Preasráitis
Frithghiniúint saor in aisce atá ar fáil anois do mhná idir 32-35 bliain d'aois fógartha ag an Aire Sláinte
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Sláinte Stephen Donnelly go bhfuil an Scéim Frithghiniúna Saor in Aisce leathnaithe ón lá inniu chun mná idir 32-35 bliana d'aois a chur san áireamh. Ciallaíonn sé seo go bhfuil gach bean idir 17 agus 35 bliana d'aois san áireamh agus clúdaithe faoin scéim anois.
Clúdaíonn an scéim costas na gcomhairliúchán le dochtúirí teaghlaigh, pleanáil clainne, ionaid shláinte mac léinn agus chúraim phríomhúil, agus oidis don raon leathan roghanna frithghiniúna atá ar fáil ar Liosta Aisíocaíochta Fheidhmeannacht na Seirbhíse Sláinte (FSS).
Tá an Scéim Frithghiniúna Saor in Aisce oscailte do mhná, do chailíní, agus do dhaoine trasinscneacha nó neamh-dhénártha, a bhfuil gnáthchónaí orthu in Éirinn agus dóibh siúd a mheasann a ndochtúirí go bhfuil frithghiniúint ar oideas oiriúnach.
Tá éileamh mór ar an scéim ó tugadh isteach í i Meán Fómhair 2022, do mhná idir 17 agus 25 bliain d'aois ar dtús. Leathnaíodh an scéim ina dhiaidh sin i gcéimeanna ionas go mbeidh gach bean idir 17 agus 35 bliain d'aois curtha san áireamh anois.
Dúirt an tAire Sláinte:
"Is tosaíocht de chuid an Rialtais é rochtain ar fhrithghiniúint a fheabhsú agus tá mé thar a bheith sásta leis an rath a bhí ar an Scéim Frithghiniúna Saor in Aisce go dtí seo. Cuireann beagnach 2,400 dochtúir teaghlaigh agus 2,050 cógaslann seirbhísí ar fáil faoin scéim, agus d’éirigh le níos mó ná 189,000 bean rochtain a fháil ar na seirbhísí sin in 2023.
"Le tacaíocht ó mhaoiniú thart ar €48 milliún do 2024, táimid in ann na seirbhísí seo a leathnú chuig mná idir 32 agus 35 bliana d'aois.
"Tá a fhios againn go mb'fhéidir go bhfuil sé i gceist ag go leor ban san aoisghrúpa seo teaghlaigh a thosú, agus gurb í 33 bliain an aois mheánach chun páiste a shaolú. Mar sin féin, tá sé tábhachtach go leanfaimid orainn ag tacú le mná maidir le rochtain chothrom a sholáthar ar sheirbhísí a ligeann dóibh a sláinte atáirgthe a rialú, toircheas neamhbheartaithe a sheachaint, agus frithghiniúnaigh hormónacha a úsáid chun na siomptóim a bhaineann le míostrú a chóireáil."
Tá tuilleadh eolais maidir le frithghiniúint ar oideas saor in aisce agus an tSeirbhís Náisiúnta um Dháileachán Coiscíní ar fáil ar shuíomh gréasáin FSS um Fholláine ghnéis . Déantar an t-eolas seo a nuashonrú go rialta agus tugtar sonraí iomlána maidir le conas rochtain a fháil ar an scéim.
Tugadh an Scéim Frithghiniúna Saor in Aisce isteach i Meán Fómhair 2022, dóibh siúd idir 17 agus 25 bliana d'aois ar dtús, agus leathnaíodh í chun daoine idir 26-30 bliain d'aois a chur san áireamh in 2023. Leathnaíodh é a thuilleadh chun mná 31 bliain d'aois a chur san áireamh i mí Eanáir 2024.
Clúdaíonn an scéim costas na gcomhairliúchán le dochtúirí teaghlaigh, pleanáil clainne, ionaid shláinte mac léinn agus chúraim phríomhúil, agus oidis don raon leathan roghanna frithghiniúna atá ar fáil ar Liosta Aisíocaíochta Fheidhmeannacht na Seirbhíse Sláinte (FSS). I measc na roghanna seo, tá frithghiniúint inchúlaithe fhadghníomhach (LARCanna). I measc na LARCanna tá instealltaí, ionchlannáin agus feistí/córais copair agus hormónacha laistigh den bhroinn (ar a dtugtar cornaí). Tá feistis, aistrithe agus seiceálacha LARC saor in aisce faoin scéim. Áirítear leis an scéim freisin frithghiniúint éigeandála, chomh maith leis an bpiolla frithghiniúna béil, an paiste agus an fáinne. Tá feistiú, aistriú, instealltaí agus seiceálacha a bhaineann le LARC saor in aisce faoin scéim freisin.
Cuirfear oidis ar fáil trí chógaslanna áitiúla. Má roghnaítear LARCanna (cornaí agus ionchlannáin, mar shampla), filleann othair ar sholáthraí seirbhíse atá rannpháirteach sa scéim chun an gléas a fheistiú, agus a bhaint ina dhiaidh sin. Tá na costais seo go léir clúdaithe go hiomlán ag an Stát agus tá siad saor in aisce don othar.
Ón lá inniu ar aghaidh, beidh mná a bhfuil gnáthchónaí orthu in Éirinn agus atá 17 mbliana d'aois go dtí an lá roimh a 36ú breithlá i dteideal frithghiniúina saor in aisce faoin scéim.
Beidh mná a raibh cornaí, IUDanna, IUSs nó ionchlannáin feistithe acu agus iad incháilithe don scéim fós incháilithe do chúram leantach a bhaineann lena bhfeistí tar éis a 36ú breithlá, is é sin, seiceálacha ina dhiaidh sin agus aon fheistí a bhaint saor in aisce. Cinntíonn an beart seo leanúnachas cúraim.