Seirbhís
Scéim Ceannaigh Inacmhainne Údarás Áitiúil
Ó An Roinn Tithíochta, Rialtais Áitúil agus Oidhreachta
Foilsithe
An t-eolas is déanaí
Ó An Roinn Tithíochta, Rialtais Áitúil agus Oidhreachta
Foilsithe
An t-eolas is déanaí
Faoin ‘Scéim Ceannaigh Inacmhainne Údarás Áitiúil’ déanann údaráis áitiúla árais chónaithe nua a chur ar fáil le ceannach ag iarratasóirí incháilithe ar phraghsanna laghdaithe. I gcomaoin sin, bíonn céatadán de bhun cothromais san áras cónaithe Ceannaigh Inacmhainne ag an údarás áitiúil a bheidh cothrom le lascaine an phraghais ceannaigh ó luach margaidh iomlán an árais cónaithe. Má cheannaíonn iarratasóir incháilithe áras cónaithe ar lascaine 20%, mar shampla, beidh leas cothromais 20% san áras cónaithe ag an údarás áitiúil.
Is é an t-údarás áitiúil a dhéanfaidh an praghas atá le híoc as áras cónaithe Ceannaigh Inacmhainne nua ag ceannaitheoir ar leith, agus an céatadán den bhun cothromais atá le tógáil ag an údarás áitiúil, a ríomh i gcomhréir le rialacháin Rialtais. Déanfar an praghas a ríomh ó uasacmhainn morgáiste iarratasóra (gan aon díolúine a bheith ann ó Bhearta Morgáiste Bhanc Ceannais na hÉireann), faoi réir íosphraghas a leagann an t-údarás áitiúil amach don áras cónaithe.
Tá an Scéim dírithe ar cheannaitheoirí céaduaire go príomha. Faoi phrionsabal ‘Tús Úr’ an Rialtais, glacfar le hiarratais ó na daoine seo a leanas:
• daoine atá scartha óna bpáirtí nó colscartha nó a bhfuil deireadh tagtha lena gcaidreamh,
• daoine a chuaigh i mbun imeachtaí dócmhainneachta agus nach bhfuil aon leas acu sa teach a mbíodh cónaí orthu ann.
Ní mór do dhaoine atá pósta nó atá i gcomhpháirtíocht shibhialta, nó atá i ndlúthchaidreamh ina bhfuil siad dílis dá chéile agus a bhfuil sé ar intinn acu cónaí a bheith orthu san áras cónaithe lena bpáirtí comhiarratas a dhéanamh.
Tá na húdaráis áitiúla freagrach as na hiarratais a mheas agus as deimhniú gur ceannaitheoirí incháilithe iad na hiarratasóirí (i gcomhréir le rialacháin Rialtais). Chun a bheith incháilithe, ní mór d’uasacmhainn morgáiste iarratasóra (gan aon díolúine a bheith ann ó Bhearta Morgáiste Bhanc Ceannais na hÉireann), a bheith nach mó ná 85.5% de luach margaidh iomláin an Árais Cónaithe Inacmhainne. Cuireann an t-údarás áitiúil taisce airgid a d’fhéadfadh a bheith ag iarratasóir san áireamh nuair a dhéanann sé an t-iarratas a mheas.
Na húdaráis áitiúla faoi seach a chuireann na hárais chónaithe Ceannaigh Inacmhainne ar fáil le ceannach a dhéanann an próiseas iarratais a bhainistiú. De réir mar a chuirtear árais chónaithe ar fáil, fógrófar iad i gcomhréir le rialacháin rialtais agus déanfaidh na húdaráis áitiúla faoi seach na hiarratais a phróiseáil de réir na gcritéar incháilitheachta socraithe. Tabharfar sonraí níos mine i ngach fógra.
I gcás ina bhfuil líon na n-iarratas níos mó ná líon na n-áras cónaithe Ceannaigh Inacmhainne atá curtha ar fáil le ceannach, roghnófar iarratasóirí a n-éireoidh leo i gcomhréir leis an ‘Scéim Tús Áite’ iomchuí atá curtha in iúl ag na húdaráis áitiúla faoi seach (i gcomhréir le rialachán Rialtais).