Preasráitis
An tAire Humphreys ag labhairt le Fóram Bliantúil na gCúramóirí
Foilsithe
An t-eolas is déanaí
Foilsithe
An t-eolas is déanaí
Labhair an tAire Coimirce Sóisialaí, Heather Humphreys TD, inniu leis an bhFóram Bliantúil Cúramóirí a tionóladh i dTeach na gCuntasóirí Cairte, Sráid an Phiarsaigh, Baile Átha Cliath.
Tugann an Fóram guth do chúramóirí teaghlaigh ag leibhéal polasaí agus tá sé ar cheann de ghealltanais na Roinne Coimirce Sóisialaí faoin Straitéis Náisiúnta Cúramóirí. Is straitéis thras-rannach í seo, faoi stiúir na Roinne Sláinte, a leagann amach an treo do bheartais, do sheirbhísí agus do thacaíochtaí amach anseo a chuireann ranna agus gníomhaireachtaí rialtais ar fáil do chúramóirí.
Is deis é an ócáid bhliantúil seo do ranna rialtais, d’eagraíochtaí cúramóirí agus do chúramóirí teaghlaigh plé a dhéanamh ar na saincheisteanna a mbíonn tionchar acu ar chúramóirí teaghlaigh agus ar a ngaolta ar bhonn laethúil. Is éard a bhí san imeacht ná seisiúin maidir le sláinte, tacaíochtaí cosanta sóisialta, saincheisteanna iompair agus tithíochta do dhaoine faoi mhíchumas agus do dhaoine scothaosta agus saincheisteanna a mbíonn tionchar acu ar chúramóirí óga. Tugann na ceardlanna téamúla seo deis d’idirphlé oscailte agus deis cloisteáil faoin tionchar a bhíonn ag beartais ar shaol daoine.
Ag labhairt di ag an ócáid, dúirt an tAire Humphreys:
“Ó ceapadh mé mar Aire Coimirce Sóisialaí, d’éist mé go géar le tuairimí cúramóirí ar fud na tíre.
“Tugann an fóram bliantúil seo deis dom léargas níos doimhne a fháil ar na saincheisteanna a bhíonn ag cúramóirí teaghlaigh agus a n-imní a chloisteáil dom féin.
“Chabhraigh na rannpháirtíochtaí seo le faisnéis a chur ar fáil do roinnt feabhsuithe suntasacha a tugadh isteach do chúramóirí le blianta beaga anuas, lena n-áirítear gealltanas an Chláir don Rialtas réiteach pinsin a sholáthar do chúramóirí fadtéarmacha a sheachadadh.
“Ó Eanáir 2024, tugadh isteach scéim nua Ranníocaíochta do Chúramóirí Fadtéarmacha. Cuireann an t-athchóiriú suntasach seo ar chumas cúramóirí fadtéarmacha, atá ag tabhairt aire ar feadh 20 bliain nó níos mó, cáiliú don Phinsean Stáit Ranníocach. Tá a fhios againn gur athdhearbhú agus gur faoiseamh é an t-athchóiriú seo don iliomad cúramóirí ar fud na tíre atá tar éis a saol a chaitheamh ag tabhairt aire dá ndaoine muinteartha.
“Mar fhocal scoir, ba mhaith liom an rannchuidiú ollmhór a dhéanann Cúramóirí Teaghlaigh dár sochaí a aithint agus tiomantas an Rialtais chun na tacaíochtaí atá ar fáil dóibh a fheabhsú tuilleadh.”
I measc na Ranna Rialtais agus na ngníomhaireachtaí a raibh ionadaíocht acu ag an ócáid bhí an Roinn Sláinte; an Roinn Leanaí, Comhionannais, Míchumais, Lánpháirtíochta agus Óige; an Roinn Tithíochta, Rialtais Áitiúil agus Oidhreachta; an Roinn Breisoideachais agus Ardoideachais, Taighde, Nuálaíochta agus Eolaíochta, an Roinn Iompair, an tÚdarás Náisiúnta Iompair agus Tusla.
Cuirfear nóta d’imeachtaí Fhóram Bliantúil Cúramóirí 2024 ar fáil ar líne ag gov.ie - Fóram Bliantúil Cúramóirí (www.gov.ie)
Fógra chuig deasca na ngrianghraf:
Pictiúir seolta ar leithligh ag Maxwell Photography.
Nótaí do na hEagarthóirí:
Tá an Fóram Cúramóirí Bliantúil mar chuid de ghealltanais na Roinne Coimirce Sóisialaí faoin Straitéis Náisiúnta Cúramóirí. Leagann an straitéis thras-rannach seo, atá faoi stiúir na Roinne Sláinte, an treo do bheartais, do sheirbhísí agus do thacaíochtaí amach anseo a chuireann ranna agus gníomhaireachtaí rialtais ar fáil do chúramóirí.
Pléitear saincheisteanna mar liúntais a leathnú nó tairseacha tástála acmhainne a mhéadú ag imeachtaí amhail Fóram na gCúramóirí. Chuidigh an leibhéal rannpháirtíochta sin le bonn eolais a chur faoi roinnt feabhsuithe suntasacha a tugadh isteach do chúramóirí le blianta beaga anuas, lena n-áirítear:
- €400 do dhaoine a fhaigheann Deontas Tacaíochta Cúramóra a íocfar i mí na Samhna.
- Íocaíocht Dhúbailte Bhónas na Nollag dóibh siúd a bhfuil íocaíocht cháilitheach leasa shóisialaigh á fáil acu, lena n-áirítear cúramóirí.
- Íocadh íocaíocht dhúbailte eile níos luaithe sa bhliain.
- Tháinig méadú €12 ar uasráta na n-íocaíochtaí seachtainiúla leasa shóisialaigh go léir. Seo an tríú hardú as a chéile ar rátaí leasa seachtainiúla. Tá ardú €29.00 ar na rátaí le 3 bliana anuas.