Preasráitis
Reachtaíocht chinniúnach tugtha isteach ag an Aire Sláinte chun ríomhsheirbhísí sláinte a éascú sa Dáil
Foilsithe
An t-eolas is déanaí
Foilsithe
An t-eolas is déanaí
Cuirfidh an Bille bunús dlí soiléir ar fáil chun an Taifead Sláinte Digiteach a bhunú do gach duine in Éirinn, a thabharfaidh rochtain níos éasca d'othair ar a gcuid faisnéise sláinte féin.
Tabharfaidh an tAire Sláinte, Stephen Donnelly an Bille um Fhaisnéis Sláinte 2024 isteach inniu tríd an Dara Céim sa Dáil.
Ag labhairt dó roimh dhíospóireacht na Dála, dúirt an tAire Donnelly:
"Beidh an Bille um Fhaisnéis Sláinte claochlaitheach d'othair agus do na gairmithe atá ag obair go crua ar fud ár seirbhísí sláinte. Éascaíonn sé comhroinnt chuí faisnéise othar idir shuíomhanna cúraim sláinte agus soláthraíonn sé bunús soiléir dlí chun taifid sláinte dhigiteacha a bhunú do gach duine in Éirinn. Cabhróidh sé seo le hothair rochtain fheabhsaithe a fháil ar a gcuid faisnéise sláinte féin, smacht a bheith acu uirthi, chomh maith le cúnamh a thabhairt do ghairmithe sláinte chun dearcadh níos iomláine a bheith acu ar na hothair a bhfuil cóireáil á cur orthu."
Ag labhairt faoin reachtaíocht nua, dúirt an tAire Donnelly:
“Tugann an Bille cumhacht do FSS faisnéis sláinte a tharraingt le chéile ó shuíomhanna cúraim éagsúla chun taifid sláinte dhigiteacha a fhorbairt agus a imlonnú do gach othar. Is céim thábhachtach é an Bille chun tacú le cúram comhtháite a bhaint amach agus tá sé ríthábhachtach chun na feabhsuithe seirbhíse sláinte atá beartaithe faoi Sláintecare a bhaint amach. Tacóidh an Bille freisin le hoibleagáidí na hÉireann agus le deiseanna suntasacha faoin Rialachán Eorpach maidir le Spás Sonraí Sláinte (EHDS), atá le teacht i bhfeidhm faoi dheireadh na bliana seo.
"Tá an Bille um Fhaisnéis Sláinte mar chuid de shraith beart a dhéanfaidh difríocht mhór do cháilíocht agus d'éifeachtacht ár seirbhísí sláinte agus cúraim shóisialta amach anseo. Níos déanaí i mbliana cuirfimid Aip Othar nua i bhfeidhm, agus cuirfear Taifead Náisiúnta um Chúram Comhroinnte i bhfeidhm in 2025."
Is cuid ríthábhachtach é an Bille um Fhaisnéis Sláinte chun 'Digital for Care: A Digital Health Framework for Ireland 2024-2030' a chur i bhfeidhm go rathúil, a seoladh i mí na Bealtaine 2024. Leagtar amach sa chreat fís agus treochlár chun timpeallacht cúraim sláinte nua-aimseartha atá cumasaithe go digiteach a sholáthar, lena n-áirítear faisnéis sláinte chomhtháite a chur ar fáil go leictreonach trí thaifid sláinte dhigiteacha. Cuirfidh sé seo ar chumas na foirne de chúram sláinte le rochtain a fháil ar an bhfaisnéis cheart nuair a theastaíonn sé uathu, chun a róil a dhéanamh go héifeachtach, agus an cúram is fearr is féidir a chur ar fáil d'othair.
Mar fhocal scoir, dúirt an tAire Donnelly:
“Teastaíonn taifead sláinte digiteach amháin ó Éirinn ar féidir le gairmithe sláinte rochtain a fháil air ar fud na seirbhíse sláinte. ' Cuireann Digital for Care treochlár soiléir ar fáil maidir le conas córas taifead sláinte digiteach aontaithe, nasctha agus otharlárnach a sholáthar in Éirinn."
Tá an tAire Donnelly ag súil go mór le tuilleadh díospóireachta agus le rith an Bhille trí na Tithe, agus le hachtú na mbeart, a chuirfidh creat láidir reachtaíochta ar fáil do chóras comhtháite faisnéise sláinte.