Ó An Roinn Talmhaíochta, Bia agus Mara
Foilsithe
An t-eolas is déanaí
Tá an tAire Talmhaíochta, Bia agus Mara, Charlie McConalogue TD, tar éis spreagadh a thabhairt inniu d’oibreoirí gnó bia agus d’onnmhaireoirí agraibhia leanúint leis na hullmhúcháin, agus na socruithe riachtanacha a dhéanamh in am trátha, chun ceanglais nua rialaithe allmhairí na RA a chomhlíonadh, a mbeidh feidhm leo ar bhonn céimnithe le linn 2022, ag tosú ón 1 Iúil.
Ag labhairt dó ag an 27ú cruinniú de Choiste Comhairliúcháin na bPáirtithe Leasmhara ar an mBreatimeacht, dúirt an tAire:
“Tá mo Roinn ag obair go hiomlán leis an tionscal chun ullmhú do na hathruithe seo, agus tá raon gníomhaíochtaí ann ar a bhfuil an Roinn agus an tionscal ag obair in ord le cinntiú go bhfuil muid réidh.”
Leag an tAire béim ar an méid seo a leanas:
“Tá an teachtaireacht ríthábhachtach do ghnólachtaí bia atá ag onnmhairiú go dtí an Bhreatain fós ag dul i dteagmháil lena bhfoirne maoirseachta sa Roinn áitiúil maidir leis na próisis mhionsonraithe a bheidh riachtanach chun na socruithe oibriúcháin is éifeachtaí a chinntiú.”
Agus é ag trácht go ginearálta ar athléimneacht na hearnála agraibhia, dúirt an tAire McConalogue:
“Tá sé os cionn bliana anois ó dheireadh idirthréimhse an Bhreatimeachta, agus níl aon amhras ann ach gur ghá do ghnólachtaí, do shaoránaigh agus d'údaráis Rialtais an tréimhse seo iad féin a chur in oiriúint agus roinnt coigeartuithe suntasacha a dhéanamh ar a bpróisis ghnó chun dul i ngleic le hiarmhairtí an Bhreatimeachta. In ainneoin na ndúshlán sin go léir, mar a léiríonn staitisticí trádála na bliana iomláine a eisíodh le déanaí do 2021, tá teacht aniar cruthaithe in onnmhairí agraibhia chuig an RA, agus fás 8.4% tagtha ar a luach in ainneoin tús mall leis an mbliain. Is léiriú é an fheidhmíocht trádála seo in aghaidh an Bhreatimeachta, Covid 19 agus saincheisteanna slabhra soláthair domhanda d’iarrachtaí an tionscail ullmhú chun aghaidh a thabhairt ar na dúshláin shuntasacha seo. Ní féidir linn a bheith réchúiseach, áfach. Níl deireadh go hiomlán le tionchair bhreise an Bhreatimeachta go fóill. Tá patrúin trádála na hÉireann-na Ríochta Aontaithe ag athrú i gcónaí, agus tá na slabhraí soláthair agraibhia atá casta agus comhtháite idir Éire, Tuaisceart Éireann agus an Bhreatain fós á socrú.”
Thapaigh an tAire an deis freisin le meabhrú do chomhaltaí an Choiste go bhfuiltear ag druidim le dúnadh tairseach 'allmhaireoirí neamhchláraithe' na Roinne. Dúirt sé:
“Níl an tairseach d’allmhaireoirí neamhchláraithe, a d’éascaigh an t-aistriú láithreach chuig socruithe nua rialaithe allmhairí an Bhreatimeachta in 2021, oiriúnach don fheidhm a thuilleadh, agus scoirfear de le héifeacht ón 15 Márta 2022.Cuireadh é seo in iúl go forleathan do gach allmhaireoir agus oibreoir eile atá freagrach as coinsíneachtaí, lena n - áirítear trí sheimineár gréasáin le déanaí arna óstáil ag mo Roinn. Iarradh ar gach oibreoir den sórt sin clárú foirmiúil a chur i gcrích le mo Roinnse, chun a chinntiú go leanfar le hoibríochtaí allmhairithe éifeachtacha agus le próiseáil íocaíochta. Tá mé ag meabhrú arís d'oibreoirí nach ndearna amhlaidh clárú láithreach le mo Roinnse lena chinntiú nach mbeidh aon chur isteach ná aon mhoill ar na seirbhísí a chuireann mo Roinn ar fáil.”
Fuair an Coiste nuashonrú freisin ón Roinn Gnóthaí Eachtracha ar fhorbairtí le déanaí ag leibhéal an AE maidir leis an gcaidreamh idir an AE agus an RA, lena n-áirítear an rannpháirtíocht leanúnach maidir le cur i bhfeidhm Phrótacail Éireann/Thuaisceart Éireann.
Nóta d'eagarthóirí
Is féidir le gnólachtaí teagmháil a dhéanamh leis an Roinn maidir le haon saincheisteanna a bhaineann leis an mBreatimeacht trí:
• a ríomhphost tiomnaithe: brexitcall@agricuture.gov.ie, nó
• ar an teileafón ag (01) 607 2830.
Tá comhairle mhionsonraithe agus acmhainní ar fáil freisin ar láithreán gréasáin Rialtas na hÉireann ag: https://www.gov.ie/en/campaigns/af50d-agriculture-and-brexit/?referrer=http://www.gov.ie/agriculture/brexit
Taifeadadh seimineár gréasáin an DAFM “Update on changes to the INIS Portal for Importers” agus tá sé ar fáil le féachaint air ag https://www.youtube.com/watch?v=HOw0S8tITCI
Tá an leagan is déanaí de Shamhail Oibriúcháin Teorann na RA ar fáil ag: www.gov.uk/government/publications/the-border-operating-model www.gov.uk/government/publications/the-border-operating-model
CRÍOCH