Ó An Roinn Talmhaíochta, Bia agus Mara
Foilsithe
An t-eolas is déanaí
Leag an tAire Talmhaíochta, Bia agus Mara, Charlie McConalogue TD, béim inniu ar an ngá atá le dlúthpháirtíocht leanúnach AE mar fhreagra ar ionradh na Rúise ar an Úcráin.
Ag labhairt dó ag cruinniú urghnách neamhfhoirmiúil Airí Talmhaíochta an Aontais Eorpaigh, a d’iarr Uachtaránacht na Fraince ar an AE chun iarmhairtí na coinbhleachta d’earnáil agraibhia na hEorpa a phlé, d’fháiltigh an tAire McConalogue roimh an dlúthpháirtíocht láidir atá léirithe ag an AE leis an Úcráin, leag sé béim ar an ngá atá leis an bhfreagra a chur go daingean i gcomhthéacs an ghá atá le slándáil bia leanúnach a choinneáil do chách.
Dúirt sé:
“I gcomhpháirtíocht lenár mBallstáit eile den AE, leanann Éire uirthi ag tacú go láidir leis na smachtbhannaí is forleithne san AE ar an Rúis mar gheall ar a gníomhartha scannalacha. Ní mór dúinn a chinntiú freisin go bhfuil na bearta a dhéanaimid sa chomhthéacs níos leithne sin, mar aon leis an ualach nach mór a iompar, inbhuanaithe, agus ní bheidh sé sin amhlaidh ach amháin má dhéanaimid gach is féidir linn chun slándáil bia a chothabháil, dár saoránaigh féin, do mhuintir na hÚcráine agus i gcomhthéacs idirnáisiúnta níos leithne. Ina fhianaise sin, fáiltím roimh dhearbhú an Choimisinéara Wojciechowski inniu go bhfuil an Coimisiún Eorpach réidh chun bearta tacaíochta margaidh a chur ar fáil faoi rialachán CEM de réir mar is gá.”
Mar aon lena chomhghleacaithe, leag an tAire McConalogue béim ar a imní ar leith maidir le tionchair na coinbhleachta ar shlabhraí soláthair agraibhia, agus go háirithe ar ionchuir amhail leasachán agus beatha. Dúirt sé:
“Agus an cur isteach féideartha ar mhargaí talmhaíochta á cur san áireamh, tacaíonn Éire go láidir le héilimh go ndéanfaí dlúthmhonatóireacht leanúnach ar an gcás, agus go ndéanfaí faisnéis a roinnt go trédhearcach. Aontaím freisin gur cheart dúinn an scrúdú ar thionchair fhéideartha a threisiú i gcomhar lenár gcomhpháirtithe i raon fóram domhanda, lena n-áirítear Eagraíocht Bhia agus Talmhaíochta na NA, an OECD agus an Chomhairle Idirnáisiúnta Gráin. Ba cheart go ndéanfadh an Sásra Ullmhachta agus Freagartha don Ghéarchéim Eorpach um Shlándáil Bia athbhreithniú freisin ar na dúshláin straitéiseacha do shlándáil beatha agus bia an AE a bhaineann leis an ngéarchéim reatha. Agus ba cheart go dtiocfadh an Sainghrúpa atá beartaithe ar mhuiceoil le chéile chun impleachtaí ar leith na géarchéime seo don earnáil a mheas, mar a dhéanann sé anuas ar na deacrachtaí margaidh atá ann le tamall maith anuas.”
Ag tabhairt dá haire gur léir gur cás luaineach agus athraitheach é an cás seo, leag an tAire béim ar an ngá ó thaobh an AE le measúnú leanúnach a dhéanamh ar fhorbairtí, agus a bheith réidh chun freagairtí riachtanacha a ghlacadh chun an tionchar ar ár slándáil bia a íoslaghdú.
Mar fhocal scoir, dúirt sé:
“Ba cheart go ndíreodh ár ngníomhartha láithreacha ar iarracht a dhéanamh slabhraí soláthair a chothabháil agus aon cur isteach orthu sin a íoslaghdú. Dá bhrí sin, d'iarr mé ar an gCoimisiún Eorpach measúnú riosca cúramach a dhéanamh ar na bearta is féidir a dhéanamh anois chun tacú le slabhraí soláthair. Thar rud ar bith eile, ba léir ó phlé an lae inniu go raibh gach Ballstát eile ar aon dul le dearbhú na hÉireann nach mbeimid in easnamh inár n-iarrachtaí chun tacú le muintir na hÚcráine.”