Preasráitis
Leagann an tAire Sláinte Poiblí, Folláine agus an Straitéis Náisiúnta Drugaí béim ar an méadú ar sheirbhísí cóireála drugaí
Foilsithe
An t-eolas is déanaí
Foilsithe
An t-eolas is déanaí
D’aibhsigh an tAire Sláinte Poiblí, Folláine agus an Straitéis Náisiúnta Drugaí Colm Burke inniu an soláthar méadaithe seirbhísí do dhaoine atá ag lorg cóireála le haghaidh fadhbúsáide drugaí.
Ag labhairt dó mar gur léirigh figiúirí nua ardú de bheagnach 1,100 ar líon na ndaoine a fhaigheann cóir leighis, dúirt an tAire gur fheabhsaigh infheistíocht mhéadaithe faoin straitéis náisiúnta drugaí rochtain agus fáil ar chóireáil do dhaoine a bhfuil fadhbanna andúile acu.
Léiríonn an Córas Tuairiscithe Cóireála Drugaí Náisiúnta (NDTRS) don bhliain 2023, arna fhoilsiú ag an mBord Taighde Sláinte, go raibh 13,104 cás ann in 2023 i gcomparáid le 12,009 in 2022.
Ba é cóicín an druga is coitianta a tuairiscíodh, arbh ionann é agus níos mó ná 37% de na cásanna go léir (4,923), méadú de níos mó ná 20% ar 2022 (4,084). Ba iad opioids, hearóin go príomha, an dara fadhb-dhruga is coitianta a tuairiscíodh, cé gur tháinig laghdú 126 ar líon na gcásanna, ó 3,971 in 2022 go 3,845 in 2023. I measc cásanna a bhí 19 mbliana d’aois nó níos óige, ba é cannabas an príomhéileamh ar chóireáil ginte drugaí.
Ag cur béime ar an méadú ar líon na ndaoine a fhaigheann cóireáil, dúirt an tAire Burke:
“Is ábhar misnigh é a fheiceáil go bhfuil an infheistíocht bhreise faoin straitéis náisiúnta drugaí le blianta beaga anuas ag cur le rochtain agus infhaighteacht cóireála dóibh siúd atá ag lorg cabhrach le saincheisteanna andúile. Tá an Rialtas seo tiomanta do fhreagairt sláinte ar úsáid drugaí agus mar sin thugamar tosaíocht d'infheistíocht spriocdhírithe chun a chinntiú go bhfuil seirbhísí ar fáil dóibh siúd a bhfuil gá acu leo.
“Léiríonn na torthaí in NDTRS an lae inniu tionchar na hinfheistíochta seo go soiléir. Mar sin féin, ní mór dúinn machnamh cúramach a dhéanamh ar na treochtaí go léir atá léirithe sa tuarascáil mar go gcabhraíonn an t-eolas seo lenár bpolasaithe a threorú agus cabhraíonn sé linn na seirbhísí is oiriúnaí a fhorbairt.”
Níos luaithe an mhí seo, sheol an tAire Burke léarscáil idirghníomhach de chóireáil drugaí atá maoinithe go poiblí agus seirbhísí tacaíochta teaghlaigh a bhaineann le drugaí . Soláthraíonn an uirlis ar líne faisnéis atá inseolta go héasca ar sheirbhísí áitiúla do dhaoine atá ag iarraidh rochtain a fháil ar sheirbhísí chun aghaidh a thabhairt ar a n-úsáid drugaí nó alcóil, agus do theaghlaigh agus do dhaoine eile imníoch atá ag streachailt le déileáil le húsáid drugaí nó alcóil a ngaolta.
Dúirt an tAire Burke:
“Tá tionchar diúltach i gcónaí ag úsáid drugaí ar shaol na ndaoine atá ag streachailt leis an andúil agus ar a dteaghlaigh agus a ngaolta. Tá cabhair agus tacaíocht ar fáil mar sin mholfainn go láidir d’aon duine a bhfuil imní orthu faoina n-úsáid drugaí féin, nó faoi úsáid duine den teaghlach nó cara, tacaíocht a lorg ó do dhochtúir teaghlaigh, ó sheirbhísí áitiúla nó déan teagmháil leis an líne chabhrach drugaí agus alcóil ar 1800 459 459 agus an láithreán gréasáin drugs.ie.”
Ag léiriú tiomantas leanúnach na Roinne do fhreagairt do threochtaí drugaí, in 2023, cuireadh €500,000 ar fáil chun seirbhísí pobalbhunaithe drugaí agus alcóil a leathnú, lena n-áirítear idirghabhálacha spriocdhírithe i bpobail faoi mhíbhuntáiste a bhfuil tionchar mór ag cóicín agus ‘crack’ cóicín orthu. Tháinig an maoiniú seo i ndiaidh €850,000 a leithdháileadh in 2022, lena n-áirítear tacaíocht do dhá thionscadal i dTamhlacht a oibríonn le húsáideoirí crack cóicín.
Tá tús áite á thabhairt ag an Roinn freisin maidir le cosc agus oideachas drugaí, le €1.5 milliún leithdháilte in 2023 ar chúig thionscadal a sheachadann tionscnaimh atá deartha chun úsáid drugaí agus alcóil a laghdú.
Is é an Córas Tuairiscithe Cóireála Náisiúnta Drugaí an córas náisiúnta faireachais a thaifeadann agus a thuairiscíonn ar chásanna cóireála drugaí agus alcóil in Éirinn. Tiomsaítear é go bliantúil chun faisnéis a sholáthar ar éileamh cóireála agus cuireann sé sonraí tábhachtacha ar fáil chun ligean do sheirbhísí an méid atá ag teastáil a sheachadadh.
Príomhthosaíocht straitéiseach de chuid na Straitéise Náisiúnta Drugaí is ea rochtain ar, agus seachadadh, seirbhísí drugaí sa phobal a fheabhsú. Tá méadú tagtha ar éileamh agus ar rochtain ar sheirbhísí le linn thréimhse na straitéise reatha.
Tá tionscnaimh nua tugtha isteach ag an Roinn le blianta beaga anuas chun rochtain ar sheirbhísí a fheabhsú. Áirítear leis sin an Ciste Feabhsaithe Seirbhísí Pobail (CSEF), a tugadh isteach in 2022, le buiséad de €2 mhilliún, chun feabhas a chur ar sheirbhísí pobalbhunaithe drugaí agus alcóil faoin Straitéis Náisiúnta Drugaí. Tá cistiúcháin ailínithe leis an mbéim ar chúram pobail feabhsaithe sa chlár athchóirithe Cúram Sláinte, a aistríonn cúram isteach sa phobal agus níos gaire do thithe daoine. Tá breis is 50 tionscadal drugaí pobalbhunaithe á maoiniú faoin CSEF ar fud na nEagraíochtaí Cúram Sláinte Pobail (CHO).
Tá €13.5 milliún breise san iomlán leithdháilte ag an Roinn in 2023 agus 2024 chun tacú le seirbhísí reatha agus chun seirbhísí nua a fhorbairt sa phobal. Leithdháiltear thart ar aon trian den mhaoiniú seo ar eagraíochtaí pobail agus deonacha.
Chuir an Roinn Sláinte €4 milliún breise ar fáil chun seirbhísí andúile pobail agus cónaithe a leathnú faoi Phlean Seirbhíse Náisiúnta FSS 2023. Soláthraíodh €3.5 milliún breise chun an leibhéal seirbhíse reatha a choinneáil do sholáthraithe pobail agus deonacha seirbhísí sláinte drugaí agus cuimsithe.
Faoi Bhuiséad 2024, fuarthas €800,000 chun tacú le téarnamh daoine atá spleách ar dhrugaí agus chun iad a chomhtháthú sa ghnáthshaol laethúil, lena n-áirítear teaghlach, tithíocht, fostaíocht agus oideachas. Áireofar leis tacaíocht téarnaimh piar-bhunaithe agus cóitseáil, agus forbairt pobail téarnaimh. Fuarthas €2m chun tacú le seirbhísí drugaí pobalbhunaithe agus iad a leathnú i gcomhar le tascfhórsaí drugaí agus alcóil agus CHO. Freastalóidh sé seo ar an éileamh méadaithe ar sheirbhísí, feabhsóidh sé dearadh seirbhíse, agus neartóidh sé comhtháthú le cúram pobail.