Preasráitis
Léirithe spéise á lorg ag an Aire Humphreys i gcur i bhfeidhm céimneach Béilí Scoile Te chuig gach bunscoil
Foilsithe
An t-eolas is déanaí
Foilsithe
An t-eolas is déanaí
Tá sé fógartha ag an Aire Coimirce Sóisialaí, Heather Humphreys TD, go bhfuil sí ag lorg léirithe spéise ó gach Bunscoil ar fud na hÉireann a bhfuil suim aici páirt a ghlacadh i gClár na mBéilí Scoile Te.
Scríobh Roinn an Aire chuig gach bunscoil sa tír, mar chuid de phleananna suntasacha chun na Béilí Scoile Te a leathnú chuig gach páiste sna blianta amach romhainn.
Tugadh isteach Clár na mBéilí Scoile Te sa bhliain 2019 agus tá méadú suntasach tagtha air ó phíolóta bheag de 30 scoil go clár a chuireann béilí cothaitheacha te ar fáil do bheagnach 500 bunscoil.
Tá níos mó ná 90,000 leanbh ag baint tairbhe as faoi láthair. Tiocfaidh méadú suntasach ar na huimhreacha seo nuair a bheidh béilí te á gcur ar fáil do gach bunscoil DEIS eile agus gach scoil speisialta eile i mí Mheán Fómhair 2023.
Tá sé deimhnithe ag an Aire Humphreys go ndearnadh teagmháil leis na bunscoileanna eile go léir agus gur iarradh orthu foirm léirithe spéise a chur isteach má tá suim ag a scoil tús a chur le soláthar béilí scoile te.
Cabhróidh na freagraí a gheofar chun bonn eolais a chur faoi bheartas chun an clár a leathnú amach anseo ar bhonn céimnithe.
Agus í ag trácht ar an gclár, dúirt an tAire Humphreys:
“Tugadh clár na mBéilí Scoile Te isteach sa bhliain 2019 agus d’fhás sé go suntasach ó chlár píolótach beag de 30 scoil go dtí clár a chuireann béilí te cothaitheacha ar fáil do bheagnach 500 bunscoil, rud a bhain níos mó ná 90,000 páiste tairbhe as.
Tiocfaidh méadú suntasach ar na huimhreacha seo nuair a bheidh béilí te á gcur ar fáil do gach bunscoil DEIS eile agus gach scoil speisialta eile i mí Mheán Fómhair 2023.
Dúirt an tAire freisin:
“Ciallóidh leathnú an chláir chuig gach bunscoil DEIS agus chuig gach scoil speisialta faoi dheireadh na bliana seo, go mbeidh rochtain ag 1,000 scoil ar mhaoiniú béile scoile te — is dul chun cinn iontach é sin.
“Ó 2024, cuirfimid tús le feidhmiú céimneach na mBéilí Te chuig na bunscoileanna uile atá fágtha. Déanfar é seo ar bhonn céimnithe. Moltar sa tuarascáil go mbeadh soláthar uilíoch faoi 2030 ach tá sé mar aidhm agam é sin a bhaint amach níos tapúla ná sin.
“Ó tharla go bhfuil leathnú déanta againn cheana féin ó 30 go 1,000 scoil i mbeagnach dhá bhliain go leith, creidim gur féidir linn gach bunscoil a shroicheadh níos luaithe ná sin.
“Táim ag spreagadh gach bunscoil inniu chun iarratas a dhéanamh — agus táim ag súil go mór le go leor iarratas. Toisc go bhfuil buntáistí ollmhóra ann dár bpáistí.”
Soláthraítear le Clár na mBéilí Scoile maoiniú chun bia a chur ar fáil do thart ar 1,600 scoil agus eagraíocht, maoiniú atá ag dul chun tairbhe 260,000 leanbh faoi láthair. Soláthraíonn sé bia rialta cothaitheach do leanaí nach féidir leo, mar gheall ar easpa bia ar ardchaighdeán, leas iomlán a bhaint as an oideachas a chuirtear ar fáil dóibh. Comhchuid thábhachtach is ea an clár de bheartais chun tinreamh ar scoil agus gnóthachtáil bhreisithe oideachais a spreagadh.
Chuathas i dteagmháil le bunscoileanna, nach bhfuil páirteach sa chlár faoi láthair, ag iarraidh orthu foirm léirithe spéise a chomhlánú má tá suim ag a scoil béilí scoile te a chur ar fáil. Cabhróidh na freagraí a gheofar chun bonn eolais a chur faoi bheartas chun an clár a leathnú amach anseo ar bhonn céimnithe.
Ba cheart léirithe spéise a sheoladh ar ríomhphost chuig EOISchoolMeals@welfare.ie faoin 19ú Bealtaine. Ba cheart iarratais ó scoileanna DEIS a dhéanamh trí gov.ie — Scéim na mBéilí Scoile (www.gov.ie). Beidh foirmeacha don bhliain acadúil 2023/2024 ar fáil le híoslódáil ag deireadh mhí na Bealtaine 2023.
Cuireadh €94.4 milliún ar fáil le haghaidh an chláir i mBuiséad 2023. Cheadaigh an Rialtas €14.5 m breise le déanaí chun rochtain ar scéim na mBéilí Scoile Te a cheadú do na scoileanna DEIS uile atá fágtha ó Mheán Fómhair 2023.
Tugadh na béilí teo scoile isteach in 2019 agus tá fás ollmhór tar éis teacht orthu ó scéim phíolótach de 30 scoil go dtí clár lena gcuirtear béile teo cothaitheacha ar fáil do bheagnach 500 bunscoil agus atá ag dul chun tairbhe do níos mó ná 90,000 leanbh.