Preasráitis
Tá an tAire McConalogue i gceannas ar Mhisean Trádála Agraibhia go dtí an Afraic Thiar
Ó An Roinn Talmhaíochta, Bia agus Mara
Foilsithe
An t-eolas is déanaí
Ó An Roinn Talmhaíochta, Bia agus Mara
Foilsithe
An t-eolas is déanaí
Tá an tAire Talmhaíochta, Bia agus Mara, Charlie McConalogue T.D., i gceannas ar mhisean trádála agrai agus eacnamaíoch go dtí an Afraic Thiar an tseachtain seo. Tá an chuairt ar an Nigéir agus an tSeineagáil dírithe ar chaidrimh pholaitiúla agus eacnamaíocha a fhorbairt sa réigiún agus tá Bord Bia, Fiontraíocht Éireann, Córais Bia Inbhuanaithe Éireann agus Ambasáidí na hÉireann sa dá tír óstach in éineacht leis an Aire ar an gcuairt. Tá 15 chuideachta Éireannacha rannpháirteach sa chuairt an tseachtain seo freisin.
Ag labhairt roimh an Misean Trádála, dúirt an tAire McConalogue:
"Táim ríméad orm bheith i gceannas ar an misean trádála seo go dtí an Afraic Thiar. Tá naisc dhomhain agus stairiúla idir Éirinn agus an réigiún seo, caidreamh atá ag forbairt agus ag dul i méid le blianta beaga anuas le pobal bríomhar Iarthar na hAfraice in Éirinn atá ag dul i méid. Tá caidreamh láidir geilleagrach ag Éirinn leis an Afraic Thiar agus táim ag tnúth le hiniúchadh a dhéanamh ar na deiseanna atá ann chun an caidreamh seo a fheabhsú áit a bhfuil méadú ag teacht ar an éileamh ar bhia agus ar dheochanna inacmhainne ar ardchaighdeán. Tá bia mara agus deochanna sábháilte ardchaighdeáin na hÉireann in ann freastal ar an éileamh seo agus lorg na hearnála sa réigiún seo a mhéadú. Áireoidh an misean trádála rannpháirtíocht idir comhghleacaithe sinsearacha oifigiúla an Rialtais chomh maith le príomhtheagmhálaithe trádála do ghnólachtaí Éireannacha atá ag feidhmiú sa réigiún. Táim ag súil go háirithe le freastal ar sheoladh líonra Trádála Éire-An Nigéir i Lagos an tseachtain seo agus le tacaíocht a thabhairt do chuideachtaí Éireannacha naisc eacnamaíocha nua a chruthú sa réigiún.
Áireofar leis an misean trádála seo imeachtaí in Abuja agus Lagos na Nigéire agus Dacár sa tSeineagáil araon, cruinnithe Rialtais go Rialtais, rannpháirtíocht le hEagraíocht Bhia agus Talmhaíochta na NA agus Clár Domhanda Bia na NA agus idirchaidreamh Bhord Bia agus Fiontraíocht Éireann le príomhchustaiméirí agraibhia agus agrtheicneolaíocht na hÉireann san áireamh.
Thug an tAire le fios:
“Baineann an tseachtain seo freisin lenár gcomhoibriú a fheabhsú maidir le dúshláin dhomhanda a bhaineann le slándáil bia, le hoiriúnú aeráide agus comhshaoil agus cuireann sí deiseanna ar fáil do mhalartuithe tábhachtacha agus do chomhoibriú le páirtithe leasmhara sa réigiún seo. Cé go bhfuil scála, geilleagair agus agra-éiceolaíochtaí na hÉireann agus na dtíortha sa réigiún difriúil, creidim go bhfuil an cuspóir chomhchoiteann againn maidir le rannchuidiú na hearnála agraibhia lenár ngeilleagair náisiúnta a fheabhsú agus córais bia inbhuanaithe a thógáil. Ligeann an teagmháil leis an Rialtas, Gníomhaireacht na NA agus páirtithe leasmhara na hearnála príobháidí le linn an Mhisin Trádála seo dúinn taithí na hÉireann ar earnáil talmhaíochta inbhuanaithe a fhorbairt a roinnt, chun béim a chur ar thiomantas na hÉireann do thacú le forbairt córas bia inbhuanaithe ar fud an domhain agus deiseanna breise a aithint le haghaidh comhoibrithe ar na saincheisteanna sin le páirtithe leasmhara sa réigiún seo.”
Dúirt POF Bhord Bia, Jim O’Toole:
“Tá caidreamh láidir trádála á thógáil ag Éirinn leis an Afraic agus tá luach onnmhairithe bia agus dí na hÉireann chomh hard le €1.1 billiún in 2022, lena n-áirítear, onnmhairí déiríochta, deochanna, feola agus bia mara. Ó 2018 i leith, tá méadú tagtha ar onnmhairí bia agus dí na hÉireann go dtí an Afraic Thiar agus iad ag dul ó €227 milliún go €578 milliún i 2022.
Ós rud é go bhfuil daonra comhcheangailte de 229 milliún duine ag an Nigéir agus an tSeineagáil, cuireann misin trádála mar seo bealach ar fáil chun próifíl bia agus dí na hÉireann a ardú agus chun deiseanna a sholáthar do thíortha Iarthar na hAfraice a ngnó le hÉirinn a mhéadú.”
Mar fhocal scoir dúirt an tAire McConalogue:
"Is gnóthas de chuid Fhoireann Éireann an misean trádála seo le tacaíocht láidir ó Ambasáidí na hÉireann chuig an Nigéir agus an tSeineagáil, mo Roinn féin, Córais Bia Inbhuanaithe Éireann, Bord Bia agus Fiontraíocht Éireann. Táim ag súil go mór le dul i dteagmháil le cuideachtaí bia agus dí na hÉireann agus lena bpríomhchustaiméirí trádála agus comhpháirtíochtaí na hÉireann sa réigiún a dhoimhniú."
CRÍOCH
Nóta d'Eagarthóirí:
Onnmhairí agraibhia na hÉireann
Is í an Nigéir an margadh is mó d’earraí agraibhia na hÉireann san Afraic le honnmhairí arbh fhiú €208 milliún iad i 2022 ag méadú 14% thar 2021 agus táirgí Déiríochta, Bia Mara agus Dí ar na príomhchatagóirí onnmhairithe.
B’ionann onnmhairí agraibhia na hÉireann chuig an tSeineagáil i 2022 agus €95 milliún.
Clár Bia Domhanda
Is é Clár Domhanda Bia na Náisiún Aontaithe an eagraíocht dhaonnúil is mó ar domhan a shábhálann saolta daoine in éigeandálaí agus feidhm a bhaint as cúnamh bia mar chosán chun síochána, seasmhachta agus rathúnas do dhaoine atá ag teacht chucu féin tar éis coinbhleachta, tubaistí, agus tionchar an athraithe aeráide. Feidhmíonn an Roinn Talmhaíochta, Bia agus Mara mar cheannasaí Rialtas na hÉireann leis an gClár Domhanda Bia. Is é gealltanas CDB na hÉireann 2022-2024 ná croímhaoiniú a mhéadú go €75m thar na trí thréimhse seo. Áirítear leis seo leithdháileadh €5 milliún in aghaidh na bliana do chiste iontaobhais CDB le haghaidh athrú aeráide a bhaineann leis an ocras; agus leithdháileadh bliantúil de €8 milliún ar fhreagairt éigeandála na Siria ón CDB. Tá iarmhéid an mhaoinithe go hiomlán solúbtha agus neamh-shainmharcáilte, rud a ligeann don CDB freagairt thapa agus éifeachtach a thabhairt chun cinn nuair is mó a bhfuil gá leis, i gcásanna éigeandála ar mhórscála.