Preasráitis
Fógraíonn an tAire Sláinte an infheistíocht i mBuiséad 2025 don Straitéis Náisiúnta Máithreachais 2016-2025
Foilsithe
An t-eolas is déanaí
Foilsithe
An t-eolas is déanaí
D'fhógair an tAire Sláinte Stephen Donnelly maoiniú forbartha nua ar fiú €2 mhilliún é do chur i bhfeidhm leanúnach na Straitéise Náisiúnta Máithreachais in 2025, agus costas bliana iomlán €4 mhilliún ag gabháil leis in 2026.
Tá sé mar aidhm ag an Straitéis Náisiúnta Máithreachais seirbhísí máithreachais atá sábháilte agus dírithe ar mhná a sholáthar chun rogha níos fearr a chur ar fáil do mhná ar fud na tíre.
Leis an maoiniú nua faoi Bhuiséad 2025, forálfar do na nithe seo a leanas:
Dúirt an tAire Donnelly:
“Tosaíocht domsa agus don Rialtas seo is ea feabhas a chur ar chúram sláinte na mban. Tá rún daingean agam go gcuirfidh maoiniú Bhuiséad 2025 leis an dul chun cinn suntasach atá déanta go dtí seo maidir le seirbhísí máithreachais a fhorbairt agus a fheabhsú do mhná, do naíonáin agus do theaghlaigh.
“Ó seoladh an Straitéis Náisiúnta Máithreachais in 2016, rinneadh athchóiriú suntasach ar ár seirbhísí máithreachais, mar shampla breis agus 500 ball foirne lánaimseartha breise a earcú, Múnla Cúraim nua a chur i bhfeidhm, sé líonra máithreachais a bhunú agus Seirbhís Náisiúnta Breithe Baile chomh maith le saintacaíochtaí lena n-áirítear foirne méala agus speisialtóirí lachta i ngach seirbhís mháithreachais.
“Léiríodh sa Suirbhé Náisiúnta ar Eispéireas Máithreachais gur tosaíocht do mhná é feabhas a chur ar chúram iarbhreithe sa phobal. Sin é an fáth, ó 2022 i leith, gur threoraigh mé infheistíocht shuntasach i mbunú líonra náisiúnta de Mhoil Iarbhreithe a chuireann cúram riachtanach ar fáil do mhná sa phobal sna seachtainí tar éis breithe. Cuirfidh Buiséad 2025 ceithre Mhol bhreise ar fáil, rud a fhágfaidh go mbeidh 13 Mhol sa líonra náisiúnta. Tá a fhios agam ó mhná a d'fhreastail ar an tseirbhís seo an luach atá acu ar an tacaíocht bhreise, lena n-áirítear beolínte, machnamh breithe, agus fisiteiripe.
‘Le maoiniú Bhuiséad 2025, déanfar foráil freisin maidir lenár seirbhís Náisiúnta Géanómaíochta Imbhreithe a sholáthar, lena maoineofar cúigear comhairleoirí géiniteacha breise chun feabhas a chur ar rochtain na mban ar thástáil ghéiniteach chriticiúil agus ar thacaíocht ghéiniteach chriticiúil.
“Tá na feabhsuithe sin mar chuid d’éabhlóid leanúnach ar sholáthar chúram sláinte na mban in Éirinn agus táim tiomanta leanúint den obair sin chun tuilleadh athchóirithe a chur chun cinn.”
Dúirt Kilian McGrane, Stiúrthóir an Chláir Náisiúnta um Shláinte na mBan agus na Naíonán:
“Is díol mór sásaimh é an infheistíocht bhreise seo chun an Straitéis Náisiúnta Máithreachais a chur chun feidhme. Áiritheofar leis an infheistíocht sin in 2025 agus 2026 go ndéanfar na moltaí maidir le taighde agus iniúchadh, feidhmiú céimneach an chreata um ghéineolaíocht imbhreithe, le comhairleoirí chun tacú leis na géineolaithe comhairleacha; moil iarbhreithe a leathnú tuilleadh, lena gcuirtear cúram fillte tábhachtach ar fáil do mhná agus do naíonáin go luath tar éis iad a scaoileadh amach as an ospidéal; agus is féidir infheistíocht bhreise chriticiúil do shainchnáimhseacha i réimsí amhail titimeas agus iomrall athfhillteach a chur chun cinn a thuilleadh."
Foilsíodh an Straitéis Náisiúnta Máithreachais - Todhchaí Níos Fearr a Chruthú le Chéile 2016 - 2026 i mí Eanáir 2016 agus tá feabhsuithe suntasacha curtha ar sheachadadh an bheartais náisiúnta mháithreachais chun athrú ó bhonn a dhéanamh ar an gcaoi a soláthraítear cúram máithreachais.
Sainaithnítear ceithre thosaíocht straitéiseacha sa Straitéis:
1. Cur chuige sláinte agus folláine.
2. Cúram atá sábháilte, ar ardchaighdeán, comhsheasmhach go náisiúnta agus dírithe ar mhná.
3. Rogha mná a éascú trí shamhail nua de chúram máithreachais a fhorbairt le trí chonair chúraim, Cúram Tacaithe, Cúram Cuidithe agus Cúram Speisialaithe, ag brath ar riachtanas an duine aonair.
4. Rialachas láidir agus lucht saothair oilte a bhfuil acmhainní cuí acu.
Tá moil iarbhreithe ag tabhairt rochtain do mhná ar chúram iarbhreithe i suíomhanna pobail, amach ó thimpeallacht ospidéil. Cuireann an tseirbhís seo ceapachán athbhreithnithe iarbhreithe ar fáil do gach bean sula scaoiltear iad ón mbarda iarbhreithe. Áirítear leis seo seiceáil iomlán ar mháthair agus ar leanbh, machnaimh bhreithe, measúnú agus tacaíochtaí beathaithe naíonán, plé ar roghanna maidir le toircheas sa todhchaí, agus cur chun cinn sláinte ginearálta. Ina theannta sin, tá bean chabhrach ar fáil chun tacaíocht iarbhreithe teileafóin a chur ar fáil do mhná.
Tá moil iarbhreithe ar oscailt i Sligeach, Ceatharlach-Cill Chainnigh, Corcaigh, Ciarraí agus Portiuncula. Cuireadh maoiniú ar fáil ó Chiste Sláinte na mBan faoi Phlean Gníomhaíochta Shláinte na mBan in 2024 chun ceithre mhol eile a chur ar fáil. Le Buiséad 2025, beidh ceithre mhol bhreise in ann líonra 13 mhol a bhunú in 2025.
Rinneadh struchtúr don tseirbhís sin a dhearadh agus a fhormheas in 2023. Tríd an tseirbhís seo, tá rochtain á fáil ag mná ar mheastóireacht, ar dhiagnóisiú, ar bhainistiú agus ar chóireáil aimhrialtachtaí roimh bhreith. Cuirfidh earcú foirne breise ar chumas níos mó ban ar fud na tíre rochtain a fháil ar an tseirbhís seo in 2025, le hamanna atreoraithe níos giorra.
Faoi ghníomh 29-32 den Straitéis, iarrtar go mbunófaí feidhm Iniúchóireachta Cliniciúla Náisiúnta i Seirbhísí Máithreachais laistigh d'Fheidhmeannacht na Seirbhíse Sláinte (FSS), lena n-áirítear líonra taighde chun díriú ar réimsí tosaíochta sláinte na mban. Rannchuideoidh an fheidhm taighde agus iniúchóireachta sin le treoirlínte cliniciúla chun cúram atá dírithe ar mhná, atá sábháilte agus ar ardchaighdeán a bhaint amach. Le feidhm shoiléir iniúchóireachta agus an rannpháirtíocht chliniciúil is fearr is féidir, cuirfear feabhas ar mhuinín agus ar fhianaise i gcáilíocht an chúraim a sholáthraítear do mhná.