Preasráitis
Seolann an tAire Heydon agus an tAire Burke tuarascáil mheastóireachta deiridh ar ‘On Feirm Ground 1’
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Sheol an tAire Stáit sa Roinn Talmhaíochta, Bia agus Mara le freagracht as Sábháilteacht Feirme, Martin Heydon T.D. agus an tAire Sláinte Poiblí, Folláine agus an Straitéis Náisiúnta Drugaí, Colm Burke T.D. an tuarascáil mheastóireachta deiridh don togra nuálach ar shláinte agus folláine feirmeoirí ‘On Feirm Ground 1’.
Is cloch mhíle shuntasach é seoladh na tuarascála le spriocanna an chláir leathnaithe a bhaint amach le tuiscint, cumas agus muinín gairmithe talmhaíochta tosaigh agus soláthraithe seirbhíse a fhorbairt le feirmeoirí atá i mbaol a shainaithint agus iad a threorú chuig na seirbhísí tacaíochta ábhartha.
D’fhorbair Clár Oiliúna Náisiúnta um Shláinte na bhFear de chuid Engage an clár On Feirm Ground atá á mhaoirsiú ag grúpa comhairleach ilpháirtithe leasmhara, Líonra Forbartha na bhFear (MDN), a bhfuil bainisteoirí tionscadail mar chathaoirligh air.
Tá an comhfhiontar sin comhchistithe ag an Roinn Talmhaíochta, Bia agus Mara, an Roinn Sláinte agus Feidhmeannacht na Seirbhíse Sláinte (FSS). Ba iad Ollscoil Teicneolaíochta an Oirdheiscirt agus Clár Scoláireachta Walsh de chuid Teagasc a mhaoinigh an taighde tosaigh a bhí taobh thiar den chlár.
Dhírigh an chéad chéim de chur i bhfeidhm an chláir On Feirm Ground, ó mhí Dheireadh Fómhair 2021 go mí Aibreáin 2022, ar chomhairleoirí feirme a oiliúint, go leor acu a bhí mar chohórt taighde na meastóireachta.
Tugann an tuarascáil deiridh léargas ginearálta cuimsitheach ar spriocanna an togra, ar na dúshláin agus na ceachtanna a foghlaimíodh i rith chur i bhfeidhm tosaigh, agus na moltaí a chuir bonn faoi dhearadh agus faoi fhorbairt an chláir leantaigh ‘On Feirm Ground 2’.
Chomh maith leis sin, tarraingíonn sé aird ar phríomhléargais agus ar scéalta ratha agus déanann sé measúnú ar thionchar iomlán an chláir. Rud atá an-tábhachtach ná go bhfuil comhairleoirí talmhaíochta, idir Theagasc agus chomhairleoirí talmhaíochta príobháideacha, tar éis glacadh le tacaíocht agus treorú sláinte agus folláine ó shin i leith mar chuid dá ngnáthobair.
Ag cur fáilte roimh fhoilsiú na tuarascála, dúirt an tAire Heydon:
“Tugann Feirmeoirí na hÉireann aghaidh ar réimse dúshlán a bhaineann leis an obair a fhágann go mbíonn baol méadaithe ann go mbeidh siad thíos le drochshláinte fhisiciúil agus mheabhrach. Chomh maith leis sin, is féidir go mbíonn sé dúshlánach dul i dteagmháil agus a bheith ag plé leo. Léiríonn ‘On Feirm Ground’ gur féidir cabhrú leis an mbearna sin a dhúnadh trí na scileanna a thabhairt do chomhairleoirí feirme agus do dhaoine eile a bhíonn ag obair le feirmeoirí le comharthaí mífholláine a aithint.”
Léiríonn an tuarascáil an éifeachtacht a bhaineann le róil tacaíochta do ghairmithe talmhaíochta tosaigh agus soláthraithe seirbhíse eile a fhorbairt, rud atá ag tarlú anois ar fud na hÉireann tríd ‘On Feirm Ground 2’ méadaithe, atá mar chúis le méadú suntasach i líon na rannpháirtithe atá ag glacadh páirt sa traenáil.
Dúirt an tAire Heydon:
“Tá lúcháir orm a bheith in ann forbairt an chláir seo a mhaoiniú do ghairmithe talmhaíochta eile agus soláthraithe seirbhíse laistigh d’earnáil níos leithne na talmhaíochta, a bhíonn ag obair le feirmeoirí lena n áirítear tréidlianna, altraí tréidliachta, ionadaithe feirmeoireachta agus foireann i mo Roinn féin. Ar a bharr sin, táim ag breathnú ar tuilleadh deiseanna le traenáil a chur ar fáil do ghrúpaí eile a bhíonn ag obair le feirmeoirí”.
Dúirt an tAire Burke:
“Is sampla maith é an clár nuálach seo atá ag dul ar aghaidh faoi láthair de ‘Éire Shláintiúil’ i bhfeidhm agus léiríonn sé gur modh éifeachtach é ‘compánaigh dhílse’ a chur ar an eolas le freastal ar fheirmeoirí agus le dul i dteagmháil leo maidir le fadhbanna sláinte agus le torthaí dearfacha a bhaint amach.”
Thug Colm Kelly Ryan, Stiúrthóir Seirbhísí MDN, moladh do na comhpháirtithe, maoinitheoirí agus d’Fhoireann Forbartha Acmhainní Engage a raibh baint acu le seachadadh an chláir, chomh maith leis na hoiliúnóirí agus comhairleoirí a ghlac páirt ann.
Dúirt an tUasal Kelly:
“Tá lúcháir orainn a bheith ag obair lenár gcomhpháirtithe leis an gclár On Feirm Ground a sheachadadh. Tá an chomhpháirtíocht i gcroílár na hoibre a dhéanaimid agus tá na comhpháirtíochtaí láidre, a chinntigh go raibh an clár seo indéanta, mar bhonn faoi rath On Feirm Ground.”
Ag an seoladh, ag a raibh páirtithe leasmhara agus saineolaithe i réimse na meabhairshláinte agus na folláine i láthair, leag Stephen Mbwika, Comhordaitheoir Cláir On Feirm Ground 2, scóip agus torthaí na tuarascála amach, agus leag an Dr Noel Richardson ó Ionad Náisiúnta um Shláinte na bhFear ag Ollscoil Teicneolaíochta an Oirdheiscirt, Ceatharlach príomhthátail an taighde amach.
DEIREADH