Preasráitis
Glacadh le gach iarrthóir nua incháilithe ar an Scéim Feirmeoireachta Orgánaí 2024
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
D’fhógair an tAire Stáit Pippa Hackett inniu go mbeidh 1,050 feirmeoir breise páirteach sa Scéim Feirmeoireachta Orgánaí i mbliana.
Dúirt an tAire Hackett:
“Leis na 1,050 feirmeoir breise seo, ciallaíonn sé go mbeidh os cionn 5,000 rannpháirtí againn sa Scéim Feirmeoireachta Orgánaí in 2024, agus méadú faoi thrí ar an limistéar ar a bhfuil feirmeoireacht á déanamh go horgánach ó 2020 i leith. Is garspriocanna an-suntasach iad seo agus léiríonn siad go bhfuil an earnáil orgánach in Éirinn fós ag fás go tapa. Mar gheall ar na rátaí stocála atá acu, is féidir le go leor feirmeoirí in Éirinn féar ilspeiceas agus seamair dhearg a chur in ionad leasachán ceimiceach costasach agus tiúchán iompórtáilte gan stró. Teastaíonn ardscileanna agus tuiscint mhaith ar an gcaoi a n-oibríonn ithir shláintiúil le muinín a bheith agat asat féin tabhairt faoin bhfeirmeoireacht orgánach, agus tá feirmeoirí na hÉireann breá ábalta an dúshlán seo a bhaint amach.”
Mar fhocal scoir, dúirt an tAire Hackett:
“Tá Teagasc ag cur tús le taighde i mbliana a leagfaidh amach treoirphleananna do tháirgeadh orgánach mairteola agus uaineola agus táim muiníneach go leanfaidh Bord Bia ag oscailt margaí do tháirgí orgánacha na hÉireann. Cé gur thit praghsanna ionchuir, tá boilsciú praghsanna agus drochaimsir ag cruthú fadhbanna d'fheirmeoirí le roinnt blianta anuas. Mholfainn dóibh siúd nach bhfuil an t-athrú déanta acu go fóill freastal ar cheann de na siúlóidí feirme orgánaí a bheidh ar siúl níos déanaí i mbliana le go bhfeicfidh siad lena súile féin conas a oibríonn feirm orgánach. Ba mhaith liom fáilte a chur roimh ár bhfeirmeoirí orgánacha nua agus m'fhocal a thabhairt dóibh go leanfaidh mé ag obair go dian dícheallach ar son rath na hearnála de réir mar a leanfaimid ar aghaidh ag fás.”
CRÍOCH
Nótaí don eagarthóir
Is comhpháirtíocht é Comhbheartas Talmhaíochta an AE (CBT) idir an tsochaí agus an talmhaíocht a áirithíonn soláthar cobhsaí bia, a chosnaíonn ioncam feirmeoirí, a chosnaíonn an comhshaol agus a choimeádann beocht i gceantair thuaithe. Cuireann tíortha AE CBT chun feidhme ar an leibhéal náisiúnta le Plean Straitéiseach CBT don tréimhse 2023-2027.
Is beart comhshaoil talmhaíochta í an Scéim Feirmeoireachta Orgánaí faoi Phlean Straitéiseach CBT na hÉireann atá cómhaoinithe ag an Roinn Talmhaíochta, Bia agus Mara agus an AE. Chun tuilleadh eolais a fháil, tabhair cuairt ar www.gov.ie/cap
Tá sprioc ag Plean Gníomhaithe ar son na hAeráide na hÉireann feirmeoireacht orgánach a dhéanamh ar 10% de limistéar talún faoi 2030. Is é an aidhm atá leis ná an sprioc sin a bhaint amach trí thacú le feirmeoirí tiontú go feirmeoireacht orgánach tríd an Scéim Feirmeoireachta Orgánaí, trí thacaíocht chomhairleach fheabhsaithe agus tuilleadh cur chun cinn agus trí éileamh an mhargaidh a fhorbairt.
Ciallaíonn an sciar is déanaí sin den Scéim Feirmeoireachta Orgánach go ndéanfar feirmeoireacht orgánach ar thart ar 225,000 heicteár (5%) den limistéar talún agus go mbeidh breis agus 5,000 feirmeoir páirteach. Tá méadú faoi thrí tagtha ar an limistéar a ndéantar feirmeoireacht orgánach air ó 2020 i leith.
Is é an Plean Gníomhaithe ar son na hAeráide 2024 an tríú nuashonrú bliantúil ar Phlean Gníomhaithe ar son na hAeráide 2019 de chuid na hÉireann. Is é an plean seo an dara plean atá le hullmhú faoin Acht um Ghníomhú Aeráide agus um Fhorbairt Ísealcharbóin (Leasú), 2021 agus i ndiaidh do Bhuiséid Charbóin agus Uasteorainneacha Astaíochtaí Earnála a thabhairt isteach ar fud an gheilleagair. Cruthóidh cur chun feidhme an Phlean Gníomhaithe ar son na hAeráide poist, deiseanna nua eacnamaíocha agus cosnóidh sé daoine agus an pláinéad. Is féidir leat breathnú ar Phlean Gníomhaithe ar son na hAeráide 2024 agus a aguisín gníomhartha anseo .
Chuir 1,200 feirmeoir isteach ar an Scéim Feirmeoireachta Orgánaí mí Mheán Fómhair seo caite. As na feirmeoirí sin, tá 130 neamh-incháilithe chun páirt a ghlacadh, bhí fiche acu sa Scéim Feirmeoireachta Orgánaí roimhe seo agus tá a gconarthaí imithe in éag, agus is feirmeoirí orgánacha nua iad 1,050 díobh. Ní mór d’Fheirmeoirí Orgánacha freastal ar chúrsa oiliúna 25 uair ina gcéad bhliain den fheirmeoireacht orgánach, foirm iarratais BISS a chur isteach gach bliain, agus cloí le caighdeáin orgánacha.
Cliceáil anseo chun clárú le haghaidh nuachtlitir Rialtas na hÉireann um Ghníomhú ar son na hAeráide