Foilsíonn an tAire Sláinte Tuarascáil an Chláir Náisiúnta Sláinte do Mhná agus Naíonáin ina sonraítear dul chun cinn suntasach

Foilsíonn an tAire Sláinte Tuarascáil an Chláir Náisiúnta Sláinte do Mhná agus Naíonáin ina sonraítear dul chun cinn suntasach i gcur i bhfeidhm na Straitéise Náisiúnta Máithreachais in 2022

D'fhoilsigh an tAire Sláinte, Stephen Donnelly Tuarascáil Bhliantúil an Chláir Náisiúnta Sláinte do Mhná agus Naíonáin (CNSMN) do 2022.

Is é ról an CNSMN i bhFeidhmeannacht na Seirbhíse Sláinte (FSS) a bheith i gceannas ar bhainistiú, eagrú agus seachadadh seirbhísí máithreachais, gínéiceolaíochta agus nua-naíoch, ag neartú na seirbhísí seo trí obair a dhéantar faoi láthair ar fud an chúraim phríomhúil, phobail agus ghéarchúraim a thabhairt le chéile.

Dúirt an tAire Donnelly:

"Mar Aire Sláinte, tá feabhas a chur ar shláinte na mban ar cheann de na tosaíochtaí atá agam, agus tá cur i bhfeidhm na Straitéise Náisiúnta Máithreachais fós ina cuid thábhachtach den chlár oibre sláinte níos leithne faoi Chlár an Rialtais. Ag tógáil ar an infheistíocht shuntasach in 2021, tá áthas orm a fheiceáil go léiríonn an Tuarascáil seo go soiléir go bhfuil tionchar dearfach ag an infheistíocht mhéadaithe in 2022, lena n-áirítear beagnach €8.7 milliún don Straitéis Náisiúnta Máithreachais, ar chúram sláinte na mban.

"Tá an fócas atá curtha againn ar shláinte na mban ag déanamh difríocht, agus tá an infheistíocht spriocdhírithe ag aistriú go feabhsuithe d'othair. Mar shampla, maoiníodh os cionn 100 ball foirne lánaimseartha dár seirbhísí máithreachais in 2022, rud a ligeann dúinn an rogha cúraim a mhéadú níos mó fós trína chinntiú go bhfuil ardchleachtóir cnáimhseachais ag gach ceann de na 19 n-aonad anois chun an chonair chúraim a dtacaítear léi a chur i bhfeidhm. Tá speisialtóirí cnáimhseachais chliniciúla curtha leis againn freisin i réimsí ar nós diaibéiteas, oiliúna tuismitheoirí agus toircheas ardriosca, agus táimid tar éis forbairt mol cúraim iarbhreithe a mhaoiniú agus a chur chun cinn. Leanadh ar aghaidh ag rolladh amach an tSamhail Chúraim Ghínéiceolaíochta Siúlach, agus bhí 12 chlinic san iomlán i bhfeidhm faoi dheireadh 2022. Rinneadh forbairt shuntasach freisin i réimsí sos míostraithe, endometriosis, agus torthúlachta, le seirbhísí nua á seachadadh agus á gcur chun cinn i rith na bliana. Táim ag tnúth le dul chun cinn leanúnach a fheiceáil sna forbairtí seo, as a dtiocfaidh tacaíochtaí feabhsaithe agus torthaí níos fearr do mhná."

Bunaíodh an CNSMN chun cur i bhfeidhm na Straitéise Náisiúnta Máithreachais a bhrú chun cinn agus, ina leith sin, rinne an Clár maoirseacht ar fheabhsuithe suntasacha inár seirbhísí máithreachais le sé bliana anuas chomh maith le hathchóirithe níos moille a chur chun cinn ar ár seirbhísí gínéiceolaíochta.

Chríochnaigh an tAire Donnelly ag rá:

"Chuir an CNSMN go mór le forbairt ár seirbhísí máithreachais, agus le déanaí le réimsí eile de shláinte na mban, mar shampla ár seirbhísí gínéiceolaíochta a athchóiriú. Léirítear i dTuarascáil Bhliantúil an Chláir gur lean na hiarrachtaí chun cúram sláinte ardchaighdeáin agus tráthúil a chur ar fáil do mhná in Éirinn go dícheallach i rith 2022 agus ba mhaith liom CNSMN a mholadh as an dul chun cinn atá déanta acu."

Dúirt Bernard Gloster, Príomhoifigeach Feidhmiúcháin FSS:

"Cuirim fáilte roimh fhoilsiú Thuarascáil Bhliantúil an Chláir Náisiúnta Sláinte do Mhná agus Naíonáin don bhliain 2022. Is gné thábhachtach den chúram sláinte é seo agus is gné lárnach den mhéid a dhéanaimid sábháilteacht agus sláinte na mban agus na leanaí a chinntiú.

"Tá leathnú suntasach tagtha ar shainchúram CNSMN ó bunaíodh é agus tá athchóirithe an-suntasacha feicthe aige ar sheirbhísí gínéiceolaíochta agus ar shláinte na mban. D'éascaigh an infheistíocht leanúnach sna seirbhísí seo in 2022 an t-athrú seo agus an dul chun cinn iontach atá déanta maidir leis an Straitéis Náisiúnta Máithreachais a chur i bhfeidhm."

Nótaí

Mar atá molta ag an Straitéis Náisiúnta Máithreachais, tá a Thuarascáil 2022 curtha faoi bhráid an Aire Sláinte ag an gClár Náisiúnta Sláinte do Mhná agus Naíonáin (CNSMN). Leagtar amach sa Tuarascáil an dul chun cinn atá déanta maidir leis na sruthanna oibre faoi shainchúram CNSMN, le béim ar leith ar chur i bhfeidhm na Straitéise Náisiúnta Máithreachais agus ar fhorbairtí inár seirbhísí máithreachais ar bhonn níos leithne. Tugtar breac-chuntas sa Tuarascáil freisin ar an dul chun cinn atá déanta i réimsí eile d'obair CNSMN, lena n-áirítear athchóiriú leanúnach ar sheirbhísí gínéiceolaíochta agus raon forbairtí sláinte ban.

Forbairtí i Seirbhísí Máithreachais in 2022

Leagtar amach i dTuarascáil 2022 CNSMN roinnt forbairtí agus éachtaí tábhachtacha, lena n-áirítear:

Maoiniú chun 175 coibhéis lánaimseartha bhreise (CLanna) a earcú, lena n-áirítear deichniúr Cnáimhseoirí & Gínéiceolaithe, 54 cnáimhseach bhreise agus 23 Gairmí Sláinte agus Cúraim Shóisialta.
Fócas leanúnach ar an lucht saothair comhairleach Cnáimhseachais/Gínéiceolaí a mhéadú chun sé cinn ar a laghad a bhaint amach do gach ospidéal réigiúnach.
Forbraíodh creat do mhoil iarbhreithe a chuirfidh cúram iarbhreithe ar fáil laistigh den phobal de réir thorthaí an tSuirbhé Náisiúnta ar Thaithí Mháithreachais agus cuspóirí Sláintecare. Aithníodh na chéad chúig shuíomh Mol agus tá earcaíocht foirne ar siúl.
Forbraíodh creat chun Seirbhís Náisiúnta Géineolaíochta Imbhreithe a bhunú a dhíreoidh ar mheastóireacht, diagnóis, bainistíocht agus cóireáil aimhrialtachtaí roimh bhreith.
I gcomhar le Coláiste Dhochtúirí Teaghlaigh Éireann (CDTÉ), ceapadh an chéad Dochtúir Teaghlaigh i sláinte na mban chuig CNSMN, ról lárnach i mbaint amach cuspóirí Sláintecare. Forbraíodh 12 treoirlínte cliniciúla nua i Cnáimhseachas agus Gínéiceolaíocht le linn 2022. Seoladh na treoirlínte sin i mí Eanáir 2023;
Tugadh tús áite d'infheistíocht i sainseirbhísí, lena n-áirítear diaibéiteas iompair, agus ceapadh Speisialtóirí Cnáimhseachais Cliniciúla ar gach seirbhís.
Forbraíodh Samhail Chomhtháite Cúraim Titimeas agus Mháithreachais i gcomhar leis an gClár Náisiúnta um Chúram Cliniciúil Titimeas.
Rinneadh athbhreithniú ar sheirbhísí paiteolaíochta imbhreithe, agus forbraíodh líonra don tseirbhís chriticiúil seo thar thrí cinn de na líonraí máithreachais.
Tugadh faoin gcéad Suirbhé Náisiúnta ar Thaithí Méala Máithreachais i mí Mheán Fómhair agus i mí Dheireadh Fómhair 2022. Thug an suirbhé deis do mhná agus dá gcomhpháirtithe a dtaithí ar sheirbhísí cúraim méala máithreachais na hÉireann a roinnt.
Céim a Dó den Fhoireann Tacaíochta d'Imeachtaí Cnáimhseachais (FTIC) a chur i bhfeidhm, rud a chuireann le foghlaim ó theagmhais dhíobhálacha.
I gcomhthéacs seirbhís shábháilte, ardchaighdeáin chaighdeánaithe a chinntiú, lean CNSMN ag cur béim láidir ar oideachas agus oiliúint foirne. Mar shampla, in 2022, cheap CNSMN Comhordaitheoir Tionscadail chun clár oideachais réamhbhreithe a fhorbairt agus a chur i bhfeidhm.
Cuireadh athbhreithniú bonnlíne ar Oiliúint Éigeandála Cnáimhseachais i gcrích.
Tionóladh an chéad Chomhdháil Bhliantúil cnáimhseachais an 5 Bealtaine 2022. Ceiliúradh iontach a bhí san ócáid seo ar ról agus ar thábhacht na gcnáimhseach i gcúram máithreachais.

Samhail Chúraim Gínéiceolaíochta Siúlach

In iarracht rochtain ar sheirbhísí a fheabhsú agus seirbhís gínéiceolaíochta níos inbhuanaithe a chinntiú, táimid ag forbairt líonra de chlinicí gínéiceolaíochta siúlach aon-stad, "féach agus cóireáil". Meastar go bhfuil thart ar 70% d'atreoruithe ginearálta gínéiceolaíochta oiriúnach don bhainistíocht sa suíomh siúlach.
Rinneadh dul chun cinn suntasach maidir le feidhmiú céimneach na Samhla Chúraim Gínéiceolaíochta Siúlach seo, a thosaigh in 2020. Faoi dheireadh 2022, bhí 12 chlinic gínéiceolaíochta siúlacha i bhfeidhm.
Osclaíodh an tríú clinic déag i gCill Chainnigh i mBealtaine 2023 agus tá forbairt clinicí breise ar siúl agus é mar aidhm líonra de 20 clinic a bheith ann go náisiúnta.

Meanapás

In 2022, bunaíodh ceithre chlinic meanapás eile - san Aonach, sa Chom, sa Rotunda agus i nGaillimh. Pléann na clinicí seo le cásanna níos casta a dteastaíonn saineolas leighis ar leith uathu sa mheanapás, nach féidir déileáil leo ag leibhéal an chúraim phríomhúil.
Tá cúig cinn de na clinicí sin i bhfeidhm anois, an chéad cheann san Ospidéal Náisiúnta Máithreachais (ONM) san áireamh, a osclaíodh in 2021.
Tá an clinic deireanach le hoscailt i gCorcaigh go luath, rud a fhágfaidh go mbeidh clinic speisialaithe meanapás i ngach ceann de na sé líonra máithreachais.

Inmheatróis

In 2022, chuir CNSMN tús le Creat Náisiúnta um Bainistiú Inmheatróis in Éirinn a fhorbairt, a chuirfear i bhfeidhm ar bhonn céimnithe agus a fhoilseofar in 2023.
Sainaithneofar sa Chreat seo conas is gá cúram do mhná sa réimse seo a sholáthar, agus an cúram seo a chuimsíonn cúram príomhúil do chúram ospidéil áitiúil do shainchúram casta.
Cuireadh tús le hinfheistíocht sa réimse seo le linn 2021 agus 2022 le dhá sheirbhís inmheatróis casta for-réigiúnacha atá á mbunú i dTamhlacht agus i gCorcaigh. Samhlaíonn an Creat forbairt cúig sheirbhís mol inmheatróis, ag tacú leis an dá sheirbhís inmheatróis casta seo.

Múnla Cúraim do Neamhthorthúlacht

Mar chuid de Chéim a hAon de chur i bhfeidhm na Samhla Cúraim do Neamhthorthúlacht, bunaíodh an cúigiú Mol Torthúlachta Réigiúnach in Ospidéal na hOllscoile, Gaillimh in 2022. Beidh an séú Mol agus an Mol deiridh lonnaithe in Ospidéal Ginearálta an Aonaigh agus tá sé le bheith i mbun oibre in 2023.

An Clár Náisiúnta um Shláinte na mBan agus na Naíonán: Tuarascáil Bhliantúil 2022