Ó An Roinn Talmhaíochta, Bia agus Mara
Foilsithe
An t-eolas is déanaí
D'óstáil an tAire Talmhaíochta, Bia agus Mara, Charlie McConalogue, TD, agus an tUasal Andrew Muir CTR, an tAire Talmhaíochta, Comhshaoil agus Gnóthaí Tuaithe i dTuaisceart Éireann, comhimeacht i nDún na nGall inniu chun Mhairteoil Fhéarbheathaithe na hÉireann a bheith cláraithe mar Thásc Geografach uile-oileáin faoi Chosaint (PGI) a chomóradh. Bhí Bord Bia agus an Coimisiún Beostoic agus Feola, na hiarratasóirí ar an PGI thar ceann táirgeoirí agus próiseálaithe in éineacht leis na hAirí.
Dúirt an tAire McConalogue:
“Ar an lá iontach seo d'fheirmeoirí na hÉireann agus do mhairteoil na hÉireann, ag sonrú Mairteoil Fhéarbheathaithe na hÉireann a bheith cláraithe mar Thásc Geografach uile-oileáin faoi Chosaint, táimid ag marcáil freisin an chéad cheann de go leor rannpháirtíochtaí dearfacha a bhfuil mé ag tnúth leo le mo chomhghleacaí Aireachta, an tAire Andrew Muir. Cuirim fáilte roimh sin agus an Tionól agus an Feidhmeannas ar ais i bhfeidhm, tá an tAire Muir agus mé féin le chéile, anseo i mo chontae dúchais i nDún na nGall, chun an t-éacht mór seo a chomóradh dár nOileán agus dár bhfeirmeoirí.
Ba mhaith liom comhghairdeas a dhéanamh leis na hiarratasóirí Bord Bia agus an Coimisiún Beostoic agus Feola a bhfuil é seo bainte amach acu thar ceann táirgeoirí agus próiseálaithe ar fud an oileáin. Léiríonn an comhoibriú idir mo Roinnse, Roinn Talmhaíochta, Comhshaoil agus Gnóthaí Tuaithe Thuaisceart Éireann, Roinn Comhshaoil, Bia agus Gnóthaí Tuaithe na Ríochta Aontaithe, Bord Bia agus an Coimisiún Beostoic agus Feola an comhoibriú luachmhar agus leanúnach thuaidh-theas ar chúrsaí talmhaíochta agus ár rannpháirtíocht dhearfach ar mhaithe le feirmeoirí agus próiseálaithe ar fud an oileáin."
Dúirt an tAire freisin
“Is meabhrúchán é cuairt a thabhairt ar an bhfeirm mhairteola den scoth seo anseo i nDún na nGall inniu ar cháilíocht agus inbhuanaitheacht mhairteoil na hÉireann agus ar an bhfáth a bhfuil an t-éileamh sin uirthi ar fud an domhain. Is é an príomhtháirge ó fheirmeoirí na hÉireann, a chabhraíonn lenár mbia ardchaighdeáin a bhfuil meas idirnáisiúnta air, cnámh droma ár n-earnála agraibhia. Is ionann an stádas PGI a dhaingniú agus aitheantas a thabhairt do na caighdeáin den scoth sin. Táim ag tnúth leis na táirgí PGI seo a fheiceáil ar sheilfeanna ollmhargadh na hEorpa agus leanúint ar aghaidh ag insint scéal fheirmeoireacht na hÉireann do lucht féachana idirnáisiúnta.”
Dúirt an tAire Muir:
“Cuireann deonú stádas Tásc Geografach do Mhairteoil Fhéarbheathaithe na hÉireann é ar an seasamh céanna le táirgí a bhfuil cáil dhomhanda orthu ar nós Champagne, Parma Ham, Roquefort Cheese agus, ar ndóigh, Irish Whiskey."
“Is bua é Tásc Geografach faoi Chosaint a bheith againn, aitheantas ar an gcaoi a n-aistríonn aeráid, tírdhreach agus cleachtais uathúla réigiúin isteach i mbia agus deoch, rud a thugann blas agus carachtar sainiúil dóibh. Is iontach an rud é go bhfuil aitheantas idirnáisiúnta agus gradam bainte amach ag an nginealach atá ag Mairteoil Fhéarbheathaithe na hÉireann do thionscal na talmhaíochta atá ag obair go dian.”
Dúirt an tAire Muir freisin:
D'éirigh go hiontach leis an bpróiseas ar fad, ní hamháin trína chinntiú go bhfaigheann feirmeoirí thuaidh agus theas an t-aitheantas atá tuillte acu, ach maidir le caidrimh láidre oibre a fhorbairt idir comhlachtaí rialtais Thuaidh, Theas, Thoir agus Thiar. Tá súil agam go ndéanfar na caidrimh seo a fhorbairt a thuilleadh seo in aon iarratais GI uile-oileáin amach anseo.”
Dúirt Jim O’Toole, POF Bhord Bia:
“Go gairid, le tacaíocht ón Roinn Talmhaíochta, Bia agus Mara, seolfaidh Bord Bia feachtas chun mairteoil fhéarbheathaithe na hÉireann a chur chun cinn le stádas PGI ar fud ár bpríomh-mhargaí Eorpacha. I dtosach báire, díreoimid ar mhargadh na hIodáile a aithníodh mar mhargadh a bhfuil an t-aitheantas is airde aige ar tháirgí a bhfuil stádas PGI acu. I measc na ngníomhaíochtaí margaíochta atá beartaithe againn tá feachtas trádála, feachtas píolótach tomhaltóirí, agus rannpháirteachas le cócairí, tionchairí, agus na meáin ábhartha chun feasacht agus tuiscint ar ár modhanna táirgthe fhéarbheathaithe a thógáil. Tar éis athbhreithniú a dhéanamh ar ghníomhaíocht tosaigh an fheachtais, tógfaimid ár gcur chuige ag díriú ar mhargaí agus ar chustaiméirí a thairgeann an féidearthacht den scoth is fearr d'fheirmeoirí agus do phróiseálaithe na hÉireann. Bunaithe ar ár dtaighde domhain ar acmhainneacht mhargaidh do PGI, is dócha go gcuimseoidh sé seo margaí ar nós na Beilge, na hEilvéise, na Fraince agus na Gearmáine."
Cabhróidh an tsiombail PGI le tomhaltóirí táirgí Mairteola Féarbheathaithe na hÉireann a aithint i bpríomh-mhargaí easpórtála.
DEIREADH
Is é is aidhm do bheartas cáilíochta AE ainmneacha táirgí sonracha a chosaint chun a saintréithe uathúla a chur chun cinn, agus iad nasctha lena dtionscnamh geografach chomh maith le fios gnó traidisiúnta. Is féidir 'tásc geografach' (GI) a dheonú d'ainmneacha táirgí má tá nasc sonrach acu leis an áit ina ndéantar iad. Cuireann an t-aitheantas GI ar chumas tomhaltóirí muinín a bheith acu as táirgí ardchaighdeáin agus idirdhealú a dhéanamh eatarthu agus ag an am céanna cabhraíonn sé le táirgeoirí a dtáirgí a mhargú ar bhealach níos fearr.
Faoi láthair tá naoi n-ainm cláraithe ag Éirinn ar tháirgí bia PDO/PGI - Bradán Oileán Chliara (PGI), Imokilly Regato (PDO), Putóg Dhonn Thigh Molaige (PGI), Uan Sléibhe Chonamara (PGI), Blaa Phort Láirge (PGI), Salann Sáile Oirialla (PDO), Mianraí Sáile Oirialla (PDO), Putóg Dhubh na Snadhma (PGI) agus Salann Mara Oileán Acla (PDO).
Tá trí dheoch biotáille GI uile oileáin cláraithe ag Éirinn freisin d'Uisce beatha na hÉireann, d'Uachtar na hÉireann agus do Poitín na hÉireann.