Preasráitis
Comórtas earcaíochta do Phríomhoifigeach Feidhmiúcháin ainmnithe don Údarás Póilíneachta agus Sábháilteachta Pobail
Foilsithe
An t-eolas is déanaí
Foilsithe
An t-eolas is déanaí
Tá fáilte curtha ag an Aire Dlí agus Cirt, Eiléana Nic an tSaoi TD, roimh sheoladh comórtais inniu chun Príomhoifigeach Feidhmiúcháin ainmnithe a earcú don ghníomhaireacht nua atá le cur ar bun - An tÚdarás Póilíneachta agus Sábháilteachta Pobail (PCSA) a bhunófar i ndiaidh achtú an Bhille um Póilíneacht, Slándáil agus Sábháilteacht Pobail, atá os comhair an tSeanaid faoi láthair.
Is é an tSeirbhís um Cheapacháin Phoiblí a sheol an comórtas inniu agus is é an spriocdháta chun iarratais a chur isteach ná 3pm Déardaoin, an 16 Samhain. https://www.publicjobs.ie/en/?option=com_jobsearch&view=jobdetails&Itemid=263&cid=181703&campaignId=23507003
Nuair a bheidh an PCSA curtha ar bun, déanfar feidhmeanna maoirseachta leathana an Údaráis Póilíneachta reatha agus sainfheidhmeanna cigireachta an Gharda Síochána a chomhdhlúthú in aon chomhlacht nua amháin agus cuirfear leis na feidhmeanna sin freisin. Is céim bharrthábhachtach é seo i dtreo creata atá níos comhtháite agus níos éifeachtaí chun maoirseacht neamhspleách a dhéanamh ar an nGarda Síochána agus chun cuidiú linn pobail níos láidre agus sábháilte a fhorbairt.
Níl i mbunú an PCSA ach gné thábhachtach amháin den tsraith fhoriomlán athruithe atá á cur i gcrích faoin mBille um Póilíneacht, Slándáil agus Sábháilteacht Pobail 2023.
Tá clár cuimsitheach forfheidhmithe á reáchtáil i gcomhthráth le rith an Bhille lena chinntiú go mbeifear in ann struchtúir agus forálacha nua a bhunú chomh luath agus is féidir i ndiaidh an t-achtú a chur i gcrích.
Is é an príomhról a bheidh ag an PCSA ná athbhreithniú agus measúnú a dhéanamh ar fheidhmíocht an Gharda Síochána agus feabhsú leanúnach an Gharda Síochána a chur chun cinn i dtaca lena misean ‘Daoine a Choinneáil Sábháilte’ a chur i gcrích. Bainfidh an comhlacht neamhspleách tairbhe as sainfheidhm chigireachta inmheánach, ag a mbeidh cumhachtaí láidre cigireachta, lena n-áireofar an chumhacht cuairteanna a thabhairt ar áitreabh Garda gan choinne.
Chomh maith leis sin, cuirfidh an PCSA comhoibriú idirghníomhaireachta agus rannpháirtíocht phobail chun cinn chun sábháilteacht pobail a fheabhsú, lena n-áireofar maoirseacht a dhéanamh ar chomhoibriú agus comhar na nGardaí le gníomhaireachtaí ábhartha eile. Tá sé seo i gcomhréir leis an mbeartas atá mar bhonn agus mar thaca ag an mBille nach é amháin An Garda Síochána atá freagrach as sábháilteacht pobail a fheabhsú agus a chaomhnú, ach go dteastaíonn cur chuige uile-Rialtais agus tras-sochaíoch ina leith.
Chomh maith leis sin, leanfaidh an PCSA den ról tábhachtach atá ag an Údarás Póilíneachta reatha i ndáil le feasacht agus rannpháirtíocht phoiblí a chomhlíonadh, lena n-áireofar cruinnithe poiblí a reáchtáil ar bhonn rialta le Coimisinéir na nGardaí agus a fhoireann shinsearach ceannaireachta.
Agus an comórtas á fhógairt, dúirt an tAire Nic an tSaoi:
“Tá an-mheas agam ar an obair thábhachtach a dhéanann an tÚdarás Póilíneachta agus Cigireacht an Gharda Síochána i láthair na huaire.
“Beidh deis ar leith ag an té a n-éireoidh leis/léi an post seo a fháil forbairt a dhéanamh ar an obair seo sa PCSA nua, ar trí sin a ndéanfar maoirseacht ar an nGarda Síochána a neartú agus a fhorbairt tuilleadh.
“Beidh ról tábhachtach ceannaireachta ag an té sin i ndáil le freagrachtaí feidhmíochta, sábháilteachta pobail, cuntasachta agus trédhearcachta an Gharda Síochána a dhearbhú ar mhaithe le leas na bpobal ar a bhfreastalaíonn siad.
“Tá seoladh an chomórtais do Phríomhoifigeach Feidhmiúcháin ina garsprioc thábhachtach sa chlár ollmhór oibre atá ar siúl i mo Roinnse agus sna gníomhaireachtaí ábhartha chun ullmhú don Bhille um Póilíneacht, Slándáil agus Pobail agus a achtú agus a thionscnamh.
“Tá an obair seo ag leanúint go fóill i gcomhthráth le rith na reachtaíochta trí na Tithe d’fhonn a chinntiú go mbeifear in ann na comhlachtaí, struchtúir agus próisis éagsúla nua a chur ar bun chomh luath agus is indéanta i ndiaidh achtú an Bhille.
“Tá cur i bhfeidhm na n-athchóirithe leathana seo an-tábhachtach dom de réir mar a oibrímid chun pobail níos láidre agus níos sábháilte a fhorbairt.
“Tá foráil sa Bhille seo do chreat nua i ndáil le rialú agus maoirseacht a dhéanamh ar phóilíneacht. Chomh maith leis sin, neartaítear comhar agus comhordú ar fud an Rialtais, idir gníomhaireachtaí agus le pobail iad féin, d’fhonn sábháilteacht pobail a fheabhsú agus a chaomhnú.
I dteannta a chéile, tacófar le feidhmíocht bharrmhaith an Gharda Síochána mar sheirbhís póilíneachta agus slándála ghairmiúil, eiticiúil, chomhaimseartha agus éifeachtach atá dea-bhainistithe, cost-éifeachtúil, oilte agus feistithe mar is cuí, agus cuntasach go soiléir.
“Is gné ríthábhachtach é seo dár misean chun pobail níos sábháilte agus níos láidre a fhorbairt.”
CRÍOCH./
Nótaí d’eagarthóirí:
Mar a fhoráiltear faoin mBille, d’fhéadfadh an tAire duine a ainmniú i leith ceapacháin mar Phríomhoifigeach Feidhmiúcháin an Údaráis sula mbeidh an tÚdarás curtha ar bun. Ceapfar an té seo mar Phríomhoifigeach Feidhmiúcháin ar lá an bhunaithe
I ndiaidh a achtaithe, is leis an mBille um Póilíneacht, Slándáil agus Sábháilteacht Pobail 2023 a n-aisghairfear Acht an Gharda Síochána 2005 (arna leasú) ina iomláine.