Preasráitis
An cinneadh síneadh a chur le conarthaí GLAS le haghaidh 2022 fógartha ag an Aire McConalogue
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Inniu, roinn an tAire Talmhaíochta, Bia agus Mara, Charlie McConalogue T.D., tuilleadh sonraí maidir le conas is féidir le feirmeoirí leanúint le páirt a ghlacadh in GLAS le haghaidh 2022. Tá síneadh bliana (i.e. go dtí an 31 Nollaig 2022) á thairiscint d’fheirmeoirí a bhfuil conarthaí GLAS 1, 2 nó 3 acu a rachaidh in éag ar an 31 Nollaig 2021.
Le linn dó tagairt don ráiteas a rinne sé i ndiaidh Bhuiséad 2022 maidir le cothabháil scéimeanna feirmeoireachta tábhachtacha, bhí an méid seo a leanas le rá ag an Aire,
“tá pacáistí eolais eisithe ag mo Roinn anois chuig rannpháirtithe gníomhacha reatha na Scéime Glaise um Chomhshaol Talmhaíochta (GLAS), lena n-áirítear tairiscint síneadh a chur lena gconarthaí GLAS agus na bealaí ina bhféadfaí iarratas a dhéanamh faoin spriocdháta, an 10 Nollaig 2021. Beidh an próiseas cosúil leis an bpróiseas a cuireadh i gcrích anuraidh. Cúis dóchais dom an líon rannpháirtithe a chinn síneadh a chur lena gconarthaí GLAS don bhliain seo, de bhrí gur chiallaigh sé gur leanadh le soláthar na mbuntáistí timpeallachta a fhabhrú i rith na hidirthréimhse roimh CBT nua agus go raibh ioncam leanúnach á fháil ag feirmeoirí. Íoctar thart ar €200m gach bliain le rannpháirtithe GLAS agus dá réir sin baineann tábhacht shuntasach le hinfhaighteacht leanúnach a leithéid sin d’íocaíochtaí d’fheirmeoirí.
"Bhí tús áite á thabhairt agam do na híocaíochtaí feirme fíorthábhachtacha seo. Is den tábhacht é gur féidir slándáil ioncaim a sholáthar do na feirmeoirí atá páirteach in GLAS le linn dúinn a bheith ag aistriú idir cláir CBT."
Ar deireadh thagair an tAire don síneadh atá á chur le roinnt scéimeanna, agus go bhfuil sé beartaithe ag a Roinn tairiscintí a eisiúint ar bhonn seicheamhach,
“Tá tréaniarracht déanta ag mo Roinn próiseas chomh simplí agus is féidir a bhunú, agus roinnt roghanna a chur ar fáil chun iarratas a dhéanamh. Príomhphointe is ea go leanfar le gníomhartha atá curtha i gcrích faoi GLAS ar an 1 Eanáir 2022 rud a chiallaíonn go mb’fhéidir gur mhaith le feirmeoirí a machnamh a dhéanamh anois maidir le cibé acu ar mhaith nó nár mhaith leo tairbhe a bhaint as an tairiscint agus a bheith in ann freagra a thabhairt nuair a fhaightear tairiscint”.
NÓTAÍ DO NA HEAGARTHÓIRÍ
Socruithe maidir le síneadh a chur le conarthaí GLAS
• Tá síneadh bliana (i.e. go dtí an 31 Nollaig 2022) á thairiscint d’fheirmeoirí a bhfuil conarthaí GLAS 1, 2 nó 3 acu a rachaidh in éag ar an 31 Nollaig 2021.
• Seoladh pacáiste eolais tríd an bpost chuig gach rannpháirtí ar an gCéadaoin, an 10 Samhain 2021, inar sonraíodh an tairiscint síneadh a chur leis an tairiscint agus na bealaí a bhféadfaí iarratas a dhéanamh, agus chomh maith leis sin cuireadh sonraí a gconartha GLAS ar fáil agus ciorcláin maidir le hathruithe ar na Téarmaí agus Coinníollacha ábhartha, agus Sonraíochtaí.
• Tá leaganacha nuashonraithe na dTéarmaí agus Coinníollacha ábhartha agus na Sonraíochtaí a bhaineann le gach Tráinse le fáil ar shuíomh gréasáin na Roinne.
• Beidh 2 bhealach inar féidir le rannpháirtithe iarratas a dhéanamh ar shíneadh a chur lena gconradh:
o Trí théacsteachtaireacht: Ar dtús seolfar téacsteachtaireacht chuig gach rannpháirtí atá cláraithe leis an Roinn chun téacsteachtaireachtaí a fháil, agus tabharfar an rogha an freagra ‘DAFM T’ (Tá) nó ‘DAFM N’ (Níl) a sheoladh ar ais. Beidh 72 uair an chloig ag rannpháirtithe ón uair a fhaigheann siad téacsteachtaireacht chun freagra a sheoladh ar ais. Beidh an téacsteachtaireacht seo faighte ag rannpháirtithe cheana féin agus moltar dóibh freagra a sheoladh ar ais chomh luath agus is féidir.
o Is féidir iarratais a sheoladh ar aghaidh trí logáil isteach ar agfood.ie – beidh an suíomh beo ar an Déardaoin, an 18 Samhain 2021; is féidir leis an rannpháirtí nó le gníomhaire atá údaraithe chun feidhmiú ar a s(h)on i ndáil le GLAS iarratas a sheoladh ar aghaidh trí Agfood – is iad ‘tá’ nó ‘níl’ na roghanna atá curtha ar fáil.
• Ba cheart aon fhiosrúcháin a sheoladh chuig rannóg GLAS ag an seoladh ríomhphoist glas@agriculture.gov.ie nó ba cheart glaoch ar an uimhir 053 9163425
• Is é an 10 Nollaig 2021 an dáta deiridh a ghlacfar le freagairtí
Deimhneoidh an Roinn, ar leithligh, na socruithe maidir le conas is féidir le feirmeoirí atá páirteach sa Scéim Feirmeoireachta Orgánaí agus in BDGP iarratas a dhéanamh leanúint ar aghaidh lena rannpháirtíocht
CRÍOCH