Cuireann an tAire O’Gorman fáilte roimh fhoilsiú thuarascáil an athbhreithnithe neamhspleách ar líomhaintí stairiúla na droch-úsáide gnéasaí i mBriogáid Otharcharr Naomh Eoin, Éireann

Cuireann an tAire Leanaí, Comhionannais, Míchumais, Lánpháirtíochta agus Óige, Roderic O’Gorman, fáilte roimh fhoilsiú na tuarascála leis an Dr Geoffrey Shannon, arna coimisiúnú ag Bord Otharcharr Naomh Eoin, Éireann ar bhainistiú na drochúsáide gnéasaí leanaí stairiúil laistigh den eagraíocht.

Dúirt an tAire:

“Gabhaim fáilte roimh fhoilsiú na tuarascála seo agus ag an am céanna tuigim an anacair a d’fhéadfadh a bheith i gceist leis an ionchur atá ann do mharthanóirí. Ba mhaith liom buíochas a ghabháil leis na daoine a ghlac páirt san athbhreithniú agus a admháil cé chomh deacair agus is féidir sé a bheith a insint do dhaoine eile faoi mhí-úsáid a tharla nuair a bhí tú óg.

“Ní comhlacht faoi choimirce mo Roinne féin é Otharcharr Naomh Eoin, ach tá oifigigh ó mo Roinnse i dteagmháil le hOtharcharr Naomh Eoin maidir le foilsiú na tuarascála. Is é an tuiscint atá agam féin ná gur shocraigh Bord Otharcharr Naomh Eoin teacht le chéile leis na marthanóirí roimh fhoilsiú na tuarascála seo. Tá comhairle faighte ag mo Roinn go bhfuil tacaíochtaí curtha ar fáil ag an eagraíocht dóibh siúd a raibh tionchar ag foilsiú na tuarascála orthu. Tá sé curtha in iúl don Roinn go n-áireoidh na tacaíochtaí seo líne chabhrach/seirbhís tacaíochta comhairleoireachta a bheidh ar fáil ar lá foilsithe na tuarascála. Leanfaidh Otharcharr Naomh Eoin, Éireann na tacaíochtaí seo a sholáthar thar dheireadh seachtaine saoire bainc Phádraig agus soláthraí comhairleoireachta gairmiúla curtha ar fáil acu. Tá líne chabhrach tuairiscithe tiomnaithe bunaithe ag Tusla freisin (045 839375) chun tacú le haon duine a bhfuil imní reatha nó stairiúil aige faoi chosaint leanaí maidir le Seirbhís Otharcharranna Naomh Eoin. Beidh an uimhir seo ar fáil ar feadh Dheireadh Seachtaine Saoire Bainc Fhéile Pádraig, Dé hAoine, an 17 go dtí Dé Domhnaigh an 19 Márta, ó 9am agus 5pm, agus leanfaidh sé ar aghaidh le linn gnáthuaireanta gnó sna seachtainí amach romhainn.

"Tá teagmháil leanúnach ag Tusla le hOtharcharr Naomh Eoin Éireann ó 2019 chun dearbhú a lorg go bhfuil na cleachtais reatha um chosaint leanaí ag teacht le reachtaíocht Thús Áite do Leanaí. Tá sé deimhnithe do mo Roinn ag Tusla go bhfuil siad sásta leis an leibhéal rannpháirtíochta atá á dhéanamh ag an eagraíocht i ndáil leis na saincheisteanna sin”.

Nóta d’eagarthóirí:

Tá nochtadh siarghabhálach déanta ag go leor daoine faoi mhí-úsáid maidir le hiarbhall d'Otharcharr Naomh Eoin. D'imscrúdaigh an Garda Síochána roinnt líomhaintí roimhe seo, agus ullmhaíodh comhaid don Stiúrthóir Ionchúiseamh Poiblí
Beidh Tusla, an Ghníomhaireacht um Leanaí agus an Teaghlach ar fáil chun atreoruithe a ghlacadh ó aon duine atá ag iarraidh cásanna amhrasta mí-úsáide a thuairisciú.
In 2017, cuireadh tús leis an Acht um Thús Áite do Leanaí ina iomláine. Leagtar amach san Acht na hoibleagáidí atá ar dhaoine agus ar eagraíochtaí leanaí a chosaint. San Acht, sonraítear earnálacha de dhaoine sainordaithe, nach mór dóibh teagmhais amhrasta den mhí-úsáid leanaí a thuairisciú do Tusla.
Is é an tÚdarás Rialála Carthanas, faoi choimirce na Roinne Forbartha Tuaithe agus Pobail, rialtóir reachtúil cumann carthanachta in Éirinn, lena n-áirítear Otharcharr Naomh Eoin.
Choimisiúnaigh Bord Otharcharr Naomh Eoin an Dr. Geoffrey Shannon chun athbhreithniú neamhspleách a dhéanamh ar líomhaintí stairiúla faoi dhroch-úsáid ghnéasach leanaí agus freisin chun cleachtais chosanta reatha laistigh den eagraíocht a mheas. Is príomhúdarás é an Dr Shannon ar chosaint leanaí agus ar dhlí leanaí agus teaghlaigh. Le linn trí théarma as a chéile mar Rapóirtéir Speisialta um Chosaint Leanaí, tháirg an Dr Shannon 12 thuarascáil bhliantúla chomh maith le raon tuarascálacha ar ábhair a bhain le cosaint leanaí. D'fhóin an Dr Shannon mar Chathaoirleach ar Údarás Uchtála na hÉireann freisin, agus ceapadh é ina bhreitheamh den Chúirt Chuarda le déanaí.
Chuaigh Tusla i dteagmháil le hOtharcharr Naomh Eoin maidir le cleachtais chosanta reatha le linn thréimhse an athbhreithnithe. Tá ráiteas athbhreithnithe um chosaint leanaí foilsithe ar shuíomh gréasáin Otharcharr Naomh Eoin.
Tá Tusla, an Ghníomhaireacht um Leanaí agus an Teaghlach, freagrach as measúnú a dhéanamh ar aon riosca reatha do leanaí, a eascraíonn as líomhaintí stairiúla mí-úsáide. Bhí idirchaidreamh ag Tusla le hOtharcharr Naomh Eoin d’fhonn próisis chosanta laistigh den eagraíocht a fheabhsú. Measadh go bhfuil Ráiteas Coimirce Otharcharr Naomh Eoin, a athbhreithníodh arís i mí Dheireadh Fómhair 2022, comhlíontach ag Aonad Comhlíonta Ráiteas Coimirce Tusla.
Tá Tusla ar fáil chun atreoruithe a ghlacadh ó aon duine atá ag iarraidh cásanna amhrasta mí-úsáide a thuairisciú.