Ó An Roinn Talmhaíochta, Bia agus Mara
Foilsithe
An t-eolas is déanaí
Bhí an tAire Stáit um Úsáid Talún agus Bithéagsúlacht le freagracht speisialta as Gairneoireacht, an Seanadóir Pippa Hackett, ina comhchathaoirleach inniu ar chruinniú an earraigh d’Fhóram an Tionscail Gairneoireachta (13 Bealtaine 2024).
Chuala baill an fhóraim ó Niamh Lenehan ón Rialálaí Agraibhia agus Robert Malone ó Fheirmeoirí Aontaithe na hÉireann agus tugadh nuashonrú dóibh freisin ar dhul chun cinn na bPríomhghníomhartha Straitéiseacha atá sa Straitéis Náisiúnta Gairneoireachta 2023 – 2027 a foilsíodh ag tús mhí an Mheithimh anuraidh.
Shonraigh an tAire Hackett
“Bhí cruinniú an-tairbheach againn inniu, agus tá roinnt pointí gníomhaíochta ardaithe ag an earnáil a thóg mé amach lena mbreithniú agus chun obair leantach a dhéanamh orthu. Bhí sé dearfach cloisteáil faoin rannpháirtíocht agus faoin dul chun cinn comhoibrithe atá déanta maidir le roinnt Príomhghníomhartha Straitéise a chur i bhfeidhm sa Straitéis Náisiúnta Gairneoireachta 2023 – 2027. Is ábhar mór misnigh obair Fheirmeoirí Aontaithe na hÉireann ar chairt a fhorbairt idir miondíoltóirí, comhdhlúthaitheoirí agus saothróirí agus bhí lúcháir orm cloisteáil freisin faoin bhfócas atá á chur ag an Rialálaí Agraibhia ar an earnáil gairneoireachta.”
Chuala an tAire go pearsanta freisin ó shaothróirí maidir le stádas na bhfo-earnálacha leis na dálaí aimsire dúshlánacha, teacht ar shaothar agus corrlaigh dhochta a luaitear mar chúiseanna imní ar leith. D'fháiltigh earnáil na mbarr agus na muisiriún faoi chosaint roimh na forálacha nua faoisimh do Cháin Charbóin a thosaigh ar an 01 Aibreán 2024 agus moladh freisin forbairt an úlloird taighde nua ag Páirc na Darach de chuid Teagasc i gCeatharlach.
Nótaí d’Eagarthóirí:
Bunaíodh Fóram an Tionscail Gairneoireachta (HIF) mar ghrúpa páirtithe leasmhara chun cur chuige comhoibritheach a éascú i leith na ndúshlán atá roimh an tionscal agus chun cúinsí a chothú a mhéadóidh agus a fhorbróidh an tionscal ar bhonn fadtéarmach. Bunaíodh é in 2014 mar scátheagraíocht do shaothraithe táirgí gairneoireachta na hÉireann.
Thug ionadaithe ó na seacht n earnáil rannpháirteacha go léir, glasraí, muisiriúin, bogthorthaí, barrthorthaí, prátaí, conláiste agus barra cosanta forbhreathnú ar a bpríomhdhúshláin agus ar a bpríomhcheisteanna.