Preasráitis
Fógraíonn an tAire Sláinte leathnú ar sholáthar Cariban (docsiolaimín/pireadocsaín) d'othair le Hyperemesis Gravidarum
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Sláinte, Stephen Donnelly, TD go bhfuil Cariban (docsiolaimín / pireadocsaín) do bhainistiú Hyperemesis Gravidarum, á chur leis an liosta aisíocaíochta do na scéimeanna drugaí pobail ón 1 Lúnasa 2024. Tacóidh an t-athrú le rochtain níos fearr ar Cariban a chinntiú, do na mná a dteastaíonn sé uathu.
Ciallaíonn sé seo go mbeidh Cariban ar fáil anois le hoideas ó Dhochtúir Ginearálta, agus ní bheidh ar mhná freastal ar Chomhairleoir a thuilleadh chun rochtain a fháil ar an gcógas.
Tá éileamh mór ar Cariban ó cuireadh ar fáil é faoi shocrú eisceachtúil go luath in 2023, agus cuireann an chéim is déanaí seo deireadh le bacainní a bhí ar mhná teacht ar an gcóir leighis seo. Faoin Scéim Íocaíochta Drugaí, is é costas iomlán na gcógas ar oideas, Cariban san áireamh, ná €80 in aghaidh na míosa in aghaidh an teaghlaigh.
Agus an t-uasdátú dearfach seo á fhógairt aige, dúirt an tAire:
“Tacaíonn an beart seo le mná le Hyperemesis Gravidarum acu agus tugann sé deis dóibh an cúram a theastaíonn uathu a fháil óna ndochtúir teaghlaigh áitiúil. Ní bheidh orthu fanacht ná dul chuig a gComhairleoir sula bhfaigheann siad an cógas seo.
“Tógann an beart seo ar Thionscnaimh Sláinte na mBan eile ar oibrigh muid orthu lena n-áirítear tabhairt isteach agus leathnú den Scéim Frithghiniúna saor in aisce, rochtain ar IVF agus ar chóireálacha torthúlachta eile a mhaoinítear go poiblí, líonra clinicí Gínéiceolaíochta "Féach-agus-Cóireáil" a chur i bhfeidhm an lá céanna, ionaid speisialaithe inmheatróise a fhorbairt agus moil torthúlachta a oscailt."
Cuireann FSS comhairle ghinearálta ar fáil maidir le cóireálacha do Hyperemesis Gravidarum atá ar fáil anseo.