Preasráitis
Tugann an scéim iompair scoile an líon is mó leanaí riamh chun na scoile in 2024
Foilsithe
An t-eolas is déanaí
Foilsithe
An t-eolas is déanaí
Tá líon na leanaí atá ag taisteal ar an scéim iompair scoile i mbliana chomh hard le 172,000 dalta, an líon is airde riamh.
Léiríonn staitisticí nua atá eisithe ag an Roinn Oideachais go bhfuil ardú 6 faoin gcéad ar líon na leanaí ar an scéim ón iomlán de 163,800 i scoilbhliain 2023/2204 roimhe seo.
I scoilbhliain reatha 2024/2025, tá 172,000 leanbh ag taisteal gach lá i thart ar 7,900 feithicil thar 10,300 bealach chuig bunscoileanna agus iar-bhunscoileanna ar fud na tíre gach lá.
Clúdaíonn na turais laethúla sin os cionn 100 milliún ciliméadar, arb ionann é agus beagnach 2,500 turas timpeall an domhain.
I measc na leanaí atá á n-iompar ar an scéim, tá os cionn 143,700 dalta ag taisteal ar sheirbhísí bunscoile agus iar-bhunscoile, 21,500 dalta a bhfuil riachtanais speisialta oideachais acu, agus 6,800 dalta a tháinig go hÉirinn ón Úcráin.
Dúirt an tAire Oideachais, Norma Foley TD:
"Tá an-áthas orm go bhfuil méadú ag teacht ar líon na leanaí a bhaineann leas as an scéim Iompair Scoile mar tá a fhios agam cé chomh tábhachtach is atá sí. Ligeann sí do pháistí an scoil a bhaint amach go sábháilte, cuireann sí ar chumas tuismitheoirí dul díreach chuig an obair agus laghdaíonn sí an trácht ar na bóithre.
Ó ceapadh mé i m'Aire Oideachais, tá líon na ndaltaí atá ag taisteal ar an scéim ardaithe ó 117,500 in 2019 go 172,000 anois agus tá méadú os cionn 100% tagtha ar an infheistíocht sa scéim, méadú ó €219 milliún in 2019 go dtí €450 milliún in 2024."
Tá an Scéim Iompair Scoile á bainistiú ag Bus Éireann thar ceann na Roinne Oideachais.
Tá méadú de 46% tagtha ar líon iomlán na dturas iompair scoile ó 2019 go dtí an scoilbhliain reatha. San áireamh ansin tá scoláirí atá ag taisteal ar sheirbhísí iompair scoile don phríomhshruth, Riachtanais Speisialta Oideachais (RSO) agus scoláirí ón Úcráin/IPAS.
Tá méadú 6.2% ar líon iomlán na dticéad a eisíodh ar fud na scéimeanna go léir i gcomparáid le ticéid a eisíodh ag an am céanna anuraidh. Rinneadh infheistíocht shuntasach sa scéim, chosain an scéim €219m in 2019 agus meastar go gcosnóidh sé thart ar €450m chun an scéim a reáchtáil in 2024.
Is í tuarascáil na Scéime Iompair Scoile 2030, a foilsíodh níos luaithe i mbliana, an t-athbhreithniú is mó ar an Scéim Iompair Scoile ó bunaíodh í in 1967.
Tá an Roinn Oideachais tiomanta do bheith ag obair chun moladh na tuarascála a bhaint amach maidir le rochtain ar an scéim a leathnú ionas gur féidir 100,000 dalta breise a iompar faoi 2030. Le linn an athbhreithnithe, bhí luach na Scéime Iompair Scoile do theaghlaigh agus maidir le tacaíocht a thabhairt do bheartais níos leithne de chuid an Rialtais an-soiléir.
Ní hamháin go bhfuil ról tábhachtach ag iompar scoile maidir le tacaíocht a thabhairt do rochtain leanaí ar an oideachas, ach tá sé ag teacht freisin le cuspóirí beartais níos leithne. Cuireadh tús feidhmiú céimnithe mholtaí an athbhreithnithe i mí Mheán Fómhair 2024.
I measc na n-athruithe a mholtar ar fheidhmiú na Scéime amach anseo tá leathnú ar na critéir incháilitheachta reatha, le himeacht ama, ag bogadh i dtreo comhtháthú níos fearr le hiompar poiblí chun an luach is fearr ar airgead a chinntiú don Státchiste.