus inbhuanaitheacht.