Preasráitis
Foilsíonn na hAirí Foley, O’Gorman agus O’Donovan Straitéis Oideachais don Lucht Siúil agus do na Romaigh 2024 – 2030
Foilsithe
An t-eolas is déanaí
Foilsithe
An t-eolas is déanaí
D’fhógair an tAire Oideachais Norma Foley TD, an tAire Leanaí, Comhionannais, Míchumais, Lánpháirtíochta agus Óige Roderic O’Gorman TD agus an tAire Breisoideachais agus Ardoideachais, Taighde, Nuálaíochta agus Eolaíochta Patrick O’Donovan TD foilsiú na Straitéise Oideachais don Lucht Siúil agus na Romaigh (SOLSR) inniu.
Is príomhghníomh í an Straitéis faoin Straitéis Náisiúnta maidir le hIonchuimsiú an Lucht Siúil agus na Romach 2024-2030 (SNITR II) agus is gealltanas í freisin i gClár an Rialtas.
Forbraíodh í go sonrach chun freastal ar riachtanais leanaí, daoine óga agus daoine fásta an Lucht Siúil agus na Romach agus é mar aidhm a gcuid oideachais agus torthaí a fheabhsú.
Faoin gcéad phlean cur chun feidhme dhá bhliain don straitéis, ceapfar dhá chomhordaitheoir náisiúnta don Straitéis Oideachais don Lucht Siúil agus na Romaigh chun tacú le cur i bhfeidhm na ngníomhartha laistigh den Straitéis, mar aon le comhordaitheoir náisiúnta lánaimseartha breise chun Tacú leis an Lucht Siúil agus na Romaigh (TLSR). Ceapfar Oibrithe Nasc Teaghlaigh freisin chun tacú le rolladh amach iomlán Chlár Tacaíochta Tuismitheoireachta an Lucht Siúil ag Tusla.
Áirítear i measc na bpríomhghníomhartha eile atá leagtha amach sa phlean:
- A chinntiú go nglacann gach leanbh den Lucht Siúil agus na Romach páirt sa chlár COLÓ
- Fáiltiú roimh theaghlaigh an Lucht Siúil agus na Romach agus iad a chur san áireamh sa luathfhoghlaim agus cúram leanaí
- A chinntiú go bhfuil oiliúint agus acmhainní san éagsúlacht agus sa chuimsiú ag gach oideachasóir luathbhlianta agus ag cleachtóirí aois scoile
- Tacaíochtaí breise a thairiscint do sheirbhísí spriocdhírithe
Dúirt an tAire Foley:
“Is rud dearfach é a thabhairt faoi deara go bhfuil méadú ag teacht le blianta beaga anuas ar líon na ndaoine óga den Lucht Siúil agus na Romach a chríochnaíonn an tSraith Shinsearach agus an Ardteistiméireacht.
“Tá sé tábhachtach freisin, áfach, a admháil go bhfuil torthaí oideachais do leanaí agus do dhaoine óga an Lucht Siúil agus na Romach inár scoileanna níos ísle ná mar atá don chohórt scoláirí i gcoitinne.
“Tá an rialtas seo tiomanta do fheasacht a threisiú agus do chur chun cinn an chuimsithe agus dul i ngleic le ciníochas ar fud an chórais oideachais. Tá sé tábhachtach go mbeidh córas oideachais againn ina mbíonn foghlaimeoirí de gach aois rannpháirteach go bríoch i dtimpeallacht dhearfach foghlama. Creidim go gcuirfidh cur i bhfeidhm na ngníomhartha i SOLSR go mór leis an obair atá á déanamh againn cheana féin chun a chinntiú go léirítear meas agus ómós ar gach leanbh agus duine óg a fhreastalaíonn ar ár scoileanna agus go dtugtar tacaíocht dóibh chun a lánacmhainneacht a bhaint amach agus chun a gcuid oideachais scoile a chríochnú go dtí an Ardteistiméireacht.
“Ba mhaith liom aitheantas a thabhairt don obair chrua agus don chomhoibriú a tharla ar fud na ranna éagsúla, eagraíochtaí an Lucht Siúil agus na Romach agus leis na comhpháirtithe oideachais agus ár gcomhghleacaithe ar fud na bpobal scoile uile chun an straitéis seo a chur i gcrích lena chinntiú go raibh sé ina phróiseas eolach agus cuimsitheach. Ina theannta sin, ba mhaith liom buíochas ar leith a ghabháil leis na leanaí agus na daoine óga a ghlac páirt inár gcomhairliúcháin.”
Dúirt an tAire O’Gorman:
“Sna seachtainí amach romhainn, foilseoidh an Rialtas an Straitéis Náisiúnta nua um Chuimsiú an Lucht Siúil agus na Romach. Beidh an Straitéis Oideachais don Lucht Siúil agus na Romach (SOLSR) mar spreagthóir tábhachtach i bpríomhthéama oideachais na straitéise sin. Is iad rannpháirtíocht agus dul chun cinn a fheabhsú, meas a léiriú ar éagsúlacht chultúrtha, agus torthaí feabhsaithe oideachais do leanaí an Lucht Siúil agus na Romach na bunchlocha ar a ndéanfar an straitéis seo a thomhas. Cuireann sé áthas orm an Straitéis Oideachas don Lucht Siúil agus na Romaigh a sheoladh i dteannta a chéile inniu agus tús a chur leis an obair.”
Dúirt an tAire O’Donovan:
“Is cúis áthais dom foilsiú na Straitéise Náisiúnta um Oideachas don Lucht Siúil agus Romaigh. Tá ról ríthábhachtach ag an rialtas maidir le sochaí a thógáil atá cothrom, comhionann agus cuimsitheach. Cinntíonn an straitéis seo gur féidir le gach duine, beag beann ar chúlra nó oideachas, ardoideachas gan bhacainní a rochtain. Aithnítear uathúlacht aistear oideachasúil gach duine agus an gá atá le tacaíocht shaincheaptha chun rath a bhaint amach. Gabhaim buíochas leis na páirtithe leasmhara go léir as na hionchuir shuntasacha uathu chun céimeanna inghníomhaithe a chruthú óna dtiocfaidh fíorathrú ar oideachas an Lucht Siúil agus na Romach. Tá spriocanna na straitéise uaillmhianach, ach tá sé ríthábhachtach ionchais arda a bheith ann chun Éire níos cuimsithí a chruthú.”
Bhí próiseas fairsing comhairliúcháin ann mar chúnamh chun an straitéis a fhorbairt, ina raibh comhoibriú ar fud na dtrí roinn rialtais agus le hionadaithe ó phobail agus eagraíochtaí an Lucht Siúil agus na Romach chun teacht ar thuairimí agus taithí leanaí an Lucht Siúil agus na Romach iad féin, teaghlaigh agus pobail an Lucht Siúil agus na Romach agus an earnáil oideachais.
Chun tuilleadh eolas a fháil agus chun an straitéis agus an plean forfheidhmithe a léamh, tabhair cuairt ar Straitéise Oideachais don Lucht Siúil agus na Romaigh (SOLSR)