Preasráitis
Fógraíonn an tAire McConalogue €4.8 milliún d'íocaíochtaí faoin mBeart Ionchorpraithe Tuí (SIM)
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
D'fhógair an tAire Talmhaíochta, Bia agus Mara, Charlie McConalogue TD, inniu go bhfuil tús curtha le híocaíochtaí dar luach iomlán €4.8 milliún a eisiúint d'fheirmeoirí faoin mBeart Ionchorpraithe Tuí (SIM).
Mhaígh an tAire:
“Ba thréimhse dhúshlánach é samhradh 2024 agus bhí fíorbhrú ar sholáthairtí mar thoradh ar stoic laghdaithe farae. In ainneoin na mbrú seo, bhí mé in ann a chinntiú gur lean an SIM ar aghaidh, agus ag an am céanna tacú le táirgeadh farae tríd an Íocaíocht Cúnaimh Burláilte”
Chuir an tAire leis sin:
“Tá íocaíochtaí faoin scéim seo ann chun tacaíocht airgeadais a chur ar fáil d'fheirmeoirí curaíochta chun leibhéil charbóin orgánaigh ithreach a mhéadú trí bharra gránacha a ghearradh agus a ionchorprú. Sa chás gur roghnaigh feirmeoirí tarraingt siar ó SIM i rith an tsamhraidh agus dul isteach sa scéim Íocaíochta Cúnaimh Burláilte, gheobhaidh siad íocaíocht go luath i 2025.”
Mar fhocal scoir, dúirt an tAire:
“Leanfar le haon íocaíochtaí gan íoc atá dlite faoin SIM a íoc sna seachtainí amach romhainn de réir mar a réiteofar ceisteanna sa chás go bhfuil feirmeoirí tar éis tarraingt siar go páirteach nó go hiomlán ó SIM.”
Beidh íocaíochtaí le feiceáil i gcuntas bainc fheirmeoirí sna laethanta amach romhainn.
Is féidir le feirmeoirí ar mian leo teagmháil a dhéanamh leis an roinn maidir lena n-íocaíocht Ionchorpraithe Tuí, glaoch a chur ar an Líne Chabhrach Íocaíochtaí Díreacha ar 057-8674422 nó trí ríomhphost chuig SIM@agriculture.gov.ie
Is comhpháirtíocht é comhbheartas talmhaíochta an Aontais Eorpaigh (CBT) idir an tsochaí agus an earnáil talmhaíocht a chinntíonn soláthar seasmhach beatha, a chosnaíonn ioncam na bhfeirmeoirí, a chosnaíonn an timpeallacht agus a choinníonn ceantair thuaithe beo bríomhar. Cuireann tíortha an AE an CBT i bhfeidhm ar leibhéal náisiúnta le Plean Straitéiseach CBT saincheaptha don tréimhse 2023-2027. Chun tuilleadh eolais a fháil, téigh chuig gov.ie/cap
Is scéim é an Beart Ionchorpraithe Tuí (SIM) faoi Phlean Straitéiseach CBT na hÉireann (CSP) 2023 – 2027. Tá an scéim ceaptha chun tacaíocht airgeadais a chur ar fáil d'fheirmeoirí curaíochta chun leibhéil charbóin orgánaigh ithreach a mhéadú trí bharra gránacha a ghearradh agus a ionchorprú.
Is €250 an ráta in aghaidh an heicteáir do Choirce, Cruithneacht, Eorna agus Seagal agus ráta níos ísle de €150 do do thuí ó Ráib Olashíl. Beidh íocaíochtaí le feiceáil i gcuntas bainc an fheirmeora sna laethanta amach romhainn. Íocfar €4.8 milliún le 1,155 tréad ag an tráth seo
Tugadh isteach Íocaíocht nua Cúnaimh Burláilte in 2024 mar scéim bhreise chun soláthairtí farae a threisiú a bhí ar siúl i gcomhar le SIM. Thug an íocaíocht seo deis d'fheirmeoirí an tsolúbthacht a roghnú ar chóir dóibh maoiniú a fháil trí thuí a ghearradh faoi SIM nó trína bhurláil faoin Íocaíocht nua Cúnaimh Burláilte. Tá an íocaíocht socraithe ag €175 in aghaidh an heicteáir do bheartáin incháilithe SIM a tarraingíodh siar ón scéim SIM inar burláladh an tuí.
De réir na mblianta roimhe seo, níl gach iarratas faofa chun íocaíocht a fháil faoin Scéim Ionchorpraithe Tuí. Leanfar le párolla rialta sna seachtainí amach romhainn lena chinntiú go ndéantar próiseáil ar chásanna faofa chun íocaíocht a fháil chomh sciobtha agus is féidir.
Is féidir le feirmeoirí glaoch ar an Deasc Chabhrach ag 057-8674422. Is féidir le feirmeoirí aon fhiosruithe a d’fhéadfadh a bheith acu a chur isteach ar líne freisin trí www.agfood.ie
Miondealú Íocaíochta de réir an Chontae
| CONTAE | SIM Íoctha | SIM_AMT (€) |
| CEATHARLACH | 80 | 348,298.60 |
| AN CABHÁN | 2 | 3,829.50 |
| AN CLÁR | 0 | - |
| CORCAIGH | 118 | 492,408.75 |
| DÚN NA nGALL | 25 | 66,866.00 |
| BAILE ÁTHA CLIATH | 54 | 318,262.50 |
| GAILLIMH | 14 | 53,890.67 |
| CIARRAÍ | 11 | 47,323.25 |
| CILL DARA | 77 | 351,771.62 |
| CILL CHAINNIGH | 44 | 158,136.50 |
| LAOIS | 51 | 174,938.50 |
| LIATROIM | 2 | 4,742.50 |
| LUIMNEACH | 2 | 11,600.00 |
| AN LONGFORT | 1 | 2,120.00 |
| LÚ | 99 | 402,949.17 |
| MAIGH EO | 0 | - |
| AN MHÍ | 148 | 676,867.95 |
| MUINEACHÁN | 6 | 14,966.00 |
| UÍBH FHAILÍ | 28 | 99,615.50 |
| ROS COMÁIN | 4 | 15,582.50 |
| SLIGEACH | 0 | - |
| TIOBRAID ÁRANN | 80 | 334,573.50 |
| PORT LÁIRGE | 22 | 89,515.00 |
| AN IARMHÍ | 35 | 143,985.50 |
| LOCH GARMAN | 206 | 847,007.29 |
| CILL MHANTÁIN | 46 | 208,010.97 |
| Iomlán | 1155 | 4,867,261.77 |