Ó An Roinn Turasóireachta, Cultúir, Ealaíon, Gaeltachta, Spóirt agus Meán
Foilsithe
An t-eolas is déanaí
Chuir Catherine Martin, an tAire Turasóireachta, Cultúir, Ealaíon, Gaeltachta, Spóirt agus Meán agus Jack Chambers, an tAire Stáit Spóirt agus Gaeltachta, fáilte inniu roimh an bhfógra ar an mbabhta is déanaí de na tionscadail atá le tacaíocht a fháil ón tionscnamh Oileán Comhroinnte an Rialtais.
Ar na tionscadail atá á bhforbairt, tá trí cinn as an Roinn Turasóireachta, Cultúir, Ealaíon, Gaeltachta, Spóirt agus Meán, a bhfuil infheistíocht níos mó ná €15m ar fáil dóibh.
Is iad seo a leanas na tionscadail sin:
Turasóireacht : €7.6m ar fáil do chomhoibriú nua branda turasóireachta uile-oileáin agus tionscnamh margaíochta atá le riaradh ag na gníomhaireachtaí Turasóireachta ar bhonn trasteorann.
Is éard is fís an togra ná Bealach Cósta Chlochán an Aifir a cheangal le Slí an Atlantaigh Fhiáin san Iarthuaisceart ar bhealach lena spreagtar an cuairteoir fanacht níos faide agus níos mó airgid a chaitheamh chun tairbhe eacnamaíochta níos fearr a chur ar fáil don réigiún.
Tá clú idirnáisiúnta ar an dá bhealach cheana féin, ach tá deis iontach ann an dá áis seo a thabhairt le chéile chun feabhas a chur ar fheidhmiú iomlán na turasóireachta chuig oileán na hÉireann agus chun margadh idirnáisiúnta, a sheasfaidh amach, a chur ar fáil. Bainfidh ceantair atá i gcúlchríocha ar an dá bhealach sin tairbhe as an tionscal freisin agus leis sin cuirfear deiseanna nua ar fáil do na ceantair trína gcruthófar tairbhí buana eacnamaíochta.
Éire Ildánach : €6m chun gné Oileán Comhroinnte a chur le Clár Éire Ildánach an Rialtais do na blianta 2023-2027.
Iarrfar sa tionscnamh úsáid a bhaint as cruthaitheacht ar bhonn oileán comhroinnte chun na nithe seo a leanas a dhéanamh:
Gaeltacht : €2M ar fáil do thionscadail nua cultúir agus oidhreachta na Gaeilge agus na hUltaise, lena n-áirítear maoiniú chun saoráidí faoi stiúir an phobail agus imeachtaí cultúir trasphobail a fhorbairt.
Forbróidh sé sin agus cuirfidh sé le tacaíocht níos leithne ón Rialtas don Ghaeilge ar bhonn uile-oileáin trí Fhoras na Gaeilge agus i dTuaisceart Éireann, mar chuid de na gealltanais faoi Dheich mBliana Nua, Cur Chuige Nua, agus tacaíocht do theanga, cultúr agus oidhreacht na hUltaise trí fheasacht a ardú ar fud an oileáin.
Agus fáilte á cur aige roimh an bhfógra, dúirt an tAire Martin:
“Leis na tograí seo, cuideofar tionscadail thar a bheith fiúntach a chur ar fáil ach chomh maith leis sin cuideofar le comhoibriú Thuaidh/Theas níos mó a chothú. Leis an tionscadal turasóireachta, feabhsófar an comhoibriú láidir atá ann cheana féin san earnáil ar an oileán agus bainfear tairbhí ar leith amach san Iarthuaisceart. Beidh fáilte roimh na deiseanna a chuirfear ar fáil sna tionscadail Éire Ildánach do phobail ó Thuaidh agus ó Dheas chun obair a dhéanamh le chéile ar thionscnaimh chultúir agus chruthaitheacha. Tá ríméad orm go mbeidh béim ar dhaoine óga sna tionscadail seo freisin.”
Dúirt an tAire Stáit Jack Chambers freisin:
“Is céim an-dhearfach í an infheistíocht bhreise seo lena dtugtar aitheantas don tábhacht atá leis an nGaeilge chomh maith leis an Ultais i dtreo tuilleadh forbartha ar thuiscint chomhroinnte ar ár gcultúir agus traidisiúin. Feabhsófar an méid sin trí mhalartuithe traschultúrtha. Tá mé ag tnúth le comhoibriú leanúnach maidir leis an teanga agus an cultúr ar bhonn uile-oileáin sna blianta atá amach romhainn.”