Preasráitis
Fógraíonn an tAire Foley maoiniú €79 milliún do bhunscoileanna, d'iar-bhunscoileanna agus do scoileanna speisialta
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Oideachais Norma Foley TD maoiniú €79 milliún inniu chun tacú leis an bhfoghlaim dhigiteach agus le mionoibreacha tógála i scoileanna.
Eiseofar €50 milliún de mhaoiniú deontais do Theicneolaíocht na Faisnéise agus na Cumarsáide (TFC) go luath do gach bunscoil agus iar-bhunscoil aitheanta, agus tá €29 milliún ar leith de mhaoiniú mionoibreacha á chur ar fáil do bhunscoileanna agus do scoileanna speisialta.
Tá an maoiniú TFC á chur ar fáil do scoileanna chun cabhrú leo leanúint ar aghaidh ag úsáid teicneolaíochtaí digiteacha ina dteagasc, ina bhfoghlaim agus ina measúnú, agus is féidir leis na scoileanna seo an maoiniú mionoibreacha a úsáid le haghaidh cothabhála agus feabhsuithe mionscála ar fhoirgnimh agus ar thailte scoile.
Is ionann an deontas TFC €50 milliún agus an dara tráinse de mhaoiniú TFC faoin Straitéis Dhigiteach do Scoileanna go dtí 2027. Fuair scoileanna maoiniú deontais TFC €50m roimhe seo don scoilbhliain 2021 go 2022.
Dúirt an tAire Foley: "Tá áthas orm inniu a bheith ag fógairt maoinithe a thacóidh le bunscoileanna, iar-bhunscoileanna agus scoileanna speisialta ar fud na hÉireann chun suíomhanna scoile agus teagasc agus foghlaim araon a fheabhsú, chun leasa ár ndaltaí agus ár scoláirí.
"Tacóidh maoiniú deontais TFC le scoileanna lena chinntiú gur féidir leo leanúint d'úsáid teicneolaíochtaí digiteacha a leabú ina dteagasc, ina bhfoghlaim agus ina measúnú.
"Is féidir le teicneolaíochtaí digiteacha an-chuid deiseanna a chur ar fáil dár ndaltaí agus dár scoláirí. Tá sé tábhachtach gur féidir le scoileanna an t-eolas, na scileanna agus an tuiscint a thabhairt dár ndaoine óga i gceart chun leas a bhaint as buntáistí na dteicneolaíochtaí sin."
Is éard a bheidh i ndeontas TFC na Straitéise Digití bundeontas €2,000 do bhunscoileanna móide íocaíocht bhreise €39 in aghaidh an dalta príomhshrutha, €43 in aghaidh an dalta i scoileanna DEIS agus €47 in aghaidh an dalta le riachtanais speisialta atá ag freastal ar scoil speisialta nó ag freastal ar rang speisialta atá ceangailte le bunscoil phríomhshrutha. Mar shampla, gheobhaidh bunscoil ina bhfuil 100 dalta €5,973 agus gheobhaidh bunscoil ina bhfuil 500 dalta €21,865.
Íocfar bundeontas €2,000 le hiar-bhunscoileanna móide €47 in aghaidh an scoláire príomhshrutha agus €52 in aghaidh an scoláire i scoileanna DEIS. Gheobhadh iar-bhunscoil ina bhfuil 500 scoláire €25,840 agus gheobhadh iar-bhunscoil ina bhfuil 1,000 scoláire €49,680.
Tógann an deontas TFC seo ar an €210m a leithdháileadh cheana féin faoin Straitéis Dhigiteach do Scoileanna 2015-2020 a bhí ann roimhe seo, agus ar an €50m a eisíodh faoi Phlean Náisiúnta Téarnaimh agus Athléimneachta na hÉireann chun cur ar chumas scoileanna tacú le foghlaimeoirí atá i mbaol míbhuntáiste oideachais tríd an deighilt dhigiteach.
Dúirt an tAire Foley go dtuigeann an roinn go rímhaith an gá atá ag scoileanna bonneagar TFC cuí a bheith acu agus go bhfuil sí tiomanta i gcónaí do mhaoiniú leanúnach chun tacú le cur i bhfeidhm na Straitéise Digití.
Tá tuilleadh taighde á choimisiúnú ag an Aire Foley freisin ar úsáid teicneolaíochtaí digiteacha sa teagasc agus san fhoghlaim mar chuid den Straitéis Dhigiteach do Scoileanna go dtí 2027.
"Tá cur i bhfeidhm na straitéise seo faoi lán seoil agus mar sin tá sé tráthúil machnamh a dhéanamh ar cá bhfuilimid san aistear seo. Chuige sin, táim ag coimisiúnú tuilleadh taighde ar an tionchar ar fhoghlaim agus ar fholláine scoláirí trí theicneolaíochtaí digiteacha a úsáid sa teagasc agus san fhoghlaim chun cabhrú le bonn eolais a chur faoin mbeartas agus na hacmhainní agus na tacaíochtaí a chuirtear ar fáil do scoileanna a bharrfheabhsú."
Foilseofar an ciorclán ina leagtar amach na critéir a bhaineann le Scéim Deontais Bonneagair TFC na Straitéise Digití go luath.
Idir an dá linn, tá socruithe á ndéanamh anois chun €29 milliún de dheontais Mionoibreacha a íoc le bunscoileanna agus scoileanna speisialta. Tacóidh sé seo le feidhmiú na mbunscoileanna don scoilbhliain 2024/25 atá le teacht. Tabharfaidh an tréimhse thosaigh roimh an scoilbhliain nua am maith do scoileanna chun breithniú a dhéanamh ar phleananna agus ar thosaíochtaí maidir le húsáid an mhaoinithe.
Dúirt an tAire Foley: "Is acmhainn ríthábhachtach iad íocaíochtaí mionoibreacha maidir le tacú le feidhmiú scoileanna i gcoitinne agus tá áthas orm a bheith in ann maoiniú €29 milliún a fhógairt, ar maoiniú é a chuirfidh ar chumas pobail scoile aghaidh a thabhairt ar shaincheisteanna ag an leibhéal áitiúil. Ós rud é go bhfuil gach suíomh scoile difriúil, is iad na scoileanna aonair is fearr atá ábalta cinneadh a dhéanamh maidir leis an mbealach is éifeachtaí chun an maoiniú seo a úsáid chun aghaidh a thabhairt ar na riachtanais chothabhála ar leith atá acu féin. Maidir leis seo, cuireann an maoiniú deontais mionoibreacha solúbthacht mhaith ar fáil chun aghaidh a thabhairt ar shaincheisteanna ag leibhéal na scoile áitiúla."
"Tá socruithe maithe cothabhála tábhachtach agus ba cheart tús áite a thabhairt dóibh leis an maoiniú seo. Tá cothabháil foirgneamh scoile tábhachtach chun sláinte agus sábháilteacht a chur chun cinn, chun timpeallacht foghlama chuí fháilteach a chur ar fáil, agus chun na leibhéil shuntasacha de mhaoiniú poiblí atá á n-infheistiú i mbonneagar scoile nua agus uasghrádaithe a chosaint."
Tá bailchríoch á cur faoi láthair ag Aonad Pleanála agus Foirgníochta na Roinne ar threoir nuashonraithe do scoileanna maidir le socruithe dea-chleachtais chun foirgnimh scoile a chothabháil. Meastar go dtabharfar an treoir sin chun críche agus go bhfoilseofar í níos déanaí i Ráithe 2 de 2024. Tá sé beartaithe treoir a chur ar fáil i bhformáid idirghníomhach ar líne a bheidh inrochtana go héasca agus éasca le húsáid ag scoileanna.
Is é an maoiniú seo an dara tráinse den phacáiste foriomlán maoinithe (€200m) do bhonneagar TFC dá bhforáiltear faoin Straitéis Dhigiteach do Scoileanna go dtí 2027. Eiseofar na deontais seo go huathoibríoch chuig gach scoil i mí Aibreáin.
Nótaí breise agus eolas leathan maidir leis an méid is féidir leis an maoiniú tacú leis: