Osclaíonn an tAire Meabhairshláinte agus Daoine Scothaosta glao chun Comhalta nua le Taithí Saoil a chur leis an gCoiste Náisiúnta Feidhmithe agus Monatóireachta
Foilsithe
An t-eolas is déanaí
Foilsithe
An t-eolas is déanaí
D'oscail an tAire Meabhairshláinte agus Daoine Scothaosta, Mary Butler T.D., glao ar Léirithe Spéise (EOI) , le go gcuirfí Comhalta le Taithí Saoil leis an gCoiste Stiúrtha den Choiste Náisiúnta Feidhmithe agus Monatóireachta (NIMC) ar Chomhfhís – Beartas Meabhairshláinte do Chách.
Tá sé mar aidhm ag an tionscnamh seo ionchur na taithí saoil a dhoimhniú i gcomhthéacs cur chun feidhme agus maoirseacht Chomhfhís, beartas meabhairshláinte náisiúnta uaillmhianach, ilghnéitheach na hÉireann don tréimhse 2020-2030.
Oibreoidh an ball nua, a bhfuil taithí saoil aige/aici, in éineacht le baill chliniciúla, shóisialta agus phobail an Choiste. Táthar ag súil go gcabhróidh an ceapachán seo le guthanna na n-úsáideoirí seirbhíse a chur san áireamh tuilleadh sa phróiseas cur chun feidhme beartais, mar aon le ról ríthábhachtach an Ghrúpa Tagartha (úsáideoirí seirbhíse, baill teaghlaigh agus cúramóirí).
Dúirt an tAire Butler:
“Cinnteoidh ball breise den choiste, a bhfuil taithí saoil ar leith aige/aici, go bhfanfaidh na húsáideoirí seirbhísí meabhairshláinte mar chomhpháirtithe comhionanna agus riachtanacha de chóras meabhairshláinte atá dírithe ar théarnamh agus a bhfuil sé mar aidhm againn é a thógáil agus a fheabhsú.
“Tá an-áthas orm cuireadh a thabhairt do léirithe spéise don ról mar Chomhalta Taithí le Saoil ar an gCoiste Náisiúnta Feidhmithe agus Monatóireachta. Is príomhthiomantas don Rialtas agus dom féin é Comhfhís, ár mbeartas náisiúnta meabhairshláinte, a chomhlíonadh. Creidim go láidir sa luach a bhaineann le taithí saoil a chur san áireamh i gceapadh beartas meabhairshláinte, i gcur i bhfeidhm agus i seachadadh seirbhíse."
Déanfaidh painéal roghnúcháin de chuid na Roinne Sláinte measúnú ar na léirithe spéise agus d'fhéadfadh próiseas gearrliostaithe a bheith i gceist leis. Is é an tAire a dhéanfaidh an cinneadh deiridh maidir le ceapachán ar Choiste Stiúrtha NIMC.
Tá an NIMC, a bunaíodh i mí na Nollag 2020, freagrach as cur chun feidhme fadtéarmach an bheartais seo a thiomáint agus a mhaoirsiú. Tá struchtúir éagsúla curtha ar bun ag Coiste Stiúrtha NIMC chun seachadadh beartais a fheabhsú, lena n-áirítear Grúpa Forfheidhmithe FSS, an Grúpa Tagartha, agus roinnt Sainghrúpaí a dhíríonn ar phríomhréimsí cosúil le Meabhairshláinte na mBan, Meabhairshláinte Dhigiteach, agus Aistrithe Meabhairshláinte don Aos Óg.
Iarrtar ar gach iarrthóir Curriculum Vitae (CV) agus litir thacaíochta a sheoladh isteach mar dhoiciméad amháin chuig sharingthevision@health.gov.ie le "Comhalta Taithí Saoil – An Coiste Náisiúnta Feidhmithe agus Monatóireachta" curtha isteach i líne an ábhair den ríomhphost.
Tá leabhrán eolais an iarrthóra ar fáil thíos. Is é Dé hAoine an 30 Lúnasa 2024 ag 15:00 an spriocdháta chun iarratais a chur isteach.