Suirbhé Ar Líne don chéad Straitéis Náisiúnta eile do Mhná agus do Chailíní

Cuspóir

Tá an chéad Straitéis Náisiúnta eile do Mhná agus do Chailíní á forbairt ag an Roinn Leanaí, Comhionannais, Míchumais, Lánpháirtíochta agus Óige. Forbróidh an straitéis nua an dul chun cinn atá déanta leis an straitéis dheireanach agus cuideoidh sí le cearta ban agus na gcailíní a chur chun cinn. Tógfaidh an straitéis nua ar chuspóirí na straitéise roimhe seo i réimsí amhail ceannaireacht, saincheisteanna sóisialta agus eacnamaíocha, infheictheacht agus rannpháirtíocht ghníomhach, cúram sláinte, agus príomhshruthú inscne.

Chun an próiseas seo a threorú, tá an Roinn ag iarraidh tuairimí an phobail a bhailiú chun a chinntiú go gcuirtear raon leathan tuairimí agus taithí san áireamh agus na príomhcheisteanna á mbreithniú, agus chun oibriú amach conas is fearr déileáil leis na príomhdhúshláin atá roimh mhná agus cailíní inniu.

Conas a bheith rannpháirteach

Tá IPSOS B&A faoi chonradh chun an comhairliúchán a dhéanamh don Roinn agus chabhraigh siad le suirbhé ar líne a dhearadh ar féidir teacht air anseo . Beidh an suirbhé ar fáil ón 19 Lúnasa agus fanfaidh sé ar oscailt go dtí an 30 Meán Fómhair. Féadfaidh tú do thuairimí féin nó tuairimí eagraíochta a ndéanann tú ionadaíocht di a chur isteach. Beidh an suirbhé ar fáil i mBéarla agus i nGaeilge araon.

Más mian leat freagra níos mionsonraithe a sholáthar ar aon cheist is féidir leat é a chur isteach go díreach chuig IE-PA-genderequalitystrategy2023@ipsos-online.com

Cad a dhéanfaimid le do fhreagra

Úsáidfear faisnéis a bhaileofar mar chuid den suirbhé seo chun tuarascáil ar thorthaí an chomhairliúcháin a fhorbairt. Beidh an tuarascáil seo mar bhonn eolais do dhearadh na chéad Straitéise Náisiúnta eile do Mhná agus do Chailíní.

Féadfar an tuarascáil seo a fhoilsiú agus sleachta as aighneachtaí nó freagraí suirbhé a lua sa tuarascáil. Tabhair faoi deara le do thoil nach luafar ainm le freagraí ó dhaoine aonair anaithnid ionas nach n-aithneofar rannpháirtithe go pearsanta ar bhealach ar bith.

Má tá aon cheist agat faoin suirbhé seo seol ríomhphost chuig genderequality@equality.gov.ie

Le haghaidh aon cheisteanna teicniúla, déan teagmháil le Ipsos B&A trí ríomhphost a sheoladh chuig IE-PA-genderequalitystrategy2023@ipsos-online.com

Cad a tharlaíonn ansin

Tar éis don suirbhé ar líne a bheith dúnta, cuirfidh an Roinn Leanaí, Comhionannais, Míchumais, Lánpháirtíochta agus Óige tús le sraith de chomhairliúcháin phearsanta chun tuilleadh eolais a chur ar fáil d’fhorbairt na chéad Straitéise Náisiúnta eile do Mhná agus do Chailíní.

Saoráil Faisnéise

Féadfar aon aighneachtaí a fhoilsiú faoin Acht um Shaoráil Faisnéise (SF) 2014 agus tá siad faoi réir na reachtaíochta um Chosaint Sonraí chomh maith.