Nuashonraí maidir le híocaíochtaí a dámhadh d'Íocaíocht Dífhostaíochta Phaindéim COVID-19 agus Sochar Breoiteachta Feabhsaithe - an 24 Lúnasa 2021
Foilsithe
An t-eolas is déanaí
Foilsithe
An t-eolas is déanaí
An tseachtain seo, d’eisigh an Roinn Coimirce Sóisialaí íocaíochtaí seachtainiúla ar luach €44.2 milliún do 149,436 duine a fuair an Íocaíocht Dífhostaíochta Phaindéime (PUP).
Tá an laghdú is mó an tseachtain seo san earnáil Seirbhísí Cóiríochta agus Bia.
Tá figiúirí an PUP a foilsíodh an tseachtain seo sa bhreis ar an 184,213 duine a bhí ar an mBeochlár ag deireadh mhí Iúil.
Íocadh gach Íocaíocht Dífhostaíochta Phaindéim COVID-19 i gcuntais bhainc na bhfaighteoirí nó ag a n-oifig phoist.
Ag trácht ar fhigiúirí na seachtaine seo, dúirt an tAire Coimirce Sóisialaí, Heather Humphreys:
“Tá líon na ndaoine a fhaigheann an Íocaíocht Dífhostaíochta Phaindéime ag an leibhéal is ísle ó tugadh an tacaíocht isteach.
“Táimid ag feiceáil laghduithe seachtain i ndiaidh seachtaine ar líon na ndaoine a fhaigheann an PUP - rud a léiríonn an dul chun cinn seasta atá á dhéanamh againn maidir leis an gclár vacsaínithe a rolladh amach agus athoscailt leanúnach an gheilleagair."
Is é Baile Átha Cliath an contae leis an líon is mó daoine a fhaigheann PUP, a sheasann ag 56,900, le Corcaigh (13,162) agus Gaillimh (7,900) ina dhiaidh sin.
Ritheann an tseachtain íocaíochta don Íocaíocht Dífhostaíochta Phaindéime ón Aoine go dtí an Déardaoin agus íoctar íocaíochtaí an Máirt dar gcionn. Gheobhaidh daoine aonair a dhún a PUP faoi Dé Luain an 23 Lúnasa, agus iad ar ais ag obair, a n-íocaíocht PUP deiridh Dé Máirt an 31 Lúnasa.
Leanann an roinn ag meabhrú d’oibrithe atá ag filleadh ar an obair go gcaithfidh siad a n-éileamh ar an Íocaíocht Dífhostaíochta Phaindéime a dhúnadh ar an dáta iarbhír a dtosaíonn siad ar ais ag obair, d’fhonn a chinntiú go ndéantar a n-éileamh a phróiseáil i gceart agus chun ró-íocaíocht a sheachaint a dhéanfaidh an roinn iarracht a aisghabháil.
Toisc go n-íoctar PUP go seachtainiúil i riaráistí tá daoine a dhún a n-éileamh an tseachtain seo caite ag fáil íocaíochta deiridh an tseachtain seo agus tá siad fós san áireamh sna huimhreacha atá á n-íoc an tseachtain seo.
Is é an bealach is éasca le héileamh ar an Íocaíocht Dífhostaíochta Phaindéime a dhúnadh ná ar líne trí www.MyWelfare.ie. Is féidir le haon oibrí atá ag filleadh ar obair a bhfuil ceist aige maidir lena éileamh a dhúnadh, teagmháil a dhéanamh le Líne Chabhrach Tacaíochta Ioncaim tiomnaithe na Roinne 1890 800 024 idir 9am go 5pm Luan go hAoine.
De réir Phlean Téarnaimh Eacnamaíoch an rialtais, laghdófar an PUP de réir a chéile ar bhonn maolaithe thar thréimhse 6 mhí go dtí Feabhra 2022 chun é a ailíniú leis na gnáthíocaíochtaí cuardaitheora poist. Tosaíonn an t-aistriú seo i Meán Fómhair 2021.
Athruithe
Tá PUP dúnta d’éilitheoirí nua ón 8 Iúil i mbliana. Is féidir le daoine a chaill a bpost ón 8 Iúil iarratas a dhéanamh ar Shochair Cuardaitheora Poist nó ar Liúntas Cuardaitheora Poist ar an ngnáthbhealach.
Mic Léinn
Gheobhaidh mic léinn a fhaigheann an PUP faoi láthair agus a chuir in iúl don roinn gur mic léinn lánaimseartha iad nó go mbeidh siad sa bhliain acadúil 2021/2022 atá le teacht a n-íocaíocht dheiridh Dé Máirt an 7 Meán Fómhair.
Athruithe ar Rátaí PUP
Laghdóidh na trí ráta is airde de PUP faoi €50 i mí Mheán Fómhair. Laghdóidh an t-uasráta seachtainiúil €350 go €300. Laghdóidh an ráta reatha de €300 go €250 agus laghdóidh an ráta reatha de €250 go €203. Léireofar na rátaí íocaíochta nua sna híocaíochtaí a gheofar níos déanaí i mí Mheán Fómhair.
Aistreoidh daoine ar an ráta PUP €203 go téarmaí caighdeánacha cuardaitheora poist. Tabharfar comhairle do dhaoine atá ag fáil an ráta íocaíochta seo sna seachtainí amach romhainn maidir lena roghanna i ndáil le híocaíochtaí caighdeánacha Cuardaitheora Poist, is é sin, Sochar Cuardaitheora Poist nó Liúntas Cuardaitheora Poist. Leanfar le híoc PUP fad a bheidh éilimh cuardaitheora poist á bpróiseáil.
Tá dhá chéim eile d’athruithe rátaí beartaithe le tarlú ón 16 Samhain 2021 agus ón 8 Feabhra 2022. De réir mar a théann faighteoirí PUP ar aghaidh go dtí an ráta €203 i ngach céim, aistreofar iad go téarmaí caighdeánacha cuardaitheora poist.
Déanann an roinn sraith seiceálacha réamhíocaíochta agus iar-íocaíochta ar gach éileamh PUP lena n-áirítear seiceálacha incháilitheachta leanúnacha. Faoi réir na seiceálacha sin a ghlanadh, déanann an roinn íocaíochtaí a phróiseáil bunaithe ar fhéin-dhearbhú na gcliant.
Ritheann an roinn seiceálacha iar-íocaíochta lena n-áirítear sonraí a fhíorú i gcoinne taifid Ioncaim, scrúdú a dhéanamh ar chásanna ina n-úsáidtear an cuntas bainc céanna arís agus arís eile, scrúdú a dhéanamh ar chásanna ina dtuairiscíonn fostóir nó baill den phobal imní, agus anailísíocht sonraí a úsáid chun éilimh a aithint agus a sheiceáil. Déanann sí cigireachtaí ar fhostóirí freisin.
Is é Aonad Speisialta Imscrúdaithe na roinne a dhéanann an obair seo, a chuimsíonn níos mó ná 20 Garda ar iasacht don roinn.
De réir mar a athosclaíonn gnó leanfaidh cigirí na roinne ag déanamh athbhreithnithe rialaithe agus ag meaitseáil taifid i gcoinne sonraí párolla fostóirí ó na Coimisinéirí Ioncaim chun a chinntiú go ndúnfaidh daoine a n-éileamh agus iad ag filleadh ar obair. Chun ró-íocaíocht a sheachaint ba cheart do dhaoine atá ag filleadh ar obair a n-éileamh a dhúnadh agus is féidir leo é a dhéanamh go héasca ag www.MyWelfare.ie.
Is féidir le daoine féinfhostaithe a bhfuil an Íocaíocht Dífhostaíochta Phaindéime á fáil acu agus atá ag iarraidh a ngnó a chothabháil suas le €960 a thuilleamh thar thréimhse ocht seachtaine, agus a dteidlíocht iomlán PUP a choinneáil.
Níl aon phróiseas iarratais foirmiúil ann agus ní gá do dhuine féinfhostaithe ach an roinn a chur ar an eolas má thuilleann siad os cionn €960 in aon tréimhse ocht seachtaine.
Fanfaidh an Deontas Tacaíochta Fiontair €1,000 i bhfeidhm don chuid eile den bhliain do dhaoine féinfhostaithe a dhúnann a n-íocaíocht PUP. Beidh siad siúd a d’éiligh an deontas in 2020 ach arbh éigean dóibh dul ar ais ar PUP in 2021, in ann rochtain a fháil ar an deontas den dara huair.
Is é an bealach is éasca agus is tapa le hiarratas a dhéanamh ar go leor íocaíochtaí leasa shóisialaigh, lena n-áirítear an Sochar Breoiteachta Feabhsaithe agus an Sochar Cuardaitheora Poist ná ar líne ag www.MyWelfare.ie. Is ardán é seo atá sábháilte, slán agus inrochtana ag am ar bith, áit ar bith agus ar gach gléas. Tá an rogha ag daoine iarratas a dhéanamh ar Shochar Máithreachais, Sochar Atharthachta, Sochar Leanaí, aisíocaíochtaí ÁSPC agus íocaíochtaí Cuardaitheora Poist chomh maith le ráiteas nó taifead ar ranníocaíochtaí árachais shóisialta a iarraidh ón roinn.
Tá an tseirbhís iarratais chun iarratas a dhéanamh ar Uimhir PSP ar fáil ag www.MyWelfare.ie do dhaoine atá ina gcónaí in Éirinn atá 18 mbliana d’aois ar a laghad agus a bhfuil Uimhir PSP de dhíth orthu chun leas a bhaint as sochair leasa shóisialaigh, seirbhísí poiblí agus faisnéis in Éirinn. Chun iarratas a dhéanamh ar Uimhir PSP ar líne, beidh gá le cuntas bunúsach MyGovID .
Ar mhaithe le comhairle sláinte poiblí agus cloí le scaradh sóisialta iarrtar ar dhaoine, más féidir, gan freastal ar a nIonad Intreo áitiúil. ] Ina áit sin, ba cheart dóibh leas a bhaint as na seirbhísí ar líne atá ar fáil trí www.MyWelfare.ie.
Moltar d’fhostaithe nó do dhaoine féinfhostaithe a ndearnadh diagnóis orthu leis an víreas nó a ndúirt a ndochtúir leo féin-aonrú iarratas a dhéanamh ar Shochar Breoiteachta Feabhsaithe. Murab ionann agus an Sochar Breoiteachta caighdeánach, íoctar an Sochar Breoiteachta Feabhsaithe ón gcéad lá den bhreoiteacht. Is é an bealach is tapa agus is éasca le hiarratas a dhéanamh ar Shochar Breoiteachta Feabhsaithe ná trí www.MyWelfare.ie.
Inniu, tá thart ar 2,494 duine ag fáil íocaíocht Sochair Breoiteachta Feabhsaithe, i gcomparáid le 2,163 an tseachtain seo caite.
Tá sonraí iomlána maidir le Sochar Breoiteachta Feabhsaithe lena n-áirítear miondealú earnála agus contae chomh maith le próifíl aoise in Aguisíní 7, 8 agus 9.
Meabhraítear do chustaiméirí agus do bhaill an phobail faoi ghlaonna teileafóin agus teachtaireachtaí téacs caimiléireachta a d’fhéadfadh siad a fháil ó dhaoine aonair a mhaíonn gur oifigeach de chuid na roinne iad.
Taispeánann na glaonna agus na téacsanna seo raon uimhreacha, lena n-áirítear roinnt a bhféadfadh sé gur cosúil go bhfuil siad ó uimhreacha gutháin na roinne. Ba mhaith leis an roinn a custaiméirí go léir a mheabhrú nach lorgóidh sí faisnéis phearsanta ó chustaiméirí trí theachtaireacht téacs agus ní iarrfaidh sí ar chustaiméirí riamh a gcuid sonraí bainc ar an bhfón.
Iarrtar ar aon duine a fhaigheann glao nó téacs den sórt sin gan aon fhaisnéis a nochtadh agus é a thuairisciú don Gharda Síochána láithreach.