Preasráitis
Síníonn an tAire Stáit Heydon comhaontú comhair agraibhia le hAireacht Vítneamach
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Shínigh an tAire Stáit Martin Heydon TD Meabhrán Tuisceana an tseachtain seo le haghaidh comhoibriú feabhsaithe le hAireacht Pleanála agus Infheistíochta Vítneam, a rinne an Leas-Aire Do Thanh Trung ionadaíocht air le linn turas staidéir go hÉirinn.
Tá an chuairt mar chuid de chlár Chomhpháirtíocht Agraibhia Vítneam/Éire (IVAP), atá á bhainistiú agus á chur i bhfeidhm ag Córais Bia Inbhuanaithe Éireann (SFSI) agus á mhaoiniú ag Ambasáid na hÉireann. Treisíonn an comhaontú caidreamh taidhleoireachta agus trádála idir Éire agus Vítneam atá á neartú.
Tá sé mar aidhm ag an IVAP tacú le Vítneam a chóras agraibhia a athrú ó bhonn i réimsí na gcóras táirgthe príomhúil inbhuanaithe, na sábháilteachta bia, na nuálaíochta agus an chaighdeáin. Tá an chuairt Vítneamach ag díriú ar mhalartú eolais i bhforbairt fiontraíochta agus chomhoibritheach agus nuálaíocht agraibhia.
Ag labhairt dó ar an gcomhaontú, dúirt an tAire Heydon
“ Leanaimid orainn ag tabhairt faoi fheabhsuithe ceannródaíocha sa talmhaíocht in Éirinn. Tá ceachtanna ann atá foghlamtha againn as ár gcórais agraibhia féin a athrú ar féidir iad a chur in oiriúint do na dúshláin chomhshaoil agus eacnamaíocha atá roimh an talmhaíocht i dtíortha ar nós Vítneam.”
Dúirt sé freisin
“Mar Bhallstát den AE, tá Éire ag iarraidh oibriú le Vítneam chun a chinntiú gur féidir leis an dá thír againn leanúint ar aghaidh ag baint leas frithpháirteach as Comhaontú Saorthrádála an AE-Vítneam. Tá an trádáil agraibhia idir Éire agus Vítneam ag fás ar fad agus is margadh tosaíochta é do rochtain ar mhairteoil na hÉireann. Tá Misean Trádála de chuid Rialtas na hÉireann chuig Vítneam beartaithe do mhí Dheireadh Fómhair 2024 agus beidh cuairteanna ar Hanáí agus Cathair Ho Chi Minh le rannpháirteachas ó Bhord Bia, Fiontraíocht Éireann, SFSI agus RTBM san áireamh ann.”
I rith na seachtaine thug an toscaireacht cuairt freisin ar Bhord Bia, NovaUCD, Cumann Comhar-Eagraíochtaí na hÉireann, Tirlán agus Teagasc na Cloiche Léithe. Is faoin gclár IVAP a tharla an chuairt ó rialtas Vítneam mar chuid de chlár leanúnach forbartha scileanna agus taighde.
CRÍOCH
Fotheidil Ghrianghraif: An tAire Stáit Martin Heydon TD ag síniú Meabhrán Tuisceana le haghaidh comhoibriú feabhsaithe le hAireacht Pleanála agus Infheistíochta Vítneam, a rinne an Leas-Aire Do Thanh Trung ionadaíocht air.